Шижоат ҳам, ваҳм ҳам юқимлидир!

بِسْمِ اللهِ الرَّحْمٰنِ الرَّحِيم

Алҳамдулиллаҳи вассолату вассаламу ала Русулиллаҳи ваала алиҳи ваасҳабиҳи ажмаийн. Ва баъд:

Ассаламу алайкум вароҳматуллоҳи вабарокатуҳ азизлар!

Ҳаётда золимларга ҳақ сўзни айтиб қатл қилинган азизларни кўп эшитганмиз ва баъзиларимизга кўрмоқлик ҳам насиб этган. Камина бундай азизлар каби бўлмоқлик қандай ҳам шараф дегувчиларга ва улардек бўлишни йўлини изловчи қалби пок кишилар билан бу борада фикрлашмоқни қасд қилдим.   

Бир қарашда илм ва тақвода бирдек кўринган биродаримиз золим зиндонларида биздан кўра афзал мақомлар топиб, ҳатто шаҳид бўлиб кетади. Биз эса, унга ҳавас қилсак-да, ўша биродаримиз рўбарў келган зулм тегирмонига тушмоқдан паноҳ тилаб эҳтиётланамиз. Хўш, нега шундай? Ўша азизимиз биздан бошқачами? Ўзгача яратилганми? Бу ҳақидаги фикримни сиз азизларга очиқлашдан аввал золим қамоғидаги бир оғир воқеани сўзлаб берсам балки ўринли бўлар.

(Сизларга тақдим этилажак воқеани сўзлаб берувчи маҳбуб укамнинг иродасига кўра исмларини ошкор этмасликни маъқул кўрдим.)

Ўзини худо деб билувчи зона бошлиғи Азиз Бозорович қўл остидаги маҳкумларни тиз чўктириш учун қийноқнинг турли услубларидан тап тортмайдиган золим эди, дея ҳикоясини бошлаган укам зонага кирганидан бошлаб ўзига рўбарў қилинган барча қийноқларга алоҳида тўҳталиб ўтдики, уларни бирма-бир эслаб сиз азизларга ҳикоя қилиш ўта машаққатлидир. Шу боис эшитганларимни қисқа айтиб, мавзумизга тааллуқли қисмига тўхталишни маъқул кўрдим.

Қийноқ ускуналари ғайриоддий ва жаллодлари аристонларнинг энг пасткаш ҳоинларидан иборат бўлган ушбу зонада Ҳизб йигитларини ва бошқа турли диний амаллари туфайли қамалганларни қай аҳволга солиб қўйгани алоҳида масала. Укамизни ҳам ўша биродарлар каби тизгинлаш мақсадида уларнинг ҳам бошига тушган қийноқлар чиғириғидан ўтказаркан, шижоати ва бардошига путур етказолмадилар. Ҳатто ўта дарғазаб золим янада оғирроқ ва жирканч услубни танлади…

10 феврал 2000 йил. Ўша йили совуқ қаттиқ келганди. Ҳожатхонадан ажралиб чиққан ахлатлар қудуғи алоҳида бўлиб, унинг усти арматурали панжара билан ёпиб қўйиларди. Чуқурлиги одам кўмарлик даражада. Укамизни сотқин, малай жаллод маҳкумлар қўли билан ўша қудуққа ташлаб панжарани беркитиб қўйдилар. Бир соат қаттиқ совуқда чўкиб кетмаслик учун панжарани ушлаб турган укамнинг қўллари унга ёпишиб қотиб қолганди. Совуқнинг қаттиқлигидан алмашиб турган соқчилардан бири (у рус эди) бу зулмларга ҳайрон қолиб: “куда мир катится брат, терпи ещё немножко” деб пичирларди. Ўша бир соатга яқин вақт ичида укамнинг Аллоҳ Таолога қилган дуосини ҳам сизларга илиниб сўнг мавзуга қайтамиз.

“Мен уларни (золимларни демоқчи) дуойи бад қилмадим. Айтдимки, Эй Роббим, буларни мен дуойи бад қилмайман. Ўзингга ҳавола қиламан. Ахир мен ким бўлибманки, бандаларинг устидан ҳукм чиқарсам. Буларни ўзинг хоҳласанг кечирасан ва хоҳласанг жазолайсан. Бу Сенинг ишинг. Аммо мен бир нарса сўрайман. Росулуллоҳ ﷺ намоз ўқиётиб саждага борганларида душманларингдан бири устиларига туяни қорнини ёпиб қўйгандилар. Ўшанда бу воқеани кўриб турган саҳобалар ҳам уни олиб ташлашга журъат қилмаган эдилар. Менинг аҳволимни кўриб турган биродарларим ҳам ёрдам беролмагани каби. Эй Аллоҳим, агар ўша бандангни аҳволига менинг аҳволим ҳам сал ўҳшаган бўлса, ўша бандамни аҳволига бу бандамники ўхшади, деб ёзиб қўйишингни сўрайман. Сен шундай ёзгинки, тошга ўйиб қўйилгандек ёзгинки, ўша сўзлар амал дафтаримдан асло ўчмасин. Кейинчалик ҳам хабата бўлиб кетмасин. Токи мен Сенга шу билан рўбарў бўлай”.

Азизлар, мана шу укамнинг шу ҳолатига ҳавасда бўлмасликни ҳеч иложи борми? Аммо ўрнида шу азобга дучор бўлишга хоҳиш-чи?

Мавзуга қайтиб шуни айтаманки, укамизнинг саботи туфайли зонадаги биродарларда қайта шижоат пайдо бўлди. Аста-аста тикланиб, золимга тик боқиб, ҳақни сўзлай бошлади. Аммо қизиғи шуки, укамиз биродарларга ҳитоб қилгани йўқ, даъват қилиб ваъз қилгани йўқ. Фақат саботда турди. Бунга барчаси гувоҳ бўлдилар ҳолос.

Шундан хулоса қилдимки, собитлик, шижоат сўзсиз ҳам бошқаларга юқиб ўтувчидир. Шу каби қўрқоқлик ҳам, ваҳм ҳам бошқаларга юқиб ўтгувчидир.

Демакки, азизлар, сиз мард ва шижоатлилар даврасида бўлингки, ин ша Аллоҳ улар каби азизликка яқин бўлурсиз. Аммо қўрқоқ, ҳамиятсиз кишилардан узоқ юрингки, ўша иллат ҳамроҳингиз бўлиб қолмасин! Афсусланарлиси шуки, собитлар кўпмидики, ҳар қадамда топа олсанг ёки қўрқоқлар каммидики қочиб қутулсанг.

Ҳизб ут-Таҳрирнинг Ўзбекистондаги  матбуот бўлими аъзоси Зайниддин

20.10.2021й