“Технологиялар асри”да одамлар ис газидан ўлмоқда

بِسْمِ اللهِ الرَّحْمٰنِ الرَّحِيم

Хабар: Сўнгги 10 кун ичида Самарқанд вилоятида ис газидан заҳарланиш бўйича 4 ҳолат қайд этилди. Бунинг ортидан 8 киши вафот этди ва бир киши оғир аҳволда касалхонага ётқизилди.

Ис газидан заҳарланиб ўлганларнинг 5 нафари ёш бола. Бу ҳақда вилоят фавқулодда ҳолатлар бошқармаси вакили Сирожиддин Абдуллаев маҳаллий матбуотга маълум қилди. Унга кўра, ўлим ҳолатлари табиий газ тармоғига уланган қўлбола печларнинг мўриси тозаланмагани оқибатида юз берган. (Озодлик, 27.10.2021й)

Изоҳ: Аввало, ушбу қурбонлар ва жабрланганларнинг оилалари, яқинларига ўзимизнинг чуқур таъзиямизни изҳор қиламиз. Аллоҳ Таоло уларга сабру жамил, офият берсин, жабрланганларга тез орада комил шифо ато этсин. Афсуски, улар ис газидан бўғилиб ўлаётганларнинг биринчиси ҳам, охиргиси ҳам эмас. Шуниси қизиқки, бундай мусибатлар ҳозирги технологиялар ривожланган даврда содир бўляпти. Кунда-кунора янги технологик кашфиётлар қилинаётган, қулайликлар кенг ёйилаётган бир вақтда, одамларнинг аксари ҳали ҳам ўтган асрнинг қолоқ техникаларидан фойдаланишга мажбур бўлишяпти. Чунки кўпчилик одамларнинг ушбу янги технологиялардан фойдаланиш учун шунчаки имконияти йўқ. Аслини олганда, ер юзидаги мавжуд ҳар қандай бойликлар, имкониятлар, илмий кашфиётлар, янги технологиялар инсон манфаатларига хизмат қилиши керак эди. Бироқ ҳозир улардан фақат бой қатлам ёки ҳокимият тепасига келиб олган бир тўда жиноятчиларгина баҳраманд бўлмоқдалар. Бунинг натижасида юзага келган иқтисодий қийинчиликлар сабабли аксар одамлар алмисоқдан қолган хавфли, нисбатан арзонроқ бўлган ускуналардан фойдаланиб, жонларини хатарга қўйишга мажбур бўлишяпти.

Шуларга қарамай, ҳукумат бундай ҳолатларда асосан халқни ўзини бош айбдор сифатида кўрсатмоқда. Худдики у одамларнинг асосий эҳтиёжларини таъминлаб, камолий эҳтиёжларини қондиришлари учун шароит яратиб қўйгану, халқ бунга ношукрлик қиляпти. Агар ҳукумат юритаётган сиёсатга назар ташласак, одамларнинг биринчи навбатда қондирилиши зарур бўлган эҳтиёжлари қолиб, давлат бюджети маблағларини ҳайкаллар, кинофестиваллар каби ҳаром ишларга, ситилар, боғлар, кераксиз лойиҳалар каби бефойда ишларга совуряпти. Демак, мавжуд тузумнинг адолатсиз қонунлари ва ёмон бошқаруви оқибатида одамлар, энг ёмони ёш болалар арзон қурбонга айланяпти.

Шунинг учун ҳам биз мусулмонлар шариат қонунларининг татбиқ этилишига ўта муҳтожмиз. Хусусан, юқоридаги ҳолат бўйича ҳам шариат ечим берган. Давлат уйни иситиш учун керак бўладиган энергия билан фуқароларини бепул таъминлайди ва аҳоли хавфсиз техника воситаларидан фойдаланиш имкониятига эга бўлиши учун шароитлар яратади. Росулуллоҳ ﷺ шундай марҳамат қилганлар:

                          المسلمون شركاء في ثلاث،في الماء، والكلإ، والنار     

“Мусулмонлар уч нарсада шерикдирлар: сув, ўт–ўлан ва оловда”. (Аҳмад, Абу Довуд ва Ибн Можалар ривояти, саҳиҳ)

Шунингдек, давлат аҳоли уй-жойларини хавфсиз иситиш ускуналари билан таъминлашга эътибор қаратадики, бу масалани одамларнинг ўзига ташлаб, совуқ ва иссиқ кунлар қаршисида халқни ёлғиз қолдириб қўймайди. Ислом татбиқ қилинсагина технологиялар ривожидан нафақат бойлар, балки кўпчилик одамлар ҳам фойдаланиш имкониятига эга бўладилар. Зеро, Аллоҳ Таоло шундай дейди:

هُوَ الَّذِي خَلَقَ لَكُم مَّا فِي الأَرْضِ جَمِيعاً ثُمَّ اسْتَوَى إِلَى السَّمَاء فَسَوَّاهُنَّ سَبْعَ سَمَاوَاتٍ وَهُوَ بِكُلِّ شَيْءٍ عَلِيمٌ 

– “У ер юзидаги барча нарсани сизлар учун яратган, сўнгра осмонга юзланиб, уларни етти осмон қилиб тўғрилаган Зотдир. Ва У ҳар бир нарсани ўта билувчидир”.                   (Бақара:29)

Ҳизб ут-Таҳрирнинг Ўзбекистондаги матбуот бўлими аъзоси Фаррух

06.11.2021й