Америка Афғонистонда мағлубиятга учраши ортидан, эндиликда санкциялар жорий қилиш ва иқтисодий вазиятни мураккаблаштириш билан ўч олмоқда!
بِسْمِ اللهِ الرَّحْمٰنِ الرَّحِيمِ
Матбуот баёноти
Америка Афғонистонда мағлубиятга учраши ортидан, эндиликда санкциялар жорий қилиш ва иқтисодий вазиятни мураккаблаштириш билан ўч олмоқда!
Сўнгги бир неча кун ичида Афғонистон валютасининг АҚШ долларига нисбатан қиймати ўтган йигирма йилдаги қиймати билан солиштирилганда мисли кўрилмаган даражада тушиб кетди. Бундан ташқари, молия сектори ва юртдаги кўплаб йирик банклар банкротлик ёқасига келиб қолган. Ўз навбатида, бу бозордаги нарх-наволарининг кўтарилишига олиб келиб, Афғонистонни иқтисодий кризис ботқоғига ботирди.
Ҳизб ут-Таҳрир – Афғонистон вилояти Афғонистондаги ҳозирги иқтисодий вазият ғоят хавотирли, деб ҳисоблайди. Ҳолатнинг бундай тус олиши собиқ режимдан қолган ёвуз меросга, Афғонистон Исломий Амирлиги қўлида фаол иқтисодий дастурнинг йўқлигига, устига-устак, Қўшма Штатлар томонидан Афғонистонга санкциялар жорий қилиниб, активлари музлатиб қўйилишига бориб тақалади. Аслида, Ғарб Афғонистонда ўтган йигирма йил ичида хорижий инсонпарварлик ёрдамларига асосланган сунъий иқтисод яратган эди. Бироқ, бугун ушбу молиявий ёрдам, деган нарсага ҳам чекловлар қўйиши натижасида афғон иқтисодиёти суръат билан ҳалокат жарлиги сари кетмоқда.
Қўшма Штатлар ва НАТО кучлари Афғонистондан шармандаларча чиқиб кетгач, ўзларидаги ҳарбий, сиёсий ва разведка билан боғлиқ босим воситаларининг ўзи етарли эмас, деб билишди. Шу боис, Афғонистонга иқтисодий санкциялар киритиш орқали сиёсий манфаатларини таъминлашга уринишмоқда. Ғарб ҳукуматлари «таёқ ва ёрдам» сиёсатини қўллаб, ўз мағлубиятлари учун афғон халқидан ўч олишга уринишяпти. Бу бир томондан. Бошқа томондан эса, Америка айни санкциялари билан Афғонистон Исломий Амирлигининг хатти-ҳаракати ва бошқарув услубини ўзгартиришмоқчи бўляпти. Американинг бу Амирликдан кутаётган асосий нарсаси, унинг Ислом тузумини барпо этишдан воз кечмоғидир. Америка истаги бўйича, бу «Исломий Амирлик» ўзларини халқаро чегаралар билан ўрашлари ва ғарбча қадриятларга мос кенг қамровли ҳукумат тузишлари ҳамда Афғонистондан қочиб чиққан ва Ғарб билан яширин алоқа қилаётган баъзи афғон расмийларига ҳукуматдан ўринлар беришлари… шу билан бирга, Қўшма Штатлар билан мустаҳкам разведка ҳамкорлигини таъминлашлари шарт.
Гарчи Ғарб доим инсонпарварлик ёрдамлари ҳақида оғиз кўпиртириб келган бўлса-да, унинг инсонпарварлик ёрдамларидан амалда сиёсий босим сифатида фойдаланаётганини ҳамда уларни маълум талабларни бажаришга боғлаб қўяётганини гувоҳи бўляпмиз.
Афғонистондаги мусулмон халқ шуни билмоқлари керакки, сиёсий ва иқтисодий муаммоларни бугунги чегаралар ичкарисида ва мавжуд халқаро тизим доирасида ҳал қилиб бўлмайди. Балки муаммоларнинг тўғри ва туб ягона ечими Афғонистон-Покистон-Ўрта Осиёнинг битта Ислом давлати етакчилиги остида бирлаштиришдир. Чунки аслида, айнан мана шу мустамлакачилик чегаралари мусулмонларни заифлаштириб, бўлиб ташлади ва уларни айни санкциялар остида ушлаб туришни осонлаштирмоқда. Яна бир жиҳатдан, ғарбликлар мусулмонларнинг минтақадаги иқтисодий ресурсларини ўзларининг мустамлакачилик режаларига ва қўғирчоқ ҳукмдорларига манфаат келтирадиган услубда тақсимлашмоқда.
Сиз Исломий Амирликдаги ҳукмдорлар ва расмийлар Ғарбнинг ҳозирги қатор сиёсий босимлари, аслида, соф Ислом тузуми барпо этилишини олдини олиш учун қўйилган тузоқ эканини тушуниб етмоғингиз даркор. Ғарбнинг сиёсий талабларига андак бўлса-да итоат қилишингиз бу дунё ва охиратда даҳшатли оқибатларга олиб боради. Худди жанггоҳларда сабот билан турганингиз ғалаба келтиргани каби, бугун ҳам Американинг талабларига қарши очиқ собит позицияни эгаллашингиз сизга мустақил ҳукумат идора эта олишда муваффақият келтиради. Шу билан бирга, сиз бугун ҳисоб сўраш керак бўлган бир ҳукумат сифатида турган экансиз, бундай сусткашлик ҳолатидан қутулмоғингиз ҳамда халқнинг иқтисодий муаммолари учун реал дастур ишлаб чиқишдек бурчингизга содиқ қолмоғингиз даркор. Шубҳасиз, бундай иқтисодий кризисдан чиқишнинг бирдан-бир йўли Исломий иқтисод низомини жорий қилиш орқали Исломни тўлиқ татбиқ қилишдан иборат. Чунки Ислом ақлий тузум бўлиб, ундан бошқа ҳар қандай тузумни татбиқ қилиш бугунги кризисни янада мураккаблаштиради.
﴿إِن يَنصُركُمُ اللهُ فَلاَ غَالِبَ لَكُم وَإِن يَخذُلكُم فَمَن ذَا الَّذِي يَنصُرُكُمْ مِنْ بَعدِهِ وَعَلَى اللهِ فَليَتَوَكَّلِ المُؤمِنُونَ﴾
«Агар сизларга Аллоҳ ёр бўлса, ҳеч ким сизлардан ғолиб бўлмас. Ва агар сизларни ёрдамсиз қўйса, Ундан ўзга ҳеч бир зот ёрдамчи бўлмас. Мўминлар Аллоҳнинг ўзигагина суянсинлар!» [Оли Имрон 160]
Ҳизб ут-Таҳрирнинг Афғонистондаги матбуот бўлими
