Мирзиёев ҳукумати қай йўл билан мактаб формасини халққа қабул қилдирмоқчи?

بسم الله الرحمن الرحيم

Хабар: Халқ таълими вазири Бахтиёр Саидов умумтаълим мактаблари учун ягона мактаб формасини жорий этиш масаласига доир баёнот билан чиқди. Вазирга кўра, мослашув жараёни учун маълум вақт кераклигини инобатга олиб, ягона мактаб формаси 2025 йилга қадар босқичма-босқич жорий этиб борилади.

“Янги ўқув йили, 2022 йил сентябрь ойидан бошлаб ота-оналар ягона формани харид қилишига мажбурий талаб қўйилмайди ва мактабга ягона формада келмаган ўқувчиларга нисбатан ҳеч қандай эътирозлар билдирилмайди”, деди вазир.

Маҳаллий ҳокимликлар томонидан кам таъминланган оилаларга маҳаллий бюджетнинг қўшимча манбалари ҳамда “Темир дафтар”, “Аёллар дафтари” ва “Ёшлар дафтари” жамғармалари маблағлари ҳисобидан мактаб формаси сотиб олинишига кўмак берилади.

“Шунингдек, ота-оналаримизга алоҳида таъкидлаб ўтмоқчи эдим, мактаб формасини айнан бирор тадбиркордан/корхонадан харид қилиш бўйича мактаб маъмурияти томонидан мажбур этилмайди ва бундай ҳолатга йўл қўйилмайди”, деди вазир.

Изоҳ: Ўзбекистонда мактаб формасини мажбурий қилиш уринишлари Каримов даврида бўлганидек ҳозирда ҳам халқнинг кескин норозилигига сабаб бўляпти. 17 ёшгача бўлган ўқувчи қизларнинг кийиниши билан боғлиқ бу қарор Ислом ҳукмларига ва мусулмон халқнинг эътиқоди ва иффат-номусига қарши очиқ курашни англатгани учун ҳам халқимиз бу сиёсатга бефарқ қарамаяпти. Одатдагидек халқ таълими вазири мактаб формасига доир ҳукумат режасини ўз баёнотида очиқ ифодалади. Мазкур баёнотда Ўзбекистон аҳолиси ўқувчи қизларнинг авратлари очилишига ҳеч ҳам тоқат қилолмаслиги боис ягона мактаб формасига оид қарор ижроси кечиктирилиши айтилди. Бироқ мусулмон аҳолининг бундай Исломий позицияси ҳукумат тарафидан 2025 йилга қадар босқичма-босқич синдирилиши маълум қилинди. Мана шу режага асосан ҳамиятли диндор аҳоли ҳозирда мослашув жараёнида экани айтилди. Ҳукумат бу жараёнда аҳолининг иқтисодий танг аҳволидан фойдаланиб уларга мактаб формасини сотиб олишларида давлат кўмак беришини ва исталган цехда тикилган формалар қабул қилинишини маълум қилди. Ваҳоланки, бу нарса ҳукуматнинг бирдан-бир сабаб қилиб келтирган «мактаб формаси ўқувчилар ўртасида табақаланишни олдини олади» деган ғоясига тамомила зиддир. Эҳтимол, ҳукуматнинг барча баҳонаи сабаблари халқимиз тарафидан бирма-бир пучга чиқарилаётгани учун ҳам шундай тутуриқсиз қарорлар қабул қилинаётгандир. Ҳукумат мактаб формасини жорий қилишдан кўзлаган асл мақсади бошқалиги сабаб юзсизларча 666-қарорни ҳаётга татбиқ қилиш учун турли воситаларни қўллаяпти. «Мактаб формаси ҳақида дангал пост!» номли Исломофобик пост ҳам ҳукумат қўллаган навбатдаги услуб бўлди. Ҳукумат бундай пост ва мақолаларни халқнинг муносабатини ўрганиш, мусулмонларни куфрий фикрларга кўниктириш ва аҳолини диндан узоқлаштириш учун қасддан уюштиради. Ҳукумат бу каби воситалар билан демократик ўзгаришларга ва мактаб формасига хайрихоҳ аҳолини 50 фоизга етказишни мақсад қилади.

Ҳукуматнинг бундай маккор ҳужумларига қарши туришда халқимиз демократик қонуний ҳақларни ўзларига асос қилаётгани энг катта мусибат бўляпти. Чунки бундай позиция динни ҳаёт ишларидан четлатувчи демократиянинг мустаҳкам илдиз отишига замин яратади. Мусулмонлар Роббиси буюрган амалларни бажариши учун демократик ҳақларни талаб қилиши Исломни конституцияга мослашадиган дин ҳолига олиб келади. Пировардида, Ўзбекистон конституциясига зид келувчи Аллоҳнинг ҳукмларини тарк этиш табиий ишга айланади. Бу ўз-ўзидан ҳукуматга конституция орқали Ислом ва мусулмонларни исталган шаклга солиш имконини беради.

Биз юқорида мактаб формасини жорий қилиш учун ҳукумат халқни моддий қўллаб-қувватлашга ваъда бераётганини ва ғаразли ташвиқотлар юритаётганини айтдик. Ҳозирда эса, ҳукумат бу ишлардан кескин фарқ қиладиган ва кечиктирилган барча қарорларни узил-кесил ҳал қиладиган Ўзбекистон тарихидаги энг катта ёмонликни референдум орқали халққа тасдиқлатиб олишга ҳозирлик кўряпти. Бу Ўзбекистонни секуляр, яъни дунёвий давлатга айлантириш режасидир. Янги конституцияда 1-моддадаги “Ўзбекистон – суверен демократик республика” жумласини қуйидагича ўзгартириш таклиф этилмоқда: Ўзбекистон – суверен республика, ҳуқуқий, ижтимоий, дунёвий, демократик давлат. 1-модда ўзгаргач, уни бошқа ҳеч қачон ўзгартирмаслик белгиланмоқда. Бунинг учун 127-моддага (бу моддада Конституцияни ўзгартириш принциплари ёзилган) қуйидагича иккинчи қисм қўшилади: Ушбу Конституция 1-моддасининг ва ушбу моддаси иккинчи қисмининг қоидалари қайта кўриб чиқилиши мумкин эмас!

Мирзиёев ҳукумати янги Конституцияни референдум орқали ўзгартиришга эришса, Ўзбекистон расман дунёвий (секуляр) давлатга айланади. Шунда мактаб формаси дохил кечиктирилаётган барча қарорларни муддатидан аввал жорий қилиш амалга ошади. Чунки дунёвийлик давлатдан Исломий қадриятлардан келиб чиққан ҳар қандай муносабатни кескин рад этишни ҳамда давлат ва жамият масалалари қатори оилаларнинг ички муҳитини ҳам тубдан «шакллантириш»ни талаб этади. Ўзбекистонда кечаётган бундай ўзгаришлар демократиянинг ҳақиқий куфрий башарасини фош қилаётганидан халқимиз огоҳ бўлиши керак. Бу тузумнинг бир кун яшаши унинг қувватланишига, Ислом ва мусулмонларнинг эса, заифлашишига сабаб бўлишини Бухорий авлодлари яхши англашлари керак.

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

07.08.2022й