Муборак ой арафасидаги бидъат

بسم الله الرحمن الرحيم

Ўзбекистон ҳукумати Исломга мутлақо бегона бўлган ва динимиз мусулмонларга ман қилган “байрам”ларни зўр бериб кенг тарғиб қилишда давом этмоқда. Ажабланарлиси, ўз халқининг қийин иқтисодий шароитларини ўнглашга ажратмаётган катта маблағларни “янги йил”, “8 март” каби ношаръий байрамлар учун сарфламоқда. 

Жорий йилнинг 1 мартида президентнинг ПҚ 82-сонли қарорига биноан “наврўз умумхалқ байрами”ни нишонлаш бўйича “йўл харитаси” ишлаб чиқилган бўлиб, унда ушбу “байрам”ни кенг нишонлаш чора-тадбирлари, амалга ошириш механизми, ижро муддатлари, молиялаштириш манбалари ва бу тадбирнинг масъул ижрочилари тайинланди. Ушбу қарорга биноан барча вилоят, туман ва шаҳарларда, қишлоқ ва овулларда сайиллар ўтказиш учун ободонлаштириш ишларига оммавий ҳашарлар ташкил этиш буюрилган. Тайёргарлик ва тадбирлар учун маҳаллий бюджет маблағлари, жисмоний ва юридик шахсларнинг ҳомийлик хайриялари, ташкилотлардаги маблағлар сарфланиши белгиланган.

Бу каби “байрамлар” президентнинг халқ олдидаги ҳиммати қилиб кўрсатилса-да, аслида мустамлакачи Ғарбдаги хожалари қаршисидаги бурчи кабидир. Аҳолисининг тўқсон фоиздан ошиқ қисми мусулмон бўла туриб, Исломий анъаналарга ва Ислом даъвати қаршисига тўсиқлар қўйишда жонбоз раҳбарнинг Исломга бегона бундай бидъатлар учун эътибори кучли экани унчалик ажабланарли иш эмас. Аммо дин уламоларининг бу борадаги сукути ўта ачинарлидир. Уларнинг қандайдир босимлар остида мум тишлаб турганига асло шубҳа йўқ. Лекин Аллоҳнинг олдидаги эртанги жавобгарлик манавиларнинг босимларидан оғирроқдир. Янада ачинарлиси, бундай бидъат, разолат “байрам”ларига шаръий тус бериб, мусулмонларни ҳам жаҳолатга етаклашаётганидир.

Дунё ўзгариш ёқасида тўлғонаётган, Уммат оламий мусибатлар қаршисида бир-бирига талпиниб, ёрдамга шошаётган бир вақтда бу юрт мусулмонларини тоифаларга бўлишга хизмат қилишлари эса, дард устига чипқондир. Улар модомики ўзларини Ҳанафий мазхабиданмиз, дея даъво қилишар экан, ушбу “наврўз”нинг динимизга мутлақо бегона экани ҳақида мазҳаб уламоларининг сўзларидан келтирамиз. Агар улар ўз даъволарида ростгўй бўлсалар Ҳанафий фикҳ мактаби янги йил каби байрамларни рад қилиб, уларни тасдиқлаш куфр, нишонлаш ҳаром, деб қарашини эълон қилишлари лозим эди.

Масалан, “Ал-Фатава ас-Суғро” китобида шундай дейилганини билсалар керак: “Наврўз куни илгари одатланмаган нарсани наврўз байрамини улуғлаб сотиб олган киши катта гуноҳни қилиб, кофир бўлади. Чунки у кофирларнинг байрамларини улуғлади”.  (Имом Абу Ҳанифа роҳимаҳуллоҳнинг “ал-Фиқҳул-Акбар” китобига ёзилган шарҳ: 186).

Ҳанафий мазҳабининг машҳур уламоларидан аллома Мулло Алий ал-Қорий роҳимаҳуллоҳ айтади: “Наврўз байрами куни мажусийга бир тухумни совға қилган одам кофир бўлади. Чунки у мажусийнинг куфри ва залолатига ёрдам берди ёки совға бериши билан уларга ўхшади. Баъзилар: “Мусулмон наврўз байрамида мусулмонга совға берса кофир бўлмайди” демоқдалар. Бу сўзга диққат этиш керак. Чунки бу ишда мажусийларга ўхшашлик бор. Табиийки, қасдсиз (билмай) наврўз байрамига келиб қолган одамнинг ҳукми фарқлидир”. (Бу тўғрида “наврўз” ва “янги йил”нинг фарқи йўқ). Бундан кўриниб турибдики, ҳукумат мазҳабни ниқоб қилиб олиб, мазҳабпарастликни илгари суриш орқали динимизга қарши курашмоқда, холос. Бунда улар кофир хўжайинларига эргашишмоқда ёки бўйсунишга мажбурланмоқда. Шу боис устимиздаги барча раҳбарият ва уларнинг ношаръий ишларига “шаръий тўн” кийдирувчи бечоралардан юз буриб, халққа холис сўзимизни етказамиз.

Эй мусулмонлар! Ўзингизга маълумки, янги йил, наврўзни байрам қилиш ҳаром, унга пул сарфлаш исрофдир. Шундай экан, кофир хўжайинларига эргашган ва популистик ҳаракатлар билан ҳокимиятга ёпишиб олган раҳбарларга эргашиб, мўминни дўзаҳга олиб борадиган вазиятни пайдо қилманг, бундай мункарларга – улар йўқ бўлгунига қадар – қарши курашинг!

Муборак Рамазон ойи эшик қоқаётган шу кунларда Роббул Оламинни ғазаблантирувчи бидъатдан юз ўгиринг! Зеро, Ҳақдан кейин фақат залолатдир, холос!

فَمَاذَا بَعْدَ الْحَقِّ إِلَّا الضَّلَالُ فَأَنَّىٰ تُصْرَفُونَ

– “Ҳақиқатдан кейин эса фақатгина йўлдан озиш бор, холос (яъни ҳақиқий Парвардигорингиз бўлмиш Аллоҳдан ўзгага сиғинар экансиз, албатта йўлдан озган бўлурсиз). Бас, қай тарафга бурилиб кетмоқдасизлар?!”        (Юнус:32)

Ҳизб ут-Таҳрирнинг Ўзбекистондаги матбуот бўлими аъзоси Зайниддин

21.03.2023й