Матбуот баёноти

Уммат устави сохта демократиядан эмас, соф Ислом ақидасидан балқиб чиқади!

Ал-Жазира телеканалининг 2024 йил 19 октябрдаги хабарига кўра, Сараево шаҳрида ўзларини араб зиёлилари деб таърифлаган бир гуруҳ кишилар «Араб демократияси… Араб демократияси сари йўл харитаси» номли шубҳали анжуман ўтказдилар.

Ҳурматли зиёлилар!

Эски араб мақолларида «Ким синалган нарсани синаса, пушаймон бўлади», деган мақол бор. Биз ақлирасо инсонларга «Синалган нарса яна синаб кўрилмайди», деган умумий қоидани татбиқ қилишлари вақти келганини эслатмоқчимиз. Бу гап аввало конференциянинг ташаббускори бўлмиш собиқ Тунис президенти Мунсиф Марзуқийга тегишли. Дарҳақиқат, у 2011 йилдаги Жасмин инқилобидан кейин Тунисда демократияни синаб кўриб, ўз мамлакатини катта ҳалокатга тортган эди. Тунисдаги ҳозирги вазият, яъни Қайс Саиднинг ҳокимият тепасига келиши унинг айни тажрибаси натижасидир. Биз ундан қуйидаги саволга самимий жавоб кутиб қоламиз: демократия мамлакатдаги вазиятни яхшиладими ёки янада ёмонлаштирдими?! Миср, Яман, Сурия, Ироқ, Малайзия, Иордания ва бошқа мамлакатларда ҳам шундай.

Балки Марзуқий ва бошқалар – биз ҳақиқий демократия билан шуғулланмадик, уни татбиқ қилишимизга имкон бўлмади, шунинг учун унинг муваффақиятли ёки муваффақиятсиз деб айтолмаймиз, дейишар эҳтимол. Шу ўринда конференция иштирокчиларига яҳудий (демократик) вужуди томонидан Ғазо ва Ливанда содир этилган жиноятларга гувоҳ бўлганликларини ва бу вужуд Ғарб Яқин Шарқдаги ягона демократик давлат сифатида мақтанадиган вужуд эканини эслатиб ўтамиз. Хўш, бу демократия қирғин, вайронагарчилик ва харобалардан бошқа нима олиб келди?!

Наҳотки бу зиёлилар мавжуд тизимларнинг ва шу тизимлардан келиб чиққан халқаро ташкилотларнинг нақадар иллат ва сохта эканини кўра олмаётган бўлишса?! Наҳотки демократик давлатларнинг зулм ва мустамлакачиликдан қутулмоқчи бўлган халқларга, айниқса, мусулмон халқларга қарши уруш олиб боришдан бошқа ташвиши йўқлигини ҳам билишмаётган бўлса?

Айни шубҳали конференцияда тўпланган зиёлиларнинг иддаосича, «ечим эскилик сарқитларидан узоқлашиш ва халқнинг демократия, адолат ва миллий озодликка интилишларини қондирадиган реал камчиликлар ҳақида тафаккур қилишда давом этиш»дан иборат эмиш. Шу ерда савол берамиз: халқлар номидан гапиришга сизга ким қўйди ва уларнинг демократияга интилаётганини даъво қилиш билан адаштиришга нима ҳаққингиз бор?! Бу халқлар мусулмон халқлардир, уларнинг покиза ақидаларидан Аллоҳ бутун оламга раҳмат, барча инсонларга ҳидоят қилиб нозил қилган кенг қамровли мукаммал ҳаёт тузуми балқиб чиқади, демократия келиб чиқмайди. Зеро, инсониятни залолатга етакловчи демократиянинг муваффақиятсизлигини, бузғунчилигини ва ёмонлик олиб келишини бутун дунё гувоҳи бўлди ва бунга демократия ҳукм сурган ва оламни инсон ўйлаб топган қонунлар билан бошқарган бир аср давомида амин бўлди. Демократик қонунлар ер юзининг чор атрофида хавотир ва даҳшатлар келтириб чиқарди, уруш оловларини ёқди, халқларни қочқинга айлантирди, халқни оч қолдирди, буларнинг барчасини азбаройи ер юзидаги бойликларни бечоралар ҳисобига талон-торож қилиш учун қилди! Аллоҳ Субҳанаҳу ва Таоло айтади:

﴿أَفَحُكۡمَ ٱلۡجَٰهِلِيَّةِ يَبۡغُونَۚ وَمَنۡ أَحۡسَنُ مِنَ ٱللَّهِ حُكۡمٗا لِّقَوۡمٖ يُوقِنُونَ﴾

«Динсизлик ҳукмрон бўлишини истайдиларми?! Иймонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!»                     [Моида 50]

Ҳурматли зиёлилар, Фаластин ва бошқа жойларда Ислом Умматининг қурбонликларидан фойдаланиш сизларга бу одамлар номидан гапириш ваколатини бермайди. Чунки сиз демократияни танлаб, Исломдан юз ўгирдингиз, халқнинг эътиқодини ҳаётидан узиб қўйдингиз. Шуни билингки, Ғазодаги мужоҳидларга «демократия ва бирликда яшаш инсони» шиори остида тақдим этилган сохта медаллар керак эмас! Чунки улар жонларини Аллоҳнинг калимасини олий қилиш учун қурбон этмоқдалар, жирканч демократия учун эмас. Ғазодаги бу даҳшатли уруш демократларнинг мусулмонларга қарши қандай ҳамкорлик қилганликларини, яҳудийларнинг тажовузи ва зулмларини қандай қўллаб-қувватлаганликларини бутун дунёга яққол кўрсатди.

Ҳурматли зиёлилар!

Сиз халқларни адаштирганингизга ўзингиз гувоҳлик беряпсиз ва буни тан оляпсиз. Қаранг, Марзуқий ўз баёнотида бундай деб турибди: «Айни геноцидда Ғарб режимлари билан бўлган тил бириктирув мавжуд. Бу эса араб халқларнинг демократияга нисбатан ишончларининг йўқолишига олиб келди. Одамлар демократияни бутунлай ишончдан чиққан Ғарб идеологияси эканини англаб етишди». Таваккул Кармон ҳам бундай деган: «Бу Ғарб режимларининг мўртлиги унинг мусулмонларни ёмон кўриши, уларга ирқчилик қилиб, қочқинларга душманлик қилиши тўлқинида фош бўлди. Бугунги режимлар, шунингдек, Ғазо ва Фаластинни қўллаб-қувватлаган талабаларни бостириш ва қамоққа ташлаш билан эркинликлар имтиҳонидан ўтиша олмади». Сиз зиёлилар залолатга тушдингиз ва Ислом Умматидан ажралиб, хомхаёлларга бордингиз, бунга юқоридаги гувоҳликлар кифоя.

Бас, қандай демократия ҳақида гапиряпсиз?! Қандай демократияни татбиқ қилмоқчисиз?!

Демократия, қисқа қилиб айтганда, куфр тузумидир, Исломга умуман алоқаси йўқ. Унга чақираётган ва унинг татбиқ қилинишини талаб қилаётган ҳар бир кимса шубҳали ва адаштирувчи ҳисобланади. Чунки Уммат ўз иззат-шаънини Ислом билан, Аллоҳнинг нусрати билан қайтариб олишга интиқ бўлиб турибди. Биз Аллоҳга ёрдам берсак, Аллоҳ Таоло ҳам Пайғамбарлик минҳожи асосидаги Рошид Халифалик давлатида бирлигимизни таъминлаб, Ўз динига ёрдам беради. Шунинг учун биз сизни эс-ҳушингизни йиғиб олиб, Ислом ва унинг тузумига қайтишга даъват қиламиз. Чунки Халифалик тузумигина ҳақ, бошқа тузумлар ботилдир.

﴿الٓمٓرۚ تِلۡكَ ءَايَٰتُ ٱلۡكِتَٰبِۗ وَٱلَّذِيٓ أُنزِلَ إِلَيۡكَ مِن رَّبِّكَ ٱلۡحَقُّ وَلَٰكِنَّ أَكۡثَرَ ٱلنَّاسِ لَا يُؤۡمِنُونَ﴾

«Алиф, Лом, Мим, Ро. Ушбулар Китоб оятларидир. (Эй Муҳаммад), сизга нозил қилинган бу нарса (яъни Қуръон айни) ҳақиқатдир. Лекин одамларнинг кўплари иймон келтирмайдилар»         [Раъд 1]

Ҳизб ут-Таҳрирнинг марказий матбуот бўлими