Яқин Шарқ: АҚШнинг геосиёсий лойиҳалари ва (Исроил) марказли янги тартиб

بِسْمِ اللهِ الرَّحْمٰنِ الرَّحِيمِ

Яқин Шарқ – инсоният тамаддунининг (цивилизация) бешиги, уч буюк самовий диннинг маркази ва дунёнинг стратегик “юрак” қисмидир. Ушбу минтақада нафақат дунё нефть захираларининг қарийб ярми борлиги айтилади, балки бутун дунё мусулмонларининг нигоҳи ва эътибори марказида бўлган муқаддас замин сифатида беқиёс аҳамиятга эга. Бу ерда Исломнинг муқаддас уч ҳарамидан бири – Масжиди Ақсо жойлашган бўлиб, минтақадаги ҳар бир ўзгариш икки миллиардлик Умматнинг қалбида акс садо беради.

АҚШ бошчилигидаги Ғарб оламининг бу минтақага ёпишиб олиши замирида нафақат иқтисодий манфаат, балки чуқур сиёсий қўрқув ётади. Буни Ғарб етакчиларининг ўзлари ҳам очиқ тан олишган. Масалан, АҚШнинг собиқ Президенти Ричард Никсон ўз вақтида: “Мусулмон дунёси бойликлари ва мафкураси (Ислом) бирлашса, бу Ғарб учун энг катта хавф бўлади”, – деб таъкидлаган эди. Шунингдек, Британиянинг собиқ Бош вазири Тони Блэр Яқин Шарқдаги исломий уйғонишни “Ғарб қадриятларига таҳдид солувчи сиёсий идеология” деб атаган. Ғарб стратегик таҳлил марказларининг (масалан, RAND Corporation) хулосаларига кўра, Яқин Шарқ – Сиёсий Ислом қайта татбиқ қилинадиган ва Халифалик қайта тикланадиган бошланғич нуқтадир. Айнан шу “исломий хавф” ва бойликлар устидан назоратни сақлаб қолиш учун Вашингтон қуйидаги маккорона лойиҳаларни амалга ошириб келмоқда:

Иқтисодий лойиҳа: IMEC ва энергия қарамлиги занжири

2023 йил сентябрь ойида Нью-Деҳлида бўлиб ўтган G20 саммитида АҚШ Президенти Жо Байден IMEC (Ҳиндистон — Яқин Шарқ — Европа) иқтисодий йўлагини “ўйин қоидаларини ўзгартирувчи тарихий қадам” деб эълон қилди. Ушбу стратегик лойиҳа Ҳиндистонни БАА, Саудия Арабистони ва Иордания орқали бевосита Исроилнинг Хайфа портига боғлашни назарда тутади. Диққатга сазовор жиҳати шундаки, 2023 йил бошида Хайфа порти Ҳиндистоннинг Adani Group ширкати томонидан 1,2 миллиард долларга сотиб олинган эди. Бу эса минтақавий савдо йўлагининг якуний поғонаси тўлиқ яҳудий вужуди ва унинг яқин шериклари назоратида бўлишини кафолатлайди.

Шу билан бирга, АҚШ минтақада мусулмон ўлкаларини яҳудий вужудига иқтисодий жиҳатдан боғлаб қўйишнинг “энергетик занжири”ни ҳам изчил амалга оширмоқда. Бунга яққол мисол сифатида 2020 йилда имзоланган 15 миллиард долларлик шартномани келтириш мумкин, унга кўра (Исроил) Мисрга табиий газ етказиб беришни бошлади. Гарчи АҚШ Давлат департаментининг Энергетика ресурслари бюроси буни “минтақавий интеграция ва барқарорликни кучайтириш” деб баҳоласа-да, амалда бу мусулмон ўлкаларининг энергетик хавфсизлигини яҳудий вужуди эгаллаб олган “Левиафан” каби газ конларга маҳкам боғлаб қўйиш лойиҳасидир. Бундай иқтисодий ва энергетик қарамлик минтақа давлатларининг сиёсий иродасини жиловлаш ва уларни (Исроил) манфаатлари билан ҳисоблашишга мажбур қилиш учун хизмат қилмоқда.

Сиёсий ва ҳарбий лойиҳалар: “Иброҳим келишувлари” ва MEAD альянси

АҚШнинг Яқин Шарқдаги стратегияси “Иброҳим келишувлари” орқали мусулмон ўлкалари ва яҳудий вужуди ўртасидаги мафкуравий тўсиқларни йўқ қилишга қаратилган бўлиб, бу шунчаки дипломатия эмас, балки мусулмонларни Ислом умматидан кўра яҳудий вужудини яқинроқ иттифоқчи деб билишга мажбурлаш лойиҳасидир. Ушбу келишувларнинг ҳарбий пойдевори сифатида АҚШ собиқ Мудофаа вазири Ллойд Остин MEAD (Middle East Air Defense) тизимини “минтақавий мудофаанинг янги даври” деб эълон қилди. Ушбу альянснинг стратегик моҳияти 2024 йил 13 апрелда Эроннинг (Исроил)га ракета ҳужуми пайтида амалда ўз исботини топди: АҚШ Марказий қўмондонлиги (CENTCOM) Иордания ва Саудия Арабистони ҳаво ҳудудларидан фойдаланган ҳолда 80 дан ортиқ дронларни уриб туширганини расман тасдиқлади. Бу воқеа мусулмон давлатларининг ўз ҳарбий салоҳияти ва ҳаво ҳудудларини Уммат душманини ҳимоя қилиш учун сафарбар этганини кўрсатувчи тарихий ва аччиқ фактга айланди.

Сурия ва Ироқ: Ресурслар талон-тарожи ва “Доллар занжири”

АҚШнинг Сурия ва Ироқдаги сиёсати “парчалаб ташла ва бошқар” тамойилига асосланган бўлиб, бу ҳатто 2024 йилда Асад режими ағдарилганидан кейин ҳам ўзгаришсиз қолди. Сурия Нефт вазирлигининг расмий маълумотларига кўра, АҚШ ҳарбийлари мамлакат шарқидаги (Ал-Ҳасака ва Дайр аз-Зор) нефть конларининг қарийб 80 фоизини ҳамон ноқонуний назорат қилмоқда. АҚШ собиқ Давлат котиби Энтони Блинкен Асаддан кейинги даврда ҳам қўшинларнинг Сурияда қолишини “терроризмга қарши кураш” ва “барқарорликни таъминлаш” билан изоҳлади, бироқ амалда бу ресурслар янги шаклланаётган ҳукуматни Ғарб иродасига бўйсундириш учун асосий босим воситаси бўлиб хизмат қилмоқда.

Ироқда эса АҚШ “молиявий колониализм” тизимини ўрнатган: Ироқ нефтидан тушадиган ҳар бир доллар аввал Нью-Йорк Федерал резерв банкидаги ҳисоб рақамига тушади. 2023 йилда АҚШ Ғазначилиги Ироқнинг бир қатор банкларига доллар транзакцияларини тақиқлаши ортидан мамлакат иқтисодиётида юзага келган кескин инқироз, Вашингтоннинг Ироқ суверенитетини “доллар занжири” билан жиловлаб турганини исботлади. Ироқ Бош вазири Муҳаммад Шиа ал-Суданий АҚШ қўшинларини чиқариш ҳақида баёнот берган бўлса-да, АҚШ маъмурияти буни “узоқ муддатли ва мувофиқлаштирилган жараён” деб атаб, “Айн ал-Асад” каби стратегик базалар орқали минтақадаги исломий уйғониш ҳаракатларини назорат қилишда давом этмоқда.

Дипломатик тузоқ: “Икки давлат” ечими ва вақтдан ютиш стратегияси

Ғарб дипломатиясининг энг катта манипуляцияси бўлган “Икки давлат ечими” аслида яҳудий вужуди ишғолини кенгайтириш учун ишлатиладиган сиёсий ниқобдир. Жо Байден маъмурияти минбарлардан “мустақил Фаластин давлати” ҳақида баёнотлар бераётган бир пайтда, амалда 2024 йилда (Исроил)га 14 миллиард долларлик қўшимча ҳарбий ёрдамни тасдиқлади. (Исроил)нинг Peace Now ташкилоти ҳисоботларига кўра, АҚШ “тинчлик” ҳақида гапираётган бир даврда, босиб олинган ҳудудларда яҳудий турар-жойлари қурилиши рекорд даражада (тахминан 20 фоизга) ошган. Бу АҚШнинг асл мақсади Фаластин давлатини тузиш эмас, балки Фаластин ерлари тўлиқ ютиб юборилгунча мусулмон оламини “сароб” билан овутиб, яҳудий вужудининг ишғолини легитимлаштириш учун вақт ютиб бериш эканини очиқ-ойдин намоён этади.

Хўш, Уммат учун ягона чиқиш йўли қандай?

АҚШнинг минтақадаги барча стратегик қадамлари – иқтисодий қарамликни таъминловчи IMEC йўлагидан тортиб, Суриядаги нефт ресурсларини талон-тарож қилиш ва Ироқдаги молиявий босим механизмларигача – ягона бир стратегик мақсадга хизмат қилади: Ислом Умматининг сиёсий бирлиги ва Халифалик давлати қайта тикланишига йўл қўймаслик. Ғарб чизган сунъий чегаралар ва улар томонидан жорий қилинган халқаро тизимлар мусулмонларни фақат заифлаштириш, уларни бир-бирига қарши қайраш ва минтақанинг беҳисоб бойликларини яҳудий вужудининг хавфсизлиги ҳамда Ғарб иқтисодиётининг равнақи учун сарфлашга қаратилгандир.

Мақола давомида келтирилган фактлар ва расмий баёнотлар шуни кўрсатадики, АҚШ учун “демократия” ёки “инсон ҳуқуқлари” шунчаки мустамлакачиликни пардаловчи ниқобдир. Ҳақиқий иззат ва ҳақиқий мустақиллик Ғарбнинг “тинчлик режалари” ёки халқаро ташкилотларида эмас, балки Умматнинг ўз динига – Исломнинг адолатли низомига қайтишидадир. Мусулмонлар учун ягона нажот йўли – мустамлакачилар чизган “миллий манфаат” деган кичик дунёқарашлардан воз кечиб, ягона раҳбар – Халифа  атрофида бирлашиш ва Ғарбнинг сиёсий, ҳарбий ҳамда иқтисодий таъсирини минтақадан бутунлай супуриб ташлашдир. Зеро, бугунги инқирозлар Умматнинг қалқони ва сиёсий иродаси бўлмиш Халифаликнинг йўқлиги натижасидир.

وَاللَّهُ غَالِبٌ عَلَىٰ أَمْرِهِ وَلَٰكِنَّ أَكْثَرَ النَّاسِ لَا يَعْلَمُونَ

– “Аллоҳ Ўз ишида ғолибдир, лекин одамларнинг кўплари (буни) билмайдилар”.  (Юсуф:21)

Салоҳиддин

07.01.2026й