بِسْمِ اللَّـهِ الرَّحْمَـٰنِ الرَّحِيمِ

Роя газетаси:

Америка-Эрон ўртасидаги душманлик бир ёлғондир

Вашингтон Саудия ва Туркияга қарши Теҳроннинг ёнини олганини эронлик бир дипломат эътироф этди

Эроннинг мухазрим (икки даврни кўрган) дипломатининг эътироф этишича, АҚШ собиқ президенти Барак Обама Саудия ва Туркияга қарши Тэҳроннинг ёнини олган. У, Обаманинг президентлик муддати тугаб, Доналд Трамп ҳокимиятни эгаллаганидан кейин Эрон оғир кунларни бошдан кечиришини айтди.

Хаффингтон Пост сайтига кўра, Руҳоний ҳукуматига яқин «Шарқ» газетасида Эрон ташқи ишлар маслаҳатчиси, БМТнинг Женева бюросидаги собиқ Эрон элчиси доктор Сайидали Хуррамнинг мақоласи чоп этилган. Хуррам ўз мақоласида таъкидлашича, «Барак Обама ўзининг ўтган саккиз йиллик президентлик даврида Исроил, Саудия ва Туркия давлатлари бўйнига арқон солиб, уларнинг Эронга душманлик қилиш ҳақида ўйлашларига ҳам йўл қўймаган». Хуррам Обаманинг мажбур бўлгани сабабли Ядровий битимга имзо чекканини инкор қилиб, жумладан бундай деди: «Обама Эронга қарши сиёсий, иқтисодий босимлар ва ҳарбий таҳдидларни кучайтириб, унинг куч-қудратини беҳуда совуришга қодир эди, аммо у бундай қилмади». (Ал-Ваъй журнали 364-сон).

Роя газетасининг 2017 йил 22 март чоршанба кунги 122-сонидан