بِسْمِ اللهِ الرَّحْمنِ الرَّحِيمِ

 Қачонгача халқни алдайсизлар?

Олий Мажлис Қонунчилик палатаси депутати Раъно Гаимова, “Халқ сўзи” интернет газетасида, “Қишлоқ тараққий топса, юрт обод бўлади” мавзусида эълон қилинган мақоласида, Ўзбекистоннинг бугунги кундаги воқелигига “ҳолис” лик билан баҳо берибди. Бу мақолада жумладан шундай дейилади:

“Юртбошимиз мустақилликнинг йигирма уч йиллигига бағишланган тантанали маросимдаги табрик сўзида алоҳида таъкидлаганидек, йиллар ўтиши билан, олдимизга қўйган буюк мақсадлар сари юришимизда чуқур ва атрофлича ўйланган, халқаро майдонда “ўзбек модели” деб тан олинган демократик ислоҳотлар йўли нақадар тўғри эканини ҳаётнинг ўзи оқлаб, исботлаб бермоқда ва бу ҳақиқатга бизга хайрихоҳ бўлмаган мутахассис ва экспертлар, тегишли халқаро институтлар ҳам иқрор бўлмоқда.

Мустақил тараққиёт давомида мамлакатимиз иқтисодиёти тахминан 5 карра, аҳоли жон бошига ҳисоблаганда 3,7 мартага ўсгани, жон бошига олинадиган даромадлар эса 8,7 баробар кўпайгани бунинг тасдиғидир. Жорий йилнинг дастлабки олти ойида қишлоқ жойларда намунавий лойиҳалар бўйича якка тартибдаги уй-жойлар қурилиши дастурини амалга ошириш доирасида 1,3 триллион сўмлик инвестиция ўзлаштирилгани, янги қишлоқ массивларида намунавий лойиҳалар асосида бунёд этилган 4486 якка тартибдаги уй-жой фойдаланишга топширилгани бунга яна бир мисолдир.

Энг муҳими, қишлоқ аҳолиси ҳар жиҳатдан мукаммал турмуш шароити муҳайё қилинаётганидан жуда мамнун. Дунёнинг кўплаб давлатларида жаҳон молиявий-иқтисодий инқирози асоратлари ҳамон кузатилаётган, ижтимоий муаммолар тобора кескинлашиб бораётган бир пайтда бизда амалга оширилаётган бундай чора-тадбирлар кўпчиликнинг ҳавасини келтираётгани ҳам бор гап.”

Ҳурматли депутат хоним! Шу гапларингизга ўзингиз ишонасизми? Бу гапларингизнинг неча фоизини тўғри деб ҳисоблайсиз, 10% ними, 20% ними, 50 ёки 100% ними? Агар ҳеч бўлмаганда тўртдан бири, яъни 25% рост бўлганда ҳам, ҳа ҳарқалай ичида ҳақиқатга яқин бўлганлари ҳам бор эканку, деб индамай қўя қолар эдик.

Сиз айтаётган ўша “ўзбек модели” қайси мутахассис ва экспертлар томонидан тан олинди? Ҳақиқий эксперт қандай бўлади? Мабодо энг зўр эксперт бу халқ эмасми? Ҳақиқий баҳони шу халқ бермайдими ҳукумат сиёсатига? Қачонгача уч-тўртта чет элликнинг мақтовини 30 миллионлик халқнинг номидан ҳеч уялмай гапириб юбораверасизлар?

Мамлакат иқтисодиётига келсак, сиз халқнинг даромади ошганини инобатга олибсизу, лекин пул қадрсизланиши, ишсизлик, солиқларнинг юқорилиги, монополия, иқтисодий чекловлар ва бошқа охири кўринмаётган муаммоларни атайлаб эътиборсиз қолдирдингизми? Ҳатто ўша сиз айтаётган халқ даромадининг ошиши ҳам, асосан халқимиз чет элларга бориб, ишлаб топиб келаётган пуллари эвазига бўлаётганини биласизми? Ҳукумат эса бу пулларни халққа биз бердик, деб кўкрак кераётганиничи? Сизни ҳам тушуниш мумкин, бу муаммоларни кўтарсангиз, нафақат мақолангиз эълон қилинади, балки ўзингиз ҳам депутатликдан “учирма” бўлишингиз тайин.

Сизга яна бир савол. Бирор марта бўлса ҳам уйингизда свет ўчганми? Бирор марта бўлса ҳам газ ўчиб, ўчоқда овқат пиширганмисиз? Ёки кўрганмисиз бирорта оилада шундай ҳолат бўлганини? Аминманки, бундай бўлмаган, агар шундай бўлганида, сиз қишлоқдаги шароит ҳақида бемалол уларнинг номидан гапирмаган бўлар эдингиз.

Хулоса ўрнида шуни айтмоқчиманки, ўша сиз сиғинаётган Каримов бир пайтлар халқимиз ҳақида шундай гапларни гапирган эди: “Бизнинг шундай оқибатли, бағрикенг халқимиз борки – мен буни такрор ва такрор айтишдан чарчамайман – агарда унинг меҳри ва ишончини қозонсангиз, у ҳам сизга юрагини очиб беради”. Каримов ўшанда халқимизнинг соддалигидан фойдаланиб, уни алдади ва халқимиз унга юрагини очди. Лекин Каримов уларга ҳиёнат қилди ва беғубор халқимиз устидан ҳозиргача кулиб келмоқда.

Бу ҳақиқатни ўзингиз ҳам яхши биласиз, чунки депутатлар аслида нималар бўлаётганини оддий халқдан кўра яхшироқ биладилар. Шундай экан, сиз ва бошқа Каримовни улуғлаб, унга сиғинувчиларга айтамизки, сиғинишга ва қуллик қилишга арзигулик ёлғиз Аллоҳдан бошқа зот йўқдир. Зеро, ҳаммамиздан охиратда Каримов эмас, Аллоҳ Таъоло ҳисоб сўрайди.

Ҳизб ут-Таҳрирнинг Ўзбекистондаги медиа офиси Фаррух

13.09.2014й.