АҚШнинг Суриядаги сиёсий ечимлари аниқ далилларга ва очиқ ҳақиқатга эга
بِسْمِ اللهِ الرَّحْمٰنِ الرَّحِيمِ
АҚШнинг Суриядаги сиёсий ечимлари аниқ далилларга ва очиқ ҳақиқатга эга
Устоз Носиршайх Абдулҳай
Ҳизб ут-Таҳрирнинг Суриядаги
марказий алоқалар қўмитаси аъзоси
Салибчи руслар учоқлари, ғаразгўй Эрон жангарилари ва унинг Ливандаги Ҳизби билан қўллаб-қувватланган тоғут Асад режимининг ҳар бир ваҳшиёна ҳужуми ортидан БМТ минбарларида Американинг «сиёсий ечим»и ҳақидаги гаплар кўпаяди.
Хўш, бу сиёсий ечимдан мақсад нима, бу фикр қаердан келди, унинг ортида ким турибди, ундан қандай мақсад-ғоялар кўзланган, у қўзғолон манфаатига хизмат қиладими, юрт аҳли азоб-уқубатлари ва берган қурбонларига якун ясаб, уларнинг фарзандлари қирғин қилингани, уй-жойлари вайрон этилгани, гўдаклари таналари сочиб ташлангани учун интиқом оладими ёки Шом қўзғолонининг ғалаба қозонишидан қўрқаётган ғарблик душманлар томонидан қўллаб-қувватланувчи қонхўр режим фойдасига хизмат қиладими?!
Америка Шом қўзғолони бошланган пайтдаёқ ўз малайи Башар Асадга уни бостириб, йўқ қилишга буюрди. Бироқ қўзғолоннинг бели бақувватлигидан ва қўзғолончиларнинг қадами собитлигидан Америка Шом қўзғолони минтақадаги бошқа қўзғолонлардан фарқ қилишини англади. Англаб етгач, ўзига малай бўлган ва Сурия халқига душман саналган ҳукмдорларга роль бўлишиб берди. Бу ҳукмдорларнинг миссияси зўравонлик, қатли ом ҳамда Шом аҳлининг уй-жойларини вайрон этиб, уларни қочқинга айлантириш бўлди. «Дўст» ҳукмдорлар эса, Американинг малайи Башар режимини йиқилишдан сақлаб қолиш учун қўзғолонни жиловлаш ҳамла қўзғолон аҳлини талабларидан чалғитиб, мустақил қарорларини ўғирлаш миссияси билан машғул бўлиб келди.
Қўзғолон бошлангандаёқ жанг майдонидаги етакчилар ва холис қўзғолончилар босим остида қолдилар. Бу – Женева қарорларига, режим билан музокара қилиш принципига ва бошқа ҳар қандай келишувга рози бўлишлари учун ўтказилган босим эди. Чунки буларга рози бўлиш, эски давлат билан унинг Шом аҳлини эзиб келган хавфсизлик ва ҳарбий ташкилотларини сақлаб қолишга олиб келади. Давлатнинг аввалгидек Америкага тобе бўлиб, унинг нуфузини ҳимоя қилишда давом этишини таъминлайди. Бу ерда пирамида тепасидаги кимсанинг қолиш ёки кетишининг аҳамияти йўқ. Чунки Америка уни шахс сифатида ушлаб тураётгани йўқ, балки альтернативанинг пишиб етилгунига қадар ушлаб турибди, пишиб етилгач, сайловлар саҳнаси қўйилади-да, Башар майдондан чиқариб юборилади, бу билан қўзғолонда йиқилган ҳисобланмайди, сайловдан ўтолмаган бўлади, холос.
Қўзғолончилар қўзғолон бошланган илк даврларда Башар режими билан музокарага ўтиришни жиноят ва хиёнат, деб билдилар. Шунинг учун қўзғолон душманлари ҳам ҳарбий, ҳам маънавий кучлардан фойдаланган ҳолда, муғомбирлик йўлини тутишди. Яъни, аввалига хиёнат бўлган ярашиш ва музокара – энди, сиёсий тажриба ва қон тўкишга айлантирилди!
Буларнинг барчасидан қўзғолонни жиловлаш ва мураккаб тус олмасидан олдин бўғизлаб ташлаш мақсад қилинди.
Шунинг учун Америка сиёсий ечимга тинмай чақирадиган бўлди. Ушбу заҳри қотил ечимнинг биринчи фасли 2012 йил «Женева-1»дан бошланди, сўнг унинг Вена, Риёз, Москва, Остона ва Сочи каби навбатдаги фасллари бўлиб ўтди. Зоҳирдан қараганда раҳмдиллик, аммо аслида азоб ҳисобланган бу ечимдан мақсад, қўзғолонни йўқ қилиш, қонхўр режимни сақлаб қолиш, орасига бошқа давлатлар ва уларнинг разведкалари қўйнига кирган сохта мухолафатни қўшиш, Сурия конституциясига бир оз ўзгартишлар киритиб, илмонийлигини сақлаб қолиш бўлди. Чунки у илмоний бўлса, Аллоҳнинг шариатини ва Ислом бошқарувини четга чиқариб, уни давлат соясида татбиқ қилишга чақирган ҳар бир инсонга қарши курашади.
Туркия эса, Шомда қўзғолонимиз аланга олгандан бошлаб, унга қарши тил бириктирувчилар инига айланди. Исломни ич-ичларидан ёмон кўрадиган ва Шом қўзғолонининг ғалабасидан қўрқадиган халқаро разведка жосуслари Туркияда тўпланиб, қўзғолончиларга қарши макр тўрини тўқишди, жангчи гуруҳлар етакчилари ва нуфузли кишиларни тўғри йўлларидан адаштириш учун уларни жирканч пуллар билан сотиб олиш устида ишлашди.
Сиёсий жиҳатдан, Америка Туркия раҳнамолигида илмоний миллий коалиция тузишни буюрди. Бундан қўзғолонга сиёсий тус бериш ҳамда уни душманга сотиб, тинчлик, ярашув, музокара ечимлари ва ёлғон сиёсий ечим орқали қўзғолон масаласини сохталаштириш кўзланди.
Демак, сиёсий, дея даъво қилинган бу ечимдан, жиловлаш орқали қўзғолонни йўқ қилиш, унинг халқчиллигидан айриш ва таркибидаги мавжуд энергиясини сўндириш мақсад қилинган. Токи, Шом қўзғолонида ҳам Миср, Тунис, Ливия ва Ямандаги аламли тажрибалардан фойдаланилсин. Яъни, ушбу юртлардаги ҳолат режим арконларини сақлаб қолиб, баъзи сиёсий башараларни ўзгартириб қўйишдан иборат бўлган. Барчамиз бу қўзғолонлар тақдирини яхши биламиз.
Шундай қилиб, қирғин ва вайронагарчиликлар, гуруҳларнинг оғзини ёпиш, ҳукуматларнинг, асосан «Инқоз» ҳукуматининг одамларга босим қилиши, уларнинг пешона терлари билан аранг топган бир бурда нонларини ҳам тортиб олиш, зиммаларига солиқ ва тўловлар юклаш каби… Шом аҳли бошига шунча азоб-уқубатларни солишдан мақсад битта. У ҳам бўлса, барчаларини мағлуб қилиб, тиз чўктириб, мана шу «сиёсий» ечимга рози бўлишга мажбурлашдир. Аслида, у «қўллаб-қувватловчи» давлатлар буйруғи билан «сиёсий ечим», дейилган, аслида эса, таслим бўлиш ечими ҳисобланган ечимдир.
Тўққиз йилдан буён АҚШ, Европа, Туркия, Россия ва Эрон Суриядаги ечим сиёсий ечимдир, деб келишяпти! Аммо қандай сиёсий ечим тўғрисида гапиришяпти?!
Уларнинг сиёсий ечим, дегандаги ниятлари Американинг заҳри қотил ечимларини Шом мусулмонларига зўрлаб ўтказишдир. Буни эса, ҳарбий йўл билан зўрлаб тиқиштиришяпти, масалан, самолётлар, замбараклар, ракеталар, рус салибчилари ва Асад Нусайрилари ҳужумлари билан амалга оширишяпти. Турк режими бўлса, сиёсий макрлар қилиб, жангчи гуруҳларнинг қурол-аслаҳасини ўз назорати остига оляпти… Гуруҳлар етакчилари эса, «қўллаб-қувватловчи» давлатлар билан алоқа қилиб, уларнинг амрларига итоат қилишяпти!
Сиёсий ечим тафсилотларига қайтадиган бўлсак, у Хавфсизлик Кенгашининг 2118 билан 2254 рақамли резолюциясига ҳамда шу резолюцияга алоқадор қарорларга асосланган. Зеро, уларда қўзғолонга якун ясаш, якун ясалиши ортидан анави қонхўр режимга қарши ҳар қандай ҳужумни олдини олиш, шунингдек, ўтиш даври бошқаруви тадбирларини бошлаш кўзда тутилган. Бу тадбирларга кўра, меҳмонхона мухолафатчилари ва шу босқичга тайёрланиш учун ўзларини «бўлиниб чиққан»ликларини даъво қилаётган кимсалар айни бошқарувда режим билан ҳамкорликда ҳукм юритишади. Шармандаликлари билан ҳамманинг кўнглини зада қилган бу ҳайъатга Башар Асад ҳам 18 ой муддатда аъзо бўлиб туради. Шу билан бирга, конституция тузувчи ёки унга тузатиш киритувчи комиссия ташкил қилинади. Одамларга тинимсиз зулм қилиб келган хавфсизлик ва ҳарбий ташкилотнинг сақлаб қолиниши ва уларнинг америкапараст эски давлат томонидан бошқарилиши таъминланади. Шунингдек, сайловлар саҳнаси бошланиб, унда тоғутнинг ўзи ҳам қатнашади… Бу ҳақда 2015 йил Жон Керри «Башар ўз номзодини қўяди, мухолафат эса, унинг сайловда муваффақият қозонмаслиги учун ҳаракат қилиши керак», дея баёнот берган. Барчамизга яхши маълум, АҚШ ва БМТ бу қонхўр режимни тан олади, ҳатто уни ҳимоя қилиб, унга қонунийлик тусини беришмоқда, тириклик воситалари билан таъминлашяпти, бунга Башар Жаъфарийнинг Суриянинг БМТдаги фавқулодда ва махсус вакили бўлиб тургани далилдир.
Табиийки, бу ечим қўзғолоннинг барча кўринишлари билан йўқ қилишни ҳамда одамларни қуролсизлантириб, қўзғолонни муайян тартибга чеклаб қўйишни зимдан талаб қилмоқда. Унда Туркия томонидан бошқариладиган ва аввалдан режалаштирилган миллий армия учун бир пойдевор пайдо қилиниб, қонхўр режим армияси билан бирлаштирилади… Бундай шайтоний тадбирни албатта Америка чизиб берган бўлса, Туркия уни Сурияда ижро этмоқда.
Шуни алоҳида таъкидлаш лозимки, бизнинг муаммо фақат Башар Асад шахсида эмас, балки у ҳукм юритаётган режимдадир. Бу кофир, золим ва қаттол режимни барча аркону башаралари билан қўшиб йиқитиш ва одамларни унинг ёвузлигидан қутқаришимиз даркор. Биз миллионлаб шаҳидлар берганимиздан сўнг энди таъмирлаш ва тузатиш амалиёти билан шуғулланмаслигимиз керак. Мудом Шомдаги холис инсонлар томирида қон жўш уриб турар экан, Аллоҳ изни ила, ҳаргиз бундай қилмаймиз.
Тўғри, зерикарли саҳна ўйинлари ва очиқдан-очиқ хоинлик ва таслим бўлишлар орқали кўплаб зиёнлар кўрилаётган ва минтақалар бой берилаётган бўлса-да, бироқ ҳануз имкониятлар мавжуд ва нусрат потенциаллари тайёрдир. Юракларимизда ўзгартириш истаги бисёр бўлиб, қўзғолон мафкураси оташдек ёнмоқда. Бизда фақат бир нарса етишмаяпти, холос. У ҳам бўлса, анави хоин етакчилардан ўз ҳуқуқ ва қарорларимизни қайта эгалламоқдир. Улар бу қарорларимизни «қўллаб-қувватловчи» давлатларга бериб қўйиб, ўзлари ҳам зое кетишди ва буларни ҳам зое кетказишди. Шоядки, мана шунда Аллоҳ биздан рози бўлиб, нусратини аямаса. Зеро, У Зот бундай дейди:
﴿وَلَيَنْصُرَنَّ اللهُ مَنْ يَنْصُرُهُ إِنَّ اللهَ لَقَوِيٌّ عَزِيزٌ﴾
«Аллоҳ Ўзига (яъни динига) ёрдам берадиган зотларга албатта нусрат берур, шубҳасиз, Аллоҳ кучли қудратлидир» [Ҳаж 40]
Роя газетасининг 2020 йил 22 апрел чоршанба кунги 283-сонидан
