Биродарим, ҳисоб-китобни унутманг!

بسم الله الرحمن الرحيم

Азиз биродарим, бу мактубни очиқ тарзда сизга йўллар эканман, Аллоҳ гувоҳки, кўзларимда ёш қалқиб турибди. Сабаби сиз ўзингиз учун энг қимматли бўлган нарсангизни йўқотяпсиз. Ҳа, сиз ҳар бир сония сайин ўзингизнинг қимматбаҳо бойлигингиздан айрилмоқдасиз. Менинг ташвишим айнан шундан. Сабаби сиз менинг Аллоҳ Таоло айтганидек биродаримсиз. Шундай экан, Росул с.а.в. нинг ўзи яхши кўрган нарсасини биродарига илинмагунича мўмин бўла олмайди, деган маънодаги ҳадисига мувофиқ мен ўзим яхши кўрган нарсани сизга ҳам илинаман. Бу Буюк Аллоҳнинг розилиги ва жаннат мукофоти. Бунга етишни ўзим истагандек сизга ҳам хоҳлайман. Бунинг учун эса, сиз ўзингиз учун қимматли бўлган бойлигингизни бекорга сарф этишдан тўхташингиз ва шу бойликни тўғри сарф этишни ўрганишингиз керак. Бу бойликни истаганингиздек атанг – умр, вақт, ҳаёт.

Шуни билингки, азиз биродарим, умр ўткинчидир. Ёшлик онларингизни йўқотиб қўйишингиз жуда осон. Атрофингизга қаранг, ёшлигини йўқотган қанча инсонларни кўрасиз. Улар ҳам сиздек ёш бўлишган. Биласизми, сиз ёшликдан ҳам қимматроқ нарсангизни, яъни умрни, ҳаётни ҳам йўқотиб қўйишингиз мумкин. Қабристонга бориб кўринг. У ерда ётганларнинг ёшларига эътибор беринг. Қанчаси сизнинг ёшингизга етмай бу дунёни тарк этган. Ҳаёт шундай, сиз ўзимники, деб ўйлаган нарса аслида исталган вақтда сиздан тортиб олиниши мумкин. Ҳаётингиз сиз учун ҳатто қачон олиниши сиздан сўралмайдиган омонатдир. Агар ҳаётингизни йўқотиб қўйишингиз мумкинлиги тўғрисида ўйламаётган экансиз, унда билингки, сиз ўз ҳаётингизни тўғри сарф этиш ҳақида ўйламабсиз. Ҳатто ҳаётнинг нима эканлигини англамабсиз. Шунинг учун сизга шу сарф этаётган ҳаётингиз устида ҳисоб-китоб қилинишингизни эслатаман. Эртага бугунги сарф этилган ҳар бир сония сизнинг зиёнингизга ишлаши мумкин.

Ўзингизга берилган омонатли ҳаётни нималарга сарф этаётганингизни доимо ҳисобини қилинг. Шу вақтгача нималарга сарф этдингиз ва этмоқдасиз, булар сиз учун муҳим бўлиши керак. Чунки сиз йўқотилса яна топиш мумкин бўлган нарсани сарф этмаяпсиз. Балки бирор сониясини ҳам қайтариб бўлмайдиган бойликни йўқотяпсиз. Шунинг учун, биродарим, бу ҳаётни сарф этиш учун тўғри мақсадни белгилаб олинг ва шунга қараб амалларингизни тўғри мақсад сари созланг.

Шу ўринда, қандай мақсад белгилаш тўғрисида ўйлаётган бўлсангиз, сизга бир маслаҳатим бор. Мақсаднинг тўғрилиги қанчалик аҳамиятли эканлигини англаб турибсиз. Демак, бу ўринда мақсад танлаш бўйича бутун борлиқни Яратган Зотни эслаб хулоса қилиш керак. Дунё ҳаётингиз ва охират диёрида сиз учун яхши бўлишини истасангиз Аллоҳ Таолонинг шариатини маҳкам ушлашингиз керак бўлади. Энг муҳими, бу ишингиздан Аллоҳ рози бўлади.

Ҳизб ут-Таҳрирнинг Ўзбекистондаги медиа офиси. Абдуллоҳ   

16.05.2019й