بِسْمِ اللَّـهِ الرَّحْمَـٰنِ الرَّحِيمِ

Роя газетаси:

АҚШ роҳинга мусулмонларини қатли ом қилишда Бирма билан тил бириктирди

Ҳижрий 1438 йил 18 зул-ҳижжа, милодий 2017 йил 9 сентябр шанба куни «Франс 24» сайти қуйидаги хабарни нашр қилди:

«Жума куни АҚШ масъули унинг давлати роҳинга озчилиги бўҳронини ҳал этиш учун Бирма билан ҳамкорлик қилиш истагида эканини маълум қилди. Шу билан бирга, у АҚШнинг Бирма бош вазираси Аун Сан Су Чжинни ўн минглаб мусулмонларни ҳижрат қилишга мажбур қилган зўравонлик амалиётлари учун айбламаслигини ҳам таъкидлади.

АҚШ ташқи ишлар вазирлигининг Жануби-Шарқий Осиё масалалари масъули Патрик Мерфи журналистларга «Биз ҳужумларнинг ҳар қандай шаклини, хавфсизлик кучларига қарши ҳужумларни ҳам, оддий инсонларга қарши ҳужумларни ҳам қоралаймиз. Бироқ шу билан бирга оддий инсонлар содир этаётган ҳужумларни ҳам қоралаймиз», деди.

Қачон бу ҳужумлар ҳокимиятнинг жавоби сифатида содир этиладиган бўлса, «қонун устуворлиги ва инсон ҳуқуқлари ҳурмат қилиниши лозим», дея қўшимча қилди.

Сўзини «Биз зўравонликни ва зўравонликни келтириб чиқарувчи тарангликларни тўхтатишга чақирамиз», дея давом эттирар экан, Қўшма Штатларнинг айни ғояни амалга ошириш йўлида Бирмадаги фуқаролик ҳукумати билан мулоқот олиб бораётганини, лекин, шу билан бирга, айни минтақада «асосий ролга эга» армия билан ҳам мулоқот олиб бораётганини таъкидлади.

Ўз навбатида, АҚШнинг БМТдаги доимий вакиласи Никки Хейли ҳам «Оддий инсонларга қарши ҳужумлар воқеа жойида зўравонлик муддатини узайтириш ва ечимга бўлган умидни узоқ вақтга кечиктиришдан ўзга нарсага олиб бормайди», дея Бирма кучларини ҳушёрликка чақирди.

Бироқ Вашингтон айни зўравонлик амалиётлари учун нега Бирма ҳукуматини айблашни истамаётганини изоҳлашга астойдил ҳаракат қилди.

Мерфи «Янги ҳукуматга улкан муаммолар мерос бўлиб қолган» ва Роҳин вилоятидаги вазият ҳам шулар жумласидан, деди ҳамда «Бу анча узоқ вақтлардан бери давом этиб келаётган муаммо бўлиб, янги ҳукумат учун ўз вазифалари билан шуғалланиш асносида кутилмаган фожеа бўлган»ини таъкидлади.

Аммо АҚШ ташқи ишлар вазирлигидаги бу катта масъул Бирмага санкциялар жорий қилиш ҳақида, ҳатто унга босим қилиш борасида ҳам гапиришдан бош тортди.

«Бирма билан ўзаро яқин муносабатимиз, ҳамкорликда унга ёрдам беришдан иборат. Биз унинг ҳукумати билан, шу жумладан, Роҳин вилоятидаги каби жуда чигал вазият борасида бирга ҳаракат қилишни истаймиз», деди».

Роя газетаси шарҳи:

Қатли омдан бир кун ўтибоқ АҚШнинг Ислом ва мусулмонларга нисбатан кўплаб гина-адовати янада фош бўлди. Агар роҳинга халқи дуч келган айни қирғиннинг ўндан бир қисми, мусулмон бўлмаган шахсларга қарши содир этилганда борми, дунёни остин-устин қилиб ташлаган бўларди, армияларни ҳаракатга келтириб, санкциялар жорий қилиб ташлар эди. Бироқ бу қирғин ва сўйишлар мудом мусулмонларга қарши содир этилмоқда экан, Америка қотилни айбламайди ва ўз позициясини яққол намоён қилади. АҚШ бу билан роҳинга мусулмонлари қириғинида бутпараст Бирма билан тил бириктирмоқда, ҳатто уларни қатли ом қилишга кўк чироқ ёқиб бермоқда. Мусибат шундан иборатки, Америка ҳақида яхши гумон қилаётган ва ундан нажот сўраб, ечимлар кутаётган кишилар ҳамон мусулмонлар орасида мавжуд!

Роя газетасининг 2017 йил 20 сентябр чоршанба кунги 148-сонидан