Буюк келажак дегани мана шундай бўладими?
بسم الله الرحمن الرحيم
Буюк келажак дегани мана шундай бўладими?
Инсонни яратилиш табиатига чуқур назар солар эканмиз, Аллоҳ Таъоло уни мукаммал, бетакрор қилиб яратганлигини таърифлашга тил ожизлик қилади. Инсондаги ҳис-сезгилар, майл-истаклар, туйғулар, ақл-идрок нақадар нозик дид ва аниқ тартибот билан яратилганлигига гувоҳ бўламиз. Қолаверса, Аллоҳ инсонни яратибгина қолмасдан, балки ана шу ожиз инсонни ҳаётда қандай яшаши ҳақида мукаммал қонуният (конституция) ни ҳам тақдим этди. Ушбу илоҳий қонуният ижтимоий, иқтисодий, таълим ҳамда ташқи ва ички бошқарувга алоқадор ҳукмларни мукаммал баён қилди. Сизу бизнинг аждодларимиз бўлган Ислом Уммати ўн икки аср давомида, яъни милодий VII асрдан XIX аср ўрталарига қадар бутун дунёда дунёқараш, маданият, сақофат, иқтисод ҳамда илм-фан соҳаларида энг олий уммат бўлиб келган эди. Ва аниқ биламизки, Ислом давлати дунёдаги энг буюк ва энг қудратли давлат эди. Бу ўз мафкурасининг тузум ва ақидасини инсонларга татбиқ қилишдаги Исломнинг муваффақиятини таъкидлайди. Давлат бошқарувида Исломий аҳкомлар давлат томонидан тўлиқ татбиқ қилинган. Бунинг исботи тариқасида баъзи жиҳатларга қисман эътиборингизни қаратмоқчиман.
Ижтимоий ҳаёт
Аёлнинг эр билан бўладиган алоқаларини ва уларга тааллуқли бўлган барча муносабатларни, яъни шахсий ҳолатларни белгилаб берадиган ижтимоий қонунлар, мустамлакачилик ва куфр ҳокимияти мавжуд бўлишига қарамасдан, хозиргача татбиқ қилиб келинмоқда. Яъни бугунги кунда у инсон ким бўлишидан қатъий назар, ўзини мусулмон ҳисоблар экан, хоҳ зиёли, хоҳ ишчи, хоҳ мухандис, хоҳ муаллим, хоҳ ибодатгўй бўлсин, хоҳ ибодатсиз фосиқ кимса бўлсин, хоҳ Ислом билан курашаётган МХХ раисидан тортиб, оддий ИИБ ходими бўлсин, қизини турмушга ўзатаётганида ёки ўғлини уйлантираётганида шаръий никоҳ билан узатмоқда. Буни ҳеч ким инкор қила олмайди. Илоҳий қонунлар асосида ҳукм юритадиган давлатимиз йўқ бўлганлигига 94 йил бўлган бўлсада, бугунги фасодларга ва фахш ботқоғига, Исломга қарши курашга тўлган бугунги кунимизда никоҳсиз ҳаёт бошламаётганимизга эътибор берадиган бўлсак, аждодларимиз бу соҳада илоҳий қонуниятдан заррача оғишмаганликларини бемалол айта оламиз.
Иқтисодий низом
Иқтисод қонунлари эса икки соҳада: Биринчиси – солиқ тизими, яъни давлат томонидан инсонларнинг турли муаммоларини ҳал қилиш учун халқдан мол-мулк йиғиш; Иккинчиси эса молия тизими, яъни бу мол-мулкни сарф қилиш услуби-кайфиятида намоён бўлади. Халқдан мол-мулк йиғиш кайфияти шундан иборат бўлганки, давлат – ибодат деган эътибор билан – мол-мулк, ерлар ва ҳайвонлардан закот олар, уни Қуръонда зикр қилинган саккизта тоифа орасида тақсимлаб, давлат ишларини идора қилиш учун бу мулкни асло ишлатмас эди. Давлат ва умматнинг ишларини идора қилиш учун Ислом шариатига мувофиқ равишдагина мол-мулк йиғиб олинар эди. Шунинг учун давлат ерга хирож, ғайримусулмонлардан жизя ва – ички ва ташқи тижоратга мутасаддилик қилиб тургани учун – божхона солиқларини олар эди. Ислом шариати белгилаган ўринлардагина мол-мулк йиғиб олар эди. Мулкни тақсимлаш борасида эса давлат ожиз шахсларга нафақа бериш аҳкомларини татбиқ қилар, руҳий носоғлом кишини ва исрофгарни мулкни тасарруф қилишдан ман қилиб, уларга васий тайинлар эди. Давлат ҳар бир шаҳарда Ҳажга олиб борадиган йўлларда фақир, мискин ва мусофирларнинг овқатланиши учун манзилгоҳлар бино қилар эди. Бу манзилгоҳларнинг ёдгорликлари бугунги кунга қадар мусулмонларнинг йирик шаҳарларида сақланиб келмоқда. Хуллас, давлат тарафидан мулкни сарф қилиш шариатга мувофиқ олиб борилган ва ҳеч қачон шариатдан бошқа қонунлар асосида амалга оширилмаган. Юқорида таъкидлаганимиздек, бу соҳа ҳам давлатимиз йўқ бўлишига қарамай, мусулмонлар ўрталарида ҳамон ўз кучида турибди, яъни мусулмонлар шахсий суратда ушбу аҳкомларга амал қилиб келишмоқда.
Таълим низоми
Таълим сиёсати ҳам Ислом асосига қурилган эди. Таълим дастурининг асоси Ислом сақофатидан иборат бўлиб, ажнабий сақофатларни – агар Исломга зид бўладиган бўлса – дастурга киритмасликка қаттиқ аҳамият берилар эди. Ислом олийгоҳларини барпо этиш, очиш борасидаги нуқсонлар фақат Усмоний давлатнинг сўнгги дамларидагина рўй берган эди холос. Қолган асрларда эса, бутун дунёга маълум ва машҳур эдики, давлатнинг йирик шаҳарлари барча олимлар ва толиби илмларнинг диққат-эътиборини ўзига жалб қилиб келган даргоҳлар эди. Жаҳондаги таълим-тарбия ишлари тўғри йўлга қўйилишида Қуртуба (Кордова), Бағдод, Дамашқ, Искандария ва Қоҳирадаги олий илм даргоҳларининг жуда катта таъсири бўлган. Таълим шу даражада қулоч ёйган эдики, Европа халқлари юқорида зикр этилган олийгоҳларда таълим олаётганлари билан фахрланар эдилар.
Ташқи сиёсат
Ташқи сиёсат ҳам исломий асосга қурилган эди. Ислом давлати ўзининг бошқа давлатлар билан олиб борадиган алоқаларини Ислом асосига биноан амалга оширар эди. Барча давлатлар унга Ислом давлати сифатида қарар эдилар. Ислом давлатининг барча ташқи алоқалари Ислом асосига биноан, мусулмонларнинг – айнан мусулмонлиги эътибори билан – манфаатларини ҳисобга олган ҳолда олиб борилар эди. Ислом давлатининг ташқи сиёсати исломий сиёсат бўлганлиги бутун дунёга машҳур бўлиб, уни исботлаш учун ҳеч қандай далилнинг ҳожати йўқ.
Ҳа, аждодларимиз бу комилликка етишларининг боиси шунда эдики, барча асрлар давомида, яъни Росулуллоҳ соллаллоҳу алайҳи ва саллам Мадинага етиб келган кундан бошлаб то 1336 ҳижрий (1924 милодий) йилда мустамлакачилар қўли билан буюк Исломий Халифалик (Усмоний) давлати қулатилгунга қадар фақат Исломни татбиқ қилишган. Бу татбиқ шундай кенг қулоч ёйган бўлиб, ҳатто муваффақиятнинг энг юқори чўққиларига кўтарилган эди.
Ислом давлати ва Ислом уммати мафкурани тарқатишдан юз ўгириб, Исломга даъват қилишда эътиборсизлик қилиб, Исломни тушуниш ва уни татбиқ қилишда жиддий нуқсонларга йўл қўйгач, бошқа миллатлар ўртасида ўз-ўзидан обрўсизланиб қолди. Ёки бошқачароқ қилиб айтсак, Ислом давлатимиз бор маҳалда аждодларимиз ўзга юртларда иш излаб юрмаганлар, ўзга юртлардан жонсиз жасадлари келмаган, ўзга юртларда “чёрный” лақаби билан хору-зорликка мубтало бўлмаганлар. Бир сўз билан айтганимизда, ўз юртларида азизу-мукаррамликда ҳаётларини давом эттирганлар.
Давоми бор…
Мухлисингиз Салоҳиддин
09.09.2015й.
