Демократиянинг сўнгги “бекати”

بسم الله الرحمن الرحىم

Инсон табиатида азизлик ва афзалликка интилиш мавжуд. Аммо бу талабни қондиришда хато йўл тутиш ҳар қайси инсонни, жумладан биз мусулмонларни ҳам янгидан янги муаммоларга гирифтор қилади. Нега, …биз мусулмонларни ҳам, дедик. Чунки биз мусулмонлар ғариза ва майлларимизни ўз ҳолимиз, ўз билганимизча эмас, балки Яратган Роббимиз буйруқ ва низоми асосида қондиришга рози бўлган, хоҳлаганингдай яшайвер, деб ташлаб қўйилмаган мукаммал дин эгаларимиз. Албатта, барча азизлик ва афзаллик Аллоҳнинг амри, панд-насиҳатларида ўз аксини топган бўлиб, зафар қучиш йўли ҳам динимизда очиқ-ойдин кўрсатилган. Демак, бошқа дин вакиллари, бутун дунё халқлари ҳам азизликка фақат Оламлар Роббиси томонидан нозил бўлган ва Пайғамбаримиз Муҳаммад ﷺ кўрсатиб берган йўлдан юрсагина эришишлари мумкин…

Бироқ мустамлакачи Ғарб ва уларнинг мадади ила мусулмонлар устига ўрнашиб олган малай ҳокимлар қўли билан олиб борилаётган бугунги сиёсат умматни аввалдаги азизлик тимсоли бўлган Халифалик давлатини гўё яроқсиз ва зўравон бошқарув, дея танитмоқда. Ўн уч асрдан ортиқ давом этган азизлик асоси бўлган Исломни энг тўғри низом сифатида танитиб, даъват қилаётганларни таъқиб қилиб, уларни чорак асрдан буён қамоқларда ушлаб келмоқда ёки қувғин қилмоқда. Аслини олганда, бироз тафаккур ва озгина изланиш билан ҳам ҳозирги кунда ҳар бир ақл эгаси, албатта Ислом дунё халқлари излаётган хотиржамликнинг ягона манбаси ва кафолати эканига иқрор бўлади.

Бугунги етакчи давлатлар ўзларининг демократик бошқарув, қонун ва нормаларини мусулмонларга ҳам зўр бериб тиқиштиряпти-ю, аммо унинг асоратлари, иллат ва оқибатлари ҳақида лом-мим дейишмаяпти. Ҳолбуки, Ғарб “демократия”си ёрлиғига ўралган бу қонунлар “асал” қопламали систематик таъсирга эга заҳри қотилдан бошқа нарса эмас.

Азиз ўқувчи, келинг мен сизга эркин демократик тузум соясида яшаб қариган бир немис қўшним билан орамизда бўлиб ўтган суҳбатни ҳавола қила қолай, балки шунда кўп нарса ойдинлашар…                         

Қўшним ўзи ёлғиз яшайди, ҳатто бор-йўқлиги сезилмайди, у билан бирга уйда бир кучуги ҳам бор. Эшигини очган пайтда кучугининг бадбўй ҳиди димоққа урилиб таъбни хира қилади. У билан кеча йўлакда учрашиб қолдим. Улар биздан фарқли ўлароқ шахсий ҳаётларига бировларнинг аралашишини ёқтирмайди. Аммо бу гал билмадим, нима бўлди-ю одатига терс кетиб менинг саволларимга малолланмай жавоб берди. Гап орасида нима учун ёлғиз яшашини сўрадим. Аёли, фарзандлари, оиласи ҳақида билгим келди. У барча саволларимга ўз эътиқоди, ҳақиқий ғарб демократик қарашларидан туриб жавоб берди:

– Хотин дейсиз, унинг менга нима фойдаси бор ва у умуман нима учун керак? Ахир битта хотиндан оладиган лаззатимни минглаб аёллардан хоҳлаган пайтда топиш имконига эга бўлсам, нега энди мен бир хотин билан оилавий шартнома тузиб, ўз оёғимга тушов уришим керак?! Фарзандлар ҳақида айтсам, улардан менга нима манфаат бўлсин? Ахир ўйлаб кўринг, мен бир чақалоқнинг барча тилакларини бажариб, унга қулдек хизмат қилсаму, у энди улғайган пайтда қариб кучдан қолган отанинг хизмати билан банд бўлишни хоҳламаслиги мумкинми? Албатта-да, унга бундан нима наф бор? Ахир у барча эркинликларига тўсиқ бўлувчи ишни асло қилмайдику!? – деб сўзини тамомлади.

Мен бу ривожланган давлатнинг пайдо бўлишидан тортиб то бугунигача унда туғилиб, ўқиб, ишлаб-яшаб, ахийри шу ёшга етиб ҳассаси ва бадбўй кучугигагина суяниб қолган демократ чол ҳикоясидан бу тузум аллақачон ўз гирдобига ғарқ бўлиш арафасида эканини ҳис қилдим. Ва бу кимса тимсолида демократик тузумга эътиқод қилувчилар етиб келган ва етиб келадиган сўнгги “бекат” қанчалар аянчли эканини кўргандек бўлдим…

Азиз ўқувчи! Наҳотки, юртимизда тинимсиз тарғиб қилинаётган демократия азизлигимиз асоси бўлса!? Асло йўқ! Бу, айтиш мумкинки, ғайриинсоний ёлғизлик гирдоби холос. Улар кундан-кун емирилиб, ҳеч қандай жангу жадалсиз ҳам насли қуриб бораётган Ғарб демократик турмуш тарзини аслида иззат ва шарафга ҳақли сиз мусулмонларга тарғиб этмоқда. Қандай қилиб? Ахир сиз фарзандларингиз табассумидан завқ, қувват олувчи, набираларингиз эркаликларидан шодланувчи мўмин-мусулмонлардансиз-ку! Шундай эмасми?!

Тўғри, бу ғарбпараст тарғиботчи ва малай ҳокимлар томонидан одамларни турли ёлғон ташвиқотлар, қамаш, таъқиб-тазйиқлар орқали Исломдан бездириб, ҳалол ва ҳаром ўлчовларини зеҳнлардан сўндириб, ўрнига фойда ва зарар мезонларини сингдириш йўлида тинимсиз ишлар олиб борилмоқда. Шунинг учун бугун мусулмон кишилар оғзидан “сендан менга нима фойда” деган иборалар бот-бот чиқаётганига гувоҳ бўляпмиз. Ҳатто халқимиз орасида баъзилар “фойдасиз” ота-оналарини қариялар уйига элтиб, уларни унутиб қўйиш даражасигача бораётганлар бор. Бундайлар орамизда афсуски, оз бўлса-да учрамоқда. “Нафи тегмас” фарзандларни сабр-тоқат ила илмли-ахлоқли қилиб табиялаш ўрнига қаровсиз ташлаб қўйилмоқда, айримлари уйлардан қувилмоқда. Бу каби иллатлар аслида мусулмонларга мутлақо бегона турмуш тарзи эмасми?

Эй иймон аҳли! Келинг, Ғарб халқлари тарафга чақираётганларни ўз ҳолига ташлаб, шарқ донишмандлари каби дўппини бошдан олиб, обдон фикрланг! Сувни кўрмасданоқ этик ечманг! Шоядки, азизликни кофирларнинг ғайриисломий йўлидан, янада аниқроғи уларнинг ботқоғидан эмас, том маънода икки дунё эзгулиги, азизлиги кафолати бўлган Исломдан қидиришга ўтсангиз!

Юзаки қараганда, Ғарб танлаган ялтироқ турмуш тарзи ўз юртингиздаги тангликлардан кенгроқ ва яхшироқ кўринаётган бўлса ажабмас. Лекин мусулмон юртларидаги бугунги танглик, ҳар жабҳада бўй чўзган муаммолар аслида динни ҳаётдан ажратиш мафкурасининг аччиқ меваларидир. Бунинг ортида сиз Меҳрибон Роббингизнинг ҳақ дини, адолатли қонунлари соясида саодатли, пок ва осуда ҳаёт кечиришдан маҳрум қилинмоқдасиз. Аммо шуни ҳам унутмангки, айрим фикри саёз ёки нохолис кимсаларни ўзига оҳанграбодек тортаётган ўша “жозибадор” Ғарб ҳаёти тубида нафақат мусулмонларни, балки бутун инсониятни бахтсизлик гирдобига тортувчи иллатлар мавжуд. Сўз эркинлиги, шахс ва мулк эркинлиги, дин эркинлиги, деган нарсалар Ғарбнинг ялтироқ, аслида увадаси чиққан “либос”лари холос. Қолаверса, бундай эркинликларга эътиқод қилувчи Европа халқи на ўзлари ва на бошқалар қалбига таскин беролмайдиган турмуш тарзининг оғриқли изтиробларини бугунда ўз танаси ва ўз дунёсида етарлича ҳис қилмоқда. Бунинг ёрқин мисоли эса, мазкур суҳбатда акс этган зерикарли, мудҳиш ёлғизликдир! Зеро, ҳаёт ўлчовлари фойда ва зарардан иборат, деб белгиланган халқларда қандай қилиб оила, маҳалла ва юрт кишиларини бир-бирларига ғамхўр дўст-улфат қилувчи омиллар юзага келсин!?

Азизликни қидиринг, изланинг, аммо ҳаргиз уммони қуриган кемага чиқиб сафарга отланманг! Чунки бу сафарингизнинг сўнгги “бекати” албатта бахтсиз ёлғизликдир! Аллоҳ Таоло айтади: 

الَّذِينَ يَتَّخِذُونَ الْكَافِرِينَ أَوْلِيَاء مِن دُونِ الْمُؤْمِنِينَ

– “Улар мўминларни қўйиб кофирларни дўст тутадилар. Улар ўша кофирлар олдидан куч-қудрат излайдиларми?! (Овора бўладилар!) Зеро, бор куч-қудрат Аллоҳникидир”.       (Нисо:139)

Ҳизб ут-Таҳрирнинг Ўзбекистондаги матбуот бўлими аъзоси Зайниддин

19.05.2023й