Хорликни ҳис қилмаётган уммат

بِسْمِ اللهِ الرَّحْمٰنِ الرَّحِيم

Хабар: Россия Федерацияси ва Ўзбекистон ўртасида бир давлат фуқаролари бошқа давлат ҳудудига кирган кундан бошлаб 15 кун ичида мажбурий рўйхатдан ўтишни бекор қилувчи келишув кучга кирди. Президент Владимир Путин бу ҳақдаги қонунга имзо чеккан.

Ўзбекистон фуқароларининг Россия ҳудудида ва Россия фуқароларининг Ўзбекистон ҳудудида бўлишлари тартиби тўғрисидаги ҳукуматлараро битим 2021 йил 17 июнь куни имзоланган. Эслатиб ўтамиз, 2021 йил сентябрь ойида қурилиш соҳасида меҳнат фаолиятини амалга ошириш учун ўзбекистонлик ўн минг фуқарони соддалаштирилган тартиб асосида Россияга ишга жалб қилишга келишилган эди. (Озодлик, 04.05.22й)

Изоҳ: Хабар матнида айтилганидек, Россияда меҳнат муҳожирларига эҳтиёж ортса миграция тартиби енгиллаштирилади. Меҳнат бозорида мувозанат сақлангач эса, меҳнат патенти, вақтинчалик яшаш рухсатномаси ва гувоҳномалар нархларини ошириш масаласи муҳокама мавзусига айланади. Ҳозирда Россиянинг Ўзбекистон ва бошқа республикалардан арзон ишчи кучларини ёллашга бўлган ҳаракатлари жадаллашгани кузатилмоқда. Бундай ҳолатни қуйидаги сабаблар билан изоҳлаш мумкин. Россия Украинага уруш очгач меҳнат муҳожирлари Россияни тарк эта бошлади. Бунга қўшимча Ғарбнинг иқтисодий жазо чоралари ҳам Россияда арзон ишчи кучига бўлган талабни орттирди. Чунки ишчилар камайса маошлар кўтарилади ва санкцияга учраган иқтисоднинг изга тушиши учун ҳаражатларни камайтириш, яъни ишчиларга кам иш ҳақи тўлаш заруратга айланади. Шунинг учун Россия иқтисодни қайта жонлантириш ва урушни давом этказиш учун арзон ишчи кучларини жалб қилиш йўлларини қидирмоқда. Бундан ташқари, ўзини Совет Иттифоқининг меросхўри, деб ҳисобловчи Путин ҳукумати Марказий Осиёлик мусулмон йигитларни жангга юборишни истайди. Чунки унинг дахрий аждодлари немисларга ва Афғонистондаги мужоҳидларга қарши жангларда биринчи сафга мусулмонларни қўйган эди. Путин “сиёсий даҳолар”ининг мазкур ишларини такрорламасликни жиддий нуқсон ва сиёсий ожизлик деб ҳисоблайди. Коммунистлар мусулмонларни унвон, обрўга қизиқтириш ва қўрқитув билан жангга олиб чиққан бўлса, Путин ҳукумати шартнома асосида бўлса ҳам мусулмонларни пиёда аскарликка ёллашга рози. Мусулмонларнинг кечаги куни ва ҳозирги ҳолатига назар ташланса, Исломдан юз ўгириш ва рус мустамлакасига тобе бўлиш фақат хорлик ва зиллатни келтириб чиқарганини кўрамиз. Аввалгилар “буюк рус халқи” учун Иккинчи жаҳон урушининг ўзида 1,5 миллиондан зиёд ўзбекистонлик хорларча жон берган бўлса, ҳозиргилар пул эвазига динидан, ор-номусидан, соғлиғидан кечиб руслар фаровонлиги учун тер тўкишяпти. Улардан нима учун ишлагани кетяпсиз, деб сўралса “қарзимни узгани”, “уй солгани”, “тўй қилгани”, “машина олгани” деб жавоб беришади. Бу сабаблар инсон табиатига хос эҳтиёжлар бўлса-да, лекин уларни юксак орзу ва кучли эҳтиёжлар даражасига кўтарилганини табиий ҳол, деб бўлмайди. Чунки инсонларнинг яшаш тарзи ва маънавий орзулари давлат сиёсати таъсирида шаклланади. Акс ҳолда мусулмон халқимиз нотаниш эркак ва аёлларнинг бир хонада аралаш яшаладиган, ҳалқумлари ҳаром нарсалардан булғанадиган, кунда беш маҳал намоз ўқишига жиддий монеликлар бўладиган Россиядек куфр диёрига хирс билан ошиқишмас эди.

Энг ачинарлиси шуки, кофирларнинг кўчасини супуриш, ахлатини тозалашдек энг паст ишлар мусулмонларга тегишли бўлиб қолганидир. 10-15 йиллаб қора ишчилик қилган оталарнинг ўрнини фарзандлари эгаллаётгани бу Уммат ўзи тушиб қолган даражани англаб етмаганини кўрсатади. Зеро, ҳаёт, уни тўғри тартибга солиш ва юксалиш ҳақидаги Исломнинг етук фикрларисиз инсонлар кучли кофирни олдида ўзини ҳар жиҳатдан ожиз ва маҳрум ҳис қилишади. Рус ҳукмронлиги ўрганилса Россия қудратининг сири Ўрта Осиё, Кавказ, Татаристон ва бошқа минтақалардаги мусулмонларни сиёсий бўйсундириш ва Аллоҳ тарафидан мусулмонларга берилган табиий бойликларни талашдан иборатлиги яққол кўринади. Шунинг учун ҳам Россия ўзида, Марказий Осиё ва дунё бўйлаб Исломий уйғонишга қарши муросасиз кураш олиб боряпти. Чунки Россия мусулмонларни мустамлака қилишнинг бирдан-бир йўли уларни Исломдан узоқлаштириш деб билади. Шундай экан, биз мусулмонлар икки йўлдан бирини, яъни бойликларимизни хом ашё сифатида қоқи баҳосига сотиб юборадиган ва патент олиш муддатини 15 кундан узайтирилишини ютуқ ҳисоблайдиган тубан бошқарувни ёки мусулмонларни Ислом ақидаси билан азизу мукаррам қиладиган, уларнинг молини, жонини, шаънини ҳимоя қилишни давлат сифатида мавжуд бўлиб туришнинг шарти қилиб белгилайдиган Исломий бошқарувни танлашлари керак. Эртамиз бугунимиздек бўлмаслиги учун, фарзандларимиз Аллоҳга исёнда яшайдиган кофирларнинг қўлида эътиқодий, руҳий ва жисмоний зулмлар остида эзилмасликлари учун Исломга қайтишимиз зарур. Шунда арзимас дунё моли учун хорларча мусобақа қилишдан қутуламиз. Ва Аллоҳ наздидаги фойдали тижорат билан машғул бўламиз. Мана шу ҳақиқий улуғ бахтдир!

قَالَ اهْبِطَا مِنْهَا جَمِيعًا بَعْضُكُمْ لِبَعْضٍ عَدُوٌّ فَإِمَّا يَأْتِيَنَّكُم مِّنِّي هُدًى فَمَنِ اتَّبَعَ هُدَايَ فَلَا يَضِلُّ وَلَا يَشْقَى + وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى + قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا + قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى

– “Бас, сизларга Мен тарафдан Тўғри Йўл келганида ким Менинг Тўғри Йўлимга эргашса, йўлдан озмас ва бахтсиз бўлмас. Ким Менинг Эслатмамдан юз ўгирса, бас, албатта унинг учун танг-бахтсиз ҳаёт бўлур ва Биз уни Қиёмат Кунида кўр ҳолда тирилтирурмиз. У: “Парвардигорим, нега мени кўр қилиб тирилтирдинг, ахир мен кўрар эдим-ку?!” деган эди, (Аллоҳ) айтди: “Шундай. Сенга Бизнинг оят-мўъжизаларимиз келганида уларни (“кўрмадинг”)-унутдинг. Бугун сен ҳам ана шундай “унутилурсан””.                                                          (Тоҳа:123-126)

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

21.05.2022й