“Инсоннинг ноқис конституциясига – ЙЎҚ! Қуръон ва Суннат асосидаги дастурга – ҲА!” номли кампания доирасида

Конституцияни амалдагисининг ҳам, янгисининг ҳам Ислом ва мусулмонларга ҳеч қандай алоқаси йўқ

(3-қисм)

بسم الله الرحمن الرحيم

3. Референдумга нисбатан халқаро ташкилотлар ва йирик давлатларнинг муносабати.

Ўзбекистон ҳукумати янги конституцияни қабул қилишда ва референдумни халқчил қилиб кўрсатишда Ғарб, хусусан Американи розилигини ҳам ҳисобга олган. Зеро, Мирзиёевнинг кўп векторли сиёсати шуни тақозо қилиб келяпти. Шунинг учун ҳам референдумни кузатиш учун юртимизга 28 март куни ташриф буюрган Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюросининг (ЕХҲТ ДИИҲБ) референдумни кузатиш миссиясининг ижобий хулосаси ҳукумат учун жуда муҳимдир. ДИИҲБ миссияси раҳбари Алберт Жонсон миссия вакиллари Ўзбекистон ҳукуматининг таклифига биноан келгани, референдумга тайёргарлик кўриш ва уни ўтказишга доир барча тадбирларни кузатиб боришини қайд этди. Жонсон жумладан шундай деган: “Ўзбекистондаги Конституциявий ислоҳотлар муҳим сиёсий ва тарихий жараён ҳисобланади. Демократик институтларнинг ўз методологияси бор. Биз ҳам кузатувларимиз давомида референдумга тайёргарлик жараёнларини, референдумни ўтказиш бўйича ҳуқуқий асосларга ҳамда ЕХҲТ талабларига қанчалик риоя қилинганини кузатамиз. Кузатув миссиямизнинг асосий вазифаси референдумнинг очиқ ва шаффоф ўтишини кузатишдан иборат”. Бундан аввал ушбу ташкилот конституцияга ўзгартиришлар бўйича ўз таклифларини ҳам берганди.

Шунингдек, янги конституция лойиҳаси АҚШ, Словения, Швеция каби давлатларнинг халқаро экспертлари иштирокида муҳокама қилинган. Маълум қилинишича, Конституциявий қонун лойиҳаси 6 турдаги экспертизадан, жумладан: лингвистик, юридик, гендер-ҳуқуқий, коррупцияга қарши, жамоатчилик ҳамда инсон ҳуқуқлари бўйича нормаларга мувофиқлиги бўйича экспертизалардан ўтказилган. АҚШнинг Ўзбекистонга янги тайинланган Фавқулодда ва мухтор элчиси Жонатан Ҳеник ҳам qalampir.uz га берган интервьюсида референдум бўйича АҚШ позициясини билдирган. У жумладан шундай деган: “Биз Конституциявий референдумни жуда яқиндан ўрганяпмиз. Унда кўплаб ижобий ўзгаришларни – ишчиларни ҳимоя қилиш, аёлларни ҳимоя қилиш борасидаги қадамларни кўряпмиз. Ҳокимиятлар бўлиниши кучаймоқда ва Олий Мажлисга кўпроқ ваколатлар берилмоқда. Буларнинг барчаси жуда ижобий ўзгаришлар... Биз муҳим деб билган бошқа бир жиҳат шуки, агар ушбу Конституция ўзгартирилса, бу ўзгаришлар шунчаки қоғозда қолиб кетмайдими? Амалда ҳам ишлайдими? Умуман олганда биз Ўзбекистонни айни вақтдаги ва қолган барча ислоҳотларида қўллаб-қувватлашимизга ишонамиз”. Бундан Америка демократик ислоҳотлар фақат қоғозда қолиб кетмасдан, амалда татбиқ қилинишини ҳам хоҳлаётганини тушуниш мумкин. Элчидан янги конституция қабул қилинса, Мирзиёевнинг президентлик ваколатини узайтиришга йўл очилиши ҳақида қандай фикрда эканлиги сўралганда, у шундай жавоб берди: “Албатта, Ўзбекистон фуқаролари ўз сиёсий раҳбарларини танлаши ва бу сиёсий етакчиларнинг сайловда иштирок этиш шартларини белгилаши – бу уларнинг ўз хоҳиши… Аслини олганда биз ҳар қандай демократияда одамлар ўз раҳбарларини танлаш имкониятига эга бўлиши керак, деб ҳисоблаймиз ва ҳар қандай ҳолда биз буни қўллаб-қувватлаймиз”.

Демак, Ғарб ва Америка янги конституцияга, хусусан Мирзиёевнинг ваколат муддати узайтирилишига қарши эмас. Мақоламизнинг биринчи қисмида референдум ўтказиш сценарийси Россиядан кўчириб олингани ҳақида батафсил тўхталиб ўткандик. Фақат бу ўринда янги конституцияга катта ўзгаришлар киритилишидан Ғарб, хусусан Американи рози қилиш кўзлангани Россияникидан фарқланиб турибди. Шуларга кўра айта оламизки, Ўзбекистон устида курашаётган икки асосий ўйинчи – Америка ва Россия ушбу референдум ва янги конституция қабул қилинишига қарши эмас. Чунки ҳозирги халқаро вазият тақозосига кўра Мирзиёев юритаётган кўп векторли сиёсат бу икки йирик мустамлакачи давлатларни ҳозирги вақтгача қониқтириб келяпти. Бироқ бу йиртқичлардан бирининг қўли баланд келмагунича курашни давом этиши кутилади. Устимиздаги ҳукмрон сиёсий элита, унинг етакчиси Мирзиёевнинг мансабпараст ва манфаатпарастлиги мусулмон халқимиз бошига ҳали кўп балоларни келтиради. Улар ўз ҳукмронлиги даврини узайтириш учун ўзлари кўкка кўтарадиган конституциясини ҳам ўйинчоқ қилиб, анави бузуқ Ғарбнинг куфр ва ҳаромга тўла бўлган қонунларини тиқиштиришдан ҳам тап тортмаётгани сиз азиз халқимизни ташвишга солиши зарур. Шунга кўра савол берамиз: Бу конституция чиндан ҳам сизникими, ўзингизникими?!

Давоми бор…

#Инсоннинг_ноқис_дастурига_ЙЎҚ_Қуръон_ва_Суннат_асосидаги_дастурга_ҲА

Ҳизб ут-Таҳрирнинг Ўзбекистондаги матбуот бўлими аъзоси Форуқ

24.04.2023й