بِسْمِ اللهِ الرَّحْمٰنِ الرَّحِيمِ

Ливандаги ҳокимиятсизлик кризиси!

Шайх д. Муҳаммад Иброҳим

Ҳизб ут-Таҳрир – Ливан вилояти матбуот бўлими раиси

Аслида, ҳокимият инсонлар устидан ҳукмронлик қилиш ва ҳуқуқларини топтаб, бойликларини талаш билан эмас, балки ишларига ғамхўрлик қилиш билан ҳокимият саналади. Аммо исломий юртлардаги ҳокимиятлар Халифалик ағдарилгандан буён Ғарб манфаатларини ҳимоя қилиш ва одамларни эзиш учун ташкил этилган. Шунингдек, уларнинг мустамлакадан озод бўлишларига ва Аллоҳ уларнинг ҳаққи сифатида берган сиёсий ҳокимиятларини қайтариб олишларига йўл қўймаслик учун ташкил қилинган.

Ливандаги ҳокимият ҳам Франция томонидан ташкил этилиб, насроний маронитларга топширилгандан буён хориждаги хўжайинларини рози қилишдан бошқа ташвишни билмайди. У ўзининг тоифачилиги, айирмачилиги ва нафрати билан исломий юртлардаги бошқа ҳокимиятлардан ҳам ёмонроқдир. Ливан ҳокимиятини худди қароқчиларга ўхшаш сектант-тоифаси раҳбарлар бошқаради. Устига-устак, улар давлат мулкини ўмараётган, Ливан аҳли қонини тўкиб, аҳоли ўртасини обдан бўлаётган жиноятчи ўғрилар ҳамдир.

Ливан ўшандан бери, то шу кунга қадар кризис кетидан кризисдан боши чиқмаяпти. Валютаси вайрон бўлди, озиқ-овқат, дори-дармон, ёқилғи маҳсулотлари ва даволаниш нархлари ошгандан ошди. Ҳатто буларнинг баъзилари йирик фожир савдогарларнинг монополияси оқибатида батамом йўқ бўлди. Бу кимсаларнинг аксари ҳукмдорлар ва уларнинг ҳамкорларидир. Бу янги ва эски кризисларга бошқа бир қанча муаммолар ҳам қўшилдики, буларнинг барчасидан инсонлар ишларини ғамхўрлик билан бошқарувчи ҳокимиятнинг йўқлиги яққол намоён бўлмоқда.

• Ливан 1920 йил Франция томонидан эълон қилингандан бери заиф ва сунъий нафас олишсиз яшай олмайдиган касал давлат бўлиб келяпти. У чор атрофдан регионал давлатлар ҳамда биринчи Франция, кейин Британия, ундан сўнг АҚШ каби йирик давлатларнинг ҳукмронлиги остида бўлиб келди.
• Раҳбарлар инсонлар ишларини қонун олдидаги сиёсатчилар сифатида эмас, балки тоифачи кучлар сифатида бошқаришади. Бу эса, Ливанни ҳар қандай вақт портлаши мумкин бўлган мина устида яшашга мажбур қилмоқда… масалан, илгари Холди ҳодисаси, Айн Руммона ҳодисаси ва бошқаларда бўлгани каби.
• Муассасаларидаги тоифачиликка асосланган мана шундай бошқарув юрт аҳлини бўлинишга ҳамда вақти-вақти билан тоифачилик ва мазҳабпарастлик асосида бир-бирлари билан қирпичоқ бўлишларига олиб келди. Тоифа аъзолари ўз раҳбарлари атрофида бошқа тоифа раҳбарларига қарши уюшиб, ирқчилик ва нафрат авж олди, хусусан, Фаластин ва Суриядан келган муҳожир мусулмонларни ёмон кўриш кучайди.
• Ливандаги капиталистик режим учун муқаддас нарса моддий қиймат ва бевосита манфаат бўлиб қолган. Бу эса, ўз навбатида, режимни йирик сармоядорларни ўз муомалаларида асосан судхўрликка таянувчи банклар фоизидан қутқариш учун фаолият қиладиган режимга айлантириб қўйди. Масалан, Ливан ҳар йили 8 миллиард доллар фоиз тўлайди. Бундан ташқари, режим пул ташишни ман қилганига қарамай, миллиардлаб доллар контрабандасига сукут қилмоқда.
• Бу ўғрилар ўмарган давлат моллари юз миллиардларга етди. Баҳоси осмонга чиқиб кетган асосий эҳтиёжларини қондириш йўлида одамлар ўзларини ўтдан чўққа ураётган бир пайтда, биз бу ҳукмдорларни юртдаги қолган-қутган бойликларни чўнтакларига уриш учун мансаб талашиб, бир-бирлари билан келишолмай, юртни мутлақо эътиборсиз ташлаб қўйишганига гувоҳ бўляпмиз.

Буларнинг барчаси инсонлар ишларига ғамхўрлик қилувчи ҳокимият ва давлат йўқлигининг, шунингдек, юртни ўзларига томорқа қилиб олган ҳукмдорларнинг борлигининг амалий ифодасидир. Зотан, бу ҳукмдорларга фарқи йўқ, юртни вайрон қилиб бўлса ҳам, юрт аҳлини қоронғи ҳаётга қамаб бўлса ҳам мўмай даромад олишса бас.

Шу ўринда Ливан кризисларининг самарали ечимини кўриб чиқиш лозим. Бу қуйидагиларда ўз ифодасини топади:

• Ҳукмрон сиёсий синфни ағдариб, улар томонидан ҳамда йирик капитал эгалари, монополист йирик бизнесменлар томонидан ўмарилган пулларни мусодара қилиш, шунингдек, бошқаларга ибрат бўлиши учун уларни шафқатсиз жазолаш.
• Судхўрлик муомаласини бекор қилиш ҳамда иқтисодиётга зарба берган улкан процентли тўловни тўхтатиш.
• Бадавлат шахсларга камбағаллар эҳтиёжини қоплайдиган миқдорда солиқ солиш.
• Хорижга малайлик қилаётган шахсларни фош этиш ва хориж кўрсатмаларига итоат қилмаслик.

Бугунги сиёсатчилар ҳукумат тузиш ёки Халқаро Валюта Фонди шартларини бажариш орқали иқтисодий ва бошқа кризисларни ҳал эта оладилар, деб ҳеч ким ўйламасин. Йўқ, ҳаргиз бундай бўлмайди. Чунки Халқаро Валюта Фондининг ўзи хорижнинг юрт бойликлари ва ҳокимиятига бўлган ҳукмронлигини янада орттиради.

Ҳатто биз юқорида айтган ечимлар ҳам вақтинчаликдир. Бу Аллоҳ Таоло ушбу Умматга туб ечимни муҳайё қилиб бергунга қадар керакли ечим, холос. Зеро, Умматга ўз ҳокимиятини қайтариб, Парвардигори шариати билан ҳукм юритишдан иборат туб ечим Ливанни ўз аслига-Умматнинг бир бўлаги ҳолатига қайтаради, Уммат ўртасида на чегаралар бўлади ва на манфур малайлар. Балки, Умматга барча ишларни Роббул оламин буюрганидек ғамхўрлик билан бошқарувчи давлат ва ҳокимият етакчилик қилади.

Роя газетасининг 2021 йил 17 ноябр чоршанба кунги 365-сонидан