بِسْمِ اللهِ الرَّحْمٰنِ الرَّحِيمِ

Мустамлакачи кофирларнинг юртларимизга аралашишига ёлғиз Халифалик чек қўяди

Иброҳим Усмон (Абу Халил)

Ҳизб ут-Таҳрирнинг Судандаги расмий нотиғи

Мустамлакачилик қадимдан бўлгани каби, мустамлакачи кофир Ғарбнинг исломий юртларга, айниқса, Суданга аралашуви ҳам узоқ йиллардан бери бор. Бироқ сўнгги пайтларда ички ишларимизга очиқчасига бурун суқилмоқда, шу даражадаки, ҳукмдорларимизнинг йирик мустамлакачи давлатлардан келган фармонларни бажарувчи хизматкор эканликлари, бу буйруқлар ҳукмдорларга ўша давлатларнинг вакиллари орқали ёки БМТ ниқоби остида халқаро вакиллар орқали берилиши оддий инсонга ҳам аён бўлиб қолди. Бунга БМТнинг Судандаги махсус вакили ва UNITAMS миссияси раиси Пертес Фолькер қатор учрашувлари яққол далолат қилиб турибди. У гўё Суданнинг амалдаги ҳукмдоридек Суверен кенгаш раисидан бошлаб, партиялар, ташкилотлар, жамоалар ва «фуқаролик жамияти ташкилотлари», фуқаролик бошқаруви органлари, сўфилик оқимлари ва бошқаларгача, барча барчаси билан учрашмоқда. Бу давлатлар ички ишларимизга икир-чикиригача қолдирмай, ҳар куни аралашишар экан, бироқ, ўзларининг ишларига бирор давлатнинг аралашишига асло йўл қўйишмайди. Шундай экан, нега бизнинг ишларга бурун суқишади?! Улар ўз юртларининг ҳар қандай ишларига бошқа давлатларни аралашишига йўл қўймаслик чораларини кўришар экан, нега бизнинг ҳукмдорларимиз айни чора-тадбирларни кўришмайди?!

Ушбу икки саволга жавоб бериш учун устимиздан татбиқ қилинаётган низомни ўрганмоғимиз лозим. Унинг ақидамиздан балқиб чиққан низомми ёки нафс-ҳаводан келиб чиққан низомми, шуни билмоғимиз лозим.

Ҳаётимизни тартиблаштираётган сиёсатга, иқтисодга, таълимга ва бошқа соҳаларга оид низомларни ўрганган киши шунга гувоҳ бўладики, уларнинг ҳеч бири ақидамизга, ҳатто Судан аҳолисининг нафс-ҳавосига ҳам асосланган эмас. Балки уларнинг ҳар бири инглиз мустамлакачи кофирлардан мерос қилиб олинган. Инглизлар юртимизга амалда ўз ақидалари, яъни динни ҳаётдан ажратиш ақидаси асосида ҳукм юритишган ва шунга биноан низом ва қонунлар ишлаб чиқишган. Ҳатто Суданни тарк этишар экан, ўз конституцияларини (1953 йилда ўтиш даври учун ишлаб чиқилган мистер Бейкер конституциясини) қолдириб кетишган. Бу кейинчалик ўзгартиш киритилган барча конституцияларга ҳамон асос бўлиб келмоқда. Ҳатто ширкатлар қонуни, солиқлар қонуни, ер қонуни каби юртнинг аксар қонунлари асосини инглизлар тузиб беришган. Бу мустамлакачи ўрнак олинувчи намунага айланди, сиёсатчиларимиз ва муфаккирларимиз зиёлилар, деган ном учун шу инглизларга тақлид қилишга уринишмоқда!

Шундай бўлгач, аҳвол шу экан, кофир мустамлакачилар лойиҳасидан ташқари бошқа ҳеч қандай лойиҳага эга бўлмаган томонлар ўртасидаги мавжуд муаммони ҳал қилиш учун мустамлакачи кофирларнинг ўз вакиллари орқали ишларимизга аралашишлари табиий! Айнан мана шу мустамлакачилик лойиҳаси юртимизни сиёсат ва иқтисодда хор, қарам давлатга айлантирди. Халқаро Валюта Фонди ходимлари ҳозирги кунда Судандаги иқтисодиётни ўзларининг кўрсатмалари билан бошқаришяпти, бу кўрсатмалари эса, қашшоқларни ўлишига, қолганларни қашшоқлашишига олиб келмоқда. Сиёсатга келсак, Америка билан Британия ҳарбий ва фуқаровий ҳокимиятдаги ўз одамлари орқали Суданда нуфузларини мустаҳкамлаш учун бир-бири билан кураш олиб боришмоқда. Ҳарбий ҳокимиятда Aмериканинг қўли баланд бўлгани учун ҳозирда энг нуфузли томон АҚШ делегацияси ва вакиллари бўлиб қолмоқда. Ҳатто БМТ вакили Пертес Фолькер ҳам ўзининг сўнгги ташаббуслари орқали Америка манфаати учун ўйнаб, унинг одамларини қўллаб-қувватлаяпти. Ҳокимиятни ушлаб турган ҳарбий бошқарув эса, бу ташаббусларни амалга оширишдан бошқа нарсани қилмаяпти. АҚШ давлат котибининг Африка масалалари бўйича ёрдамчиси Молли Фи раислигидаги ҳамда АҚШнинг Африка Шоҳидаги вакили Дэвид Сартр Филд ва ўша пайтда АҚШнинг Хартумдаги элчиси вазифасини бажарган Брайан Шукан ҳамроҳлигидаги делегация 2022 йил январда Суданга келди. Делегация Суверен кенгаш раиси Бурҳон билан учрашиб, Бурҳон амалга оширадиган бир қатор масалаларни муҳокама қилишди. Жумладан, ҳукумат тузиш, ишларни назорат қилиш, конституциявий ҳужжатга янги ўзгартишлар киритиб, у билан мослашиш (яъни, Американинг одамлари яккаҳокимлигини) таъминлаш, сўнг ўтиш даври якунида сайловлар ўтказиш каби.

Судан воқелиги мана шу. Хўш, бундай аралашувнинг шаръий ҳукми қандай? Кофирларнинг ҳукм ва сиёсат юритиш масаласида мусулмонлар билан сўзлашувлар олиб бориб, ўз ечимларига уларни етаклашлари жоизми?

Кофирлардан ёрдам сўраш ёки уларнинг мусулмонлар ишларига аралашишларига йўл қўйишнинг шаръий ҳукми ҳаромдир. Чунки уларнинг бундай аралашуви уларга устимиздан ҳукмрон бўлишларига йўл беради, ваҳоланки, Аллоҳ Субҳанаҳу ва Таоло бундай демоқда:

﴿وَلَن يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلاً﴾

«Аллоҳ кофирларни мўминлар устидан (ҳукмрон бўлишларига) ҳаргиз йўл қўймайди»  [Нисо 141]

Шунингдек, Аллоҳ Таоло улардан бизга асло яхшилик келмаслигини ҳам баён қилиб, бундай демоқда:

﴿مَا يَوَدُّ الَّذِينَ كَفَرُوا مِنْ أَهْلِ الْكِتَابِ وَلَا الْمُشْرِكِينَ أَن يُنَزَّلَ عَلَيْكُمْ مِنْ خَيْرٍ مِنْ رَبِّكُمْ وَاللَّهُ يَخْتَصُّ بِرَحْمَتِهِ مَنْ يَشَاءُ وَاللَّهُ ذُو الْفَضْلِ الْعَظِيمِ﴾

«На аҳли китоблар (яҳудий ва насронийлар)дан бўлган кофирлар ва на мушриклар сизга Роббингиз тарафидан бир яхшилик (яъни ваҳий) тушишини истамайдилар. Аллоҳ эса раҳмат-марҳаматини Ўзи хоҳлаган кишиларга хос қилиб беради. Аллоҳ буюк фазлу карам соҳибидир»  [Бақара 105]

Росулуллоҳ ﷺ ҳам ишларимизни кофирлар билан маслаҳатлашишдан бизни қайтарганлар:

«لَا تَسْتَضِيئُوا بِنَارِ الْمُشْرِكِينَ»

«Мушриклар оловидан фойдаланманглар». Ҳасан ибн Абу Ҳасан бундай деган: Оловидан фойдаланманглар дегандан мурод улардан ишларингизда маслаҳат сўраманглар, демакдир. Бас, модомики, маслаҳат сўрашнинг ўзидан шунчалар қайтарилган экан, тасаввур қилаверинг, Ғарбнинг бизга буйруқ қилиши ва малайлари орқали ўз ҳукмини ўтказиш ва татбиқ қилишининг ҳукми қанчалар қайтарилиши мумкин?! Зотан, бу малайлар мана шу мустамлакачи кофир Ғарбга малай бўлишни ўзлари ўзларига муносиб кўришяпти.

Судан аҳлидан мусулмонлар сифатида талаб қилинаётган иш бундай ғайриисломий воқеликни исломий воқеликка ўзгартиришдир. Бунинг учун улар шундай тузумга эргашмоқлари керакки, у бизга Исломда кўрсатиб берилган, Аллоҳнинг Росули Муҳаммад ﷺ ер юзида татбиқ қилган ва кейинги рошид халифалар ҳам бу борда ул зотга эргашиб татбиқ этишган тузумдир. Ҳабибимиз Муҳаммад мустафо ﷺ бизга бошқарув ва сиёсатда ўзларининг суннатларига ва ўзларидан кейинги маҳдий рошид халифалар суннатга амал қилмоғимиз вожиблигини баён қилганлар. У зот бизни Исломга зид бошқа тузум ва қонунларни ишлаб чиқмоқдан огоҳлантириб

«… فَعَلَيْكُمْ بِسُنَّتِي وَسُنَّةِ الْخُلَفَاءِ الْمَهْدِيِّينَ الرَّاشِدِينَ، تَمَسَّكُوا بِهَا، وَعَضُّوا عَلَيْهَا بِالنَّوَاجِذِ»

«… Суннатимга ва маҳдий рошид халифалар суннатига амал қилинглар ва уни оғиз тишларингиз билан маҳкам тишланглар», дедилар. Ҳа, Ислом шундай бошқарув тузумини белгилаб берганки, Пайғамбаримиз ﷺ уни баён қилиб, устунларини ўрнатиб, қурилмасини кўрсатиб, қонун ва структурасини Аллоҳнинг Китоби, ўзларининг суннатига асослаб бердилар. Қонун чиқариш Халифалик давлатида халққа эмас, шариатга хосланган, ҳокимият Умматга берилган. Яъни ҳокимиятга Аллоҳнинг Китоби ва Росули ﷺнинг суннати асосида розилик ва ихтиёр ила етакчилик қилувчи кишини Уммат танлайди. Бу киши, яъни халифа бутун дунё мусулмонлари учун битта бўлади, ёлғиз ундагина дастурлар, қонунлар ва аҳкомларни табанний қилиш ҳуқуқи бўлади. Чунки у Уммат устида жавобгар ва ғамхўрдир. Халифа қонун чиқармайди, балки ўзи мужтаҳид бўлса ўз ижтиҳоди билан ёки бошқа мужтаҳиднинг ижтиҳоди билан аҳком табанний қилади. Бунинг устига, у агар Исломни камчилик билан ёки нотўғри татбиқ қилган пайтда Уммат томонидан ҳисоб сўралади.

Биз шу кунларда 1342 йил 28 ражаб ойида юз берган Халифалик давлати қулатилиши фожиасини хотирлаётган эканмиз, биз учун лойиқ иш уни Пайғамбарлик минҳожи асосидаги рошид Халифаликни қайта барпо этиш сари шахдам қадам ташламоқдир. Дарҳақиқат, Ҳизб ут-Таҳрир ушбу давлатни қайтариш учун тайёргарлик кўриб, Аллоҳнинг Китоби, Росули ﷺнинг суннатлари ва бу иккисига асосланган манбалардан саҳиҳ (тўғри) ижтиҳод билан истинбот қилинган 191 моддадан иборат дастур тайёрлаган. Барчамизнинг елкамизга ушбу дастурни қабул қилиб, уни воқеликда татбиқ қилишга ҳаракат қилмоқ ҳамда Пайғамбарлик минҳожи асосидаги рошид Халифаликни барпо этиш учун Уммат фарзандларидан, хусусан куч-қудрат аҳлидан Ҳизб ут-Таҳрирга нусрат талаб қилмоқ вазифаси тушмоқда.

Роя газетасининг 2022 йил 23 феврал чоршанба кунги 379-сонидан