Мусулмон эканлигингиздан фахрланасизми?
Мусулмон эканлигингиздан фахрланасизми?
بِسْمِ اللهِ الرَّحْمٰنِ الرَّحِيم
Сиз бу ҳаётда нима билан фахрланасиз? Аниқроғи, ўзингиздаги қайси сифат ёки хусусият ёки бошқа нарса билан фахрланасиз? Бу саволларимиз хоссатан мусулмонларга қаратилган. Саволни яна давом эттирамиз. Сиз ўзи нимани фахрланишга арзийди, деб ҳисоблайсиз? Албатта, сиз ушбу фахр туйғусини ҳис қилишни хоҳлайсиз. Балки ҳаётингизда бу туйғуни бир ёки бир неча маротаба ҳис қилиб улгургандирсиз. Масалан, ўзингиз бир муваффақиятга эришганингизда ўзингиз билан фахрлангандирсиз, яқинларингиз, фарзандларингиз ютуқларидан ёки сиз яхши кўрадиган футбол жамоаси муҳим ғалабани қўлга киритганда фахрлангандирсиз ва ҳоказо. Бироқ қачон охирги марта мусулмон эканлигингиздан фахрлангансиз? Бундай фахр туйғусини ошкора ёки яширин қачон ҳис қилгансиз? Балки бундай савол сизга, яъни ўзини мусулмонман, деб ҳисоблайдиган инсонга эриш туюлаётгандир. Албатта, сиз мусулмон бўлишнинг нимаси фахрланарли экан, шунга ҳам инсон фахрланадими, деб айтишингиз мумкин. Агар сизда бундай савол пайдо бўлмаган бўлса яхши, агар пайдо бўлган бўлса, демак, сиз мусулмон бўлиш нималигини яхши тушунмас экансиз.
Мўмин-мусулмон бўлишни яхши тушунган одам албатта бу билан фахрланадиган, бошини тик кўтариб юрадиган, бошқа дин вакиллари ёки худосизлардан бир бош баланд мақомда эканлигини ҳис қиладиган ва уларнинг олдида бўш келмай, заиф ва хор бўлишга рози бўлмай, уларга қарши ҳужумкор позицияда турадиган шахсиятга эга бўлади. Биз Ислом Умматининг бошқа умматлар, халқлар ва миллатлар орасидаги ҳурмат-эътиборимиз, обрўмиз ва ҳайбатимиз йўқолганлигининг сабабларидан бири мана шудир. Биз ўзимиз эътиқод қилаётган Ислом ақидасини тўғри деб биламиз, лекин уни нимага тўғрилигини, унга нимага эргашаётганлигимизни тушунмай қолдик. Тўғри деган гап фақат бировлардан эшитиш орқали ҳосил бўлган қуруқ маълумотга айланиб қолди. Инсоф билан ўзингизга савол бериб кўринг, ўзи мен нимага бу ҳаётда мусулмон бўлиб яшаяпман, деб. Хўш, жавобингиз борми?
Агар биз мусулмон бўлишнинг моҳиятини тушунганимизда, унинг қанчалик буюк неъмат эканлигини ҳис қила олганимизда ҳозиргидек кофир ва худосизларнинг таши ялтироқ, ичи қалтироқ ҳаёт тарзига ҳавас қилмаган, уларнинг бизга бу ҳаётда қандай яшаш кераклигини ўргатишларига йўл қўймаган бўлармидик. Уларнинг ботил, адолатсиз ва шафқатсиз системасини улоқтириб ташлаган бўлармидик. Чунки мусулмон одам Ўз Яратувчисини таниш орқали бу дунё ҳаёти ҳақида тўғри хулосага келади, шу хулосаси асосида бу ҳаётда тўғри турмуш тарзи билан яшайди. Кофир ва худосизларнинг нотўғри ва ёлғон ақидаларини рад этиш билан чекланмай, балки уларга ҳам тўғри йўлни кўрсатади. Ўзи эътиқод қилаётган дин унинг фахри ва Аллоҳнинг неъмати эканлигини кўрсата олади. Аллоҳ Таолонинг мана бу каломини ёдида сақлайди:
وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لَا يَعْلَمُونَ
– “Ҳолбуки, азизлик Аллоҳга, Унинг Расулига ва мўминларига хосдир. Лекин мунофиқлар билмаслар”. (Мунофиқун:8)
Биз мусулмонлар Яратувчимиз Аллоҳ Таоло мақтаган умматдирмиз:
كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللَّهِ
– “(Эй уммати Муҳаммад), одамлар учун чиқарилган умматларнинг энг яхшиси бўлдингиз, зеро сиз яхши амалларга буюрасиз, ёмон амаллардан қайтарасиз ва Аллоҳга иймон келтирасиз”. (Оли Имрон:110)
هُوَ سَمَّاكُمُ الْمُسْلِمينَ مِنْ قَبْلُ وَفِي هَذَا لِيَكُونَ الرَّسُولُ شَهِيدًا عَلَيْكُمْ وَتَكُونُوا شُهَدَاءَ عَلَى النَّاسِ
– “Токи (қиёмат кунида) пайғамбар сизларнинг устингизда гувоҳ бўлиши учун, сизлар эса (барча динлардаги) одамлар устидан гувоҳ бўлишингиз учун Аллоҳ ўзи сизларни илгариги муқаддас китобларида ҳам, мана шу (Қуръонда) ҳам мусулмонлар (яъни ўзининг динига бўйсунувчилар) деб атади”. (Ҳаж:78)
Бас, Аллоҳ Таолонинг мақтовига лойиқ бўлайлик!
Ҳизб ут-Таҳрирнинг Ўзбекистондаги медиа офиси. Абдуллоҳ
29.01.2021й
