Мусулмонлар хушёрликларининг табиий маркази – бу Ислом мабдасидир
بسم الله الرحمن الرحيم
Мусулмонлар хушёрликларининг табиий маркази – бу Ислом мабдасидир
Мусулмонлар хушёрликларининг табиий маркази деганда ўзи нимани тушуниш керак ва унинг аҳамияти қандай? Буни тушуниш учун оддий бир мисол келтирамиз. Кўпчилигимиз ўғрилар ҳақидаги кинофилмьларни кўрганмиз. Масалан, ўғрилар банкни ўмаришдан олдин уни қандай амалга ошириш режасини тузишади. Ҳаммага маълумки, банкларда сигнализация ўрнатилган бўлади, унинг вазифаси ўғрилик ҳодисаси ва бошқа вазиятларда банкнинг қўриқлаш хизмати ҳамда полицияни огоҳлантиришдир. Бугунги кунда, сигнализациясиз банк – бу қўйни бўрининг қўлига топширишдек гапдир. Ўғриларнинг олдида энг катта тўсиқ бўладиган нарса ҳам сигнализацияни қандай қилиб ўчириш ёки уни айланиб ўтиш бўлади. Улар бу ишни уддаласалар энг катта муаммони ҳал қилган бўладилар.
Мусулмонлар хушёрликларининг табиий маркази эса Ислом ақидаси ва ундан келиб чиқадиган тузумдир, яъни Ислом мабдасидир. Буни худди банкнинг сигнализациясига ўхшатса бўлади. Банк ўзининг одатдаги иш кунига ҳеч қандай хатар бўлмаган ҳолатда фаолиятини давом эттираверади. Юқоридаги мисолимизга кўра, агар ўғрилар банкни тунамоқчи бўладиган бўлса, ўз ўрнида сигнализация ҳам бундан огоҳлантиради. Яъни банк фаолиятига, унинг мулкига ва ходимларига хавф юзага келганлигини билдиради. Шунга ўхшаб, мусулмон ҳам ўз ҳаёти давомида турли ҳолатларга дуч келади. У қаршисида турган амалнинг ҳаром ёки ҳалоллигини билишда, бўлаётган воқеа-ҳодисаларни шариатга зид ёки мувофиқлигини англашда, шунингдек уларга баҳо бериш ва тўғри позицияни эгаллашда ва умуман ҳар қандай ҳолатда ҳам Ислом мабдасига мурожаат қилиши керак бўлади. У ўзининг хушёрлик маркази – Ислом мабдасига мурожаат қилган пайтда банкнинг сигнализацияси каби огоҳлантириш ишга тушиб кетса, демак у шариатга зид ҳолатга дуч келган бўлади ва бу “сигнализация” уни тўғри йўлдан тойилмай яшашда давом этишига кафилдир.
Агар мусулмон одамда ана шу “сигнализация” ўчиқ бўлса, яъни у Ислом мабдасига мурожаат қилмайдиган бўлса, ҳалол билан ҳаромни ажрата олмайдиган, ёлғонларга осонгина алданадиган, дўстни душман, душманни эса дўст деб биладиган, оқни қорадан, зулмни адолатдан фарқлай олмайдиган, бир сўз билан айтганда, сигнализацияси ўчирилган банк сингари осон ўлжага айланиб қолади. Шунинг учун ҳам, мусулмонни доимий хушёр туришида айнан мана шу хушёрлик марказининг аҳамияти беқиёсдир.
Аллоҳ бандаларини тўғри йўлда юришлари учун Ислом динини гўёки йўлни ёритувчи машъал сингари қўлларига тутқазиб қўйди. Муаммоларга ечимни Исломдан олишни буюрди, бошқа ҳар қандай манбани таъқиқлади. Мусулмон одам ўзини мусулмонлигини даъво қилар экан, ҳаётида дуч келадиган шахсий муаммоларига ечим олишдан тортиб токи дунёда бўлаётган воқеа-ҳодисаларга баҳо беришгача Исломга мурожаат қилиши вожиб ишдир. Масалан, бугунги кунда Ўзбекистондаги табиий бойликларнинг ҳисоб-китоби ҳукумат томонидан қатъий сир сақланади, қанча қазиб олинди, қаерга сотилди, унинг пули нима бўлди ва ҳоказо саволларга жавоб топиш амри маҳолдир. Мана шу ишга нисбатан Ўзбекистон мусулмонларининг позицияси қандай бўлиши керак? Улар бу борада ўз Исломларига мурожаат қилишганида эди, жуда аниқ ва тушунарли ечим олган бўлардилар. Пайғамбаримиз солаллоҳу алайҳи ва саллам дедилар:
«اَلْمُسْلِمُونَ شُرَكَاءٌ فِى ثَلاَثٍ: فِى الْمَاءِ وَالْكَلأِ وَالنَّارِ»
«Мусулмонлар учта нарсада шерикдирлар: сувда, оловда, ўт-ўланда». (Аҳмад ривояти)
Мана шу ҳадиснинг ўзи мусулмонлар юртларининг бойликлари уларга тегишли эканлигини, бу бойликларда ҳар бир мусулмоннинг ҳаққи борлигини исботлаб турибди. Демак, мусулмонлар ҳар қандай табиий бойликларнинг ҳисоб-китобини талаб қилиб олишга шаръан ҳаққилари бор, нафақат ҳаққилари бор, балки бу уларга вожиб ишдир. Шунга кўра, улар ҳукуматдан бойликларни қаёққа кетаётганини қатъий талаб қилишлари керак.
Шундай қилиб, мусулмонлар мана шундай тартибда Ислом мабдасини ечим олиш маркази қилиб олсаларгина тўғри йўлдан тойилмайдилар, бугунгидек фитна тўлиб-тошиб ётган даврда оқни қорадан, дўстни душмандан, зулмни адолатдан ажратишга қийналмайдилар.
Ҳизб ут-Таҳрирнинг Ўзбекистондаги медиа офиси Фаррух
04.04.2016й
