Мусулмонлар юртлари ва сунъий пайдо қилинган қашшоқлик!
بِسْمِ اللهِ الرَّحْمٰنِ الرَّحِيمِ
Мусулмонлар юртлари ва сунъий пайдо қилинган қашшоқлик!
"Бирлашган Миллатлар Ташкилоти кўмагида тайёрланган ва 24 апрель куни эълон қилинган йиллик ҳисоботга кўра, дунёда озиқ-овқат хавфсизлигидан азият чекаётган инсонларнинг учдан икки қисми атиги ўнта давлат ҳиссасига тўғри келади, уларнинг орасида Афғонистон ҳам бор. Бу давлатларнинг аксарияти мусулмонлар юртларидир.
Бу ҳақда Ҳизб ут-Таҳрир Афғонистон вилояти матбуот бўлими баёнотида шундай дейилади: «Бу воқелик шуни кўрсатадики, Афғонистон ва умуман мусулмон юртларидаги қашшоқлик ва очарчилик шунчаки тасодифий ҳодиса эмас, балки чуқур ва тизимли инқироз натижасидир».
Шунингдек, баёнотда бу вазият нафақат Ғарб мустамлакачилик урушлари оқибатлари, репрессив сиёсатлар, иқтисодий босимлар, мажбурий кўчиришлар ва Америкага малай ҳукмдорлар томонидан мусулмонлар ўртасида ихтилоф ҳамда бўлинишларга олиб келадиган фитна-курашларни авж олдириши натижаси, балки капиталистик иқтисодий тузумни татбиқ қилиш, шунингдек Жаҳон Банки, Халқаро Валюта Фонди ва Жаҳон Савдо Ташкилоти каби муассасалар томонидан юклатилган сиёсатларга содиқ қолишнинг бевосита натижаси эканлиги ҳам қайд этилган.
Баёнотда таъкидланишича: «Бу тузум инсониятнинг асосий муаммосини ҳал қилиш, яъни асосий эҳтиёжларини таъминлаш ўрнига, юзаки иқтисодий ўсиш ва умумий ишлаб чиқаришни кўпайтиришгагина эътибор қаратиб, айни пайтда, бойликни адолатли тақсимлаш масаласини бозор манфаати йўлида четга суриб қўяди. Натижада, бу бозор бойликнинг озчилик қўлида тўпланишига олиб келди ва кўпчиликни камбағаллик ҳамда машаққатда қолдирди».
Матбуот баёнотида яна шундай дейилади: «Афғонистон босиб олинган йигирма йил давомида мустамлакачи кучлар маъмурий коррупцияни, иқтисодий қарамликни ва ҳокимиятдагилар томонидан табиий бойликларни талон-торож қилишни мустаҳкамловчи тузилмаларни тизимли равишда жорий қилди. Натижада, мамлакат табиий бойликларга бой бўлишига қарамай, афғон халқи янада қашшоқлашди. Ҳатто бугунги кунда ҳам оғир солиқлар, хусусийлаштириш ва ишга қабул қилиш жараёнларида шаффофлик йўқлиги сабабли қашшоқлик янада ортиб бормоқда».
Шунингдек, баёнотда қуйидагилар таъкидланган: «Афғонистон ва бошқа исломий юртлардаги бугунги қашшоқлик — бой-бадавлат умматга мажбуран юкланган сунъий ҳолатдир. Исломий нуқтаи назардан иқтисодий муаммо – ресурсларнинг тақчиллигида эмас, балки бойликнинг адолатсиз тақсимланишидадир. Исломда қашшоқлик — инсоннинг асосий эҳтиёжларни (озиқ-овқат, кийим-кечак ва уй-жой) қондиришга қодир эмаслиги билан белгиланади ва бундай ҳолат қабул қилиниши асло мумкин эмас. Қашшоқликни табиий ва муқаррар ҳол деб ҳисоблайдиган капитализмдан фарқли ўлароқ, Ислом унга бутунлай йўқ қилиниши керак бўлган фавқулодда ҳолат деб қарайди. Ислом тарихи қашшоқликни тугатишнинг амалий мисолларига бойдир».
Сўнгра яна таъкидландики: «Туб ечим — кенг қамровли исломий иқтисодий тузумга қайтишдадир. Бу тузумнинг иқтисодий механизмлари, жумладан, закот масаласи, рибони (судхўрликни) ҳаром қилиш, табиий бойликларнинг умумий мулк деб ҳисобланиши ва давлатнинг фуқароларнинг асосий эҳтиёжларини таъминлашдаги бевосита мажбурияти бойликнинг адолатли тақсимланишини кафолатлайди. Бу тузумда бирор бир шахс асосий эҳтиёжлари таъминланмасдан қолдирилмайди».
Хулоса ўрнида Ҳизб ут-Таҳрирнинг Афғонистон вилояти матбуот бўлими чиқарган баёнотда шундай дейилади: «Афғонистон ва бошқа мусулмон юртларидаги қашшоқлик инқирозининг туб ечими фақат пайғамбарлик манҳажидаги иккинчи Рошид Халифаликни барпо этиш билан амалга ошади. Ушбу давлат Исломни тўлиқ татбиқ қилади, халқаро мустамлакачи ташкилотларнинг босими ва кўрсатмаларига бўйсунмайди, коррупцияга қарши курашади ва иқтисодиётни адолат, инсоний қадр-қиммат ҳамда бойликни адолатли тақсимлаш асосига қуради, шу билан қашшоқликни бутунлай тугатади».
Роя газетасининг 2026 йил 6 май, чоршанба кунги 598-сонидан
