Қолоқлик билан ривожланишни ажратиб олайлик

بِسْمِ اللهِ الرَّحْمٰنِ الرَّحِيم

Ҳар қандай уммат қолоқ бўлишни хоҳламайди, ҳаммаси ҳам замонасининг пешқадамларидан бўлишни хоҳлайди. Биз мусулмонлар ҳам тараққиётнинг энг олдинги сафларида, балки бутун дунё етакчиси бўлишни хоҳлаймиз. Тарихдан маълумки, бизнинг аждодларимиз шундай ролни бажариб келганлар, улар дунё карвонини бошқарадиган етакчилик ишини катта муваффақият билан амалга оширганлар ва бу ишни асрлар давомида ҳеч кимга бермай, ўзларида сақлаб келганлар. Чунки улар ривожланиш ва тараққиёт йўлини тўғри кўра олиш билан бирга бошқа умматлардан олиш мумкин бўлган нарсаларнигина олганлар. Олиш мумкин бўлган нарса билан олиш мумкин бўлмаган нарсани фарқига борганлар. Бироқ Ислом Умматининг сўнгги, хусусан бугунги авлодлари буни фарқлай олмаяптилар. Тараққиёт йўлини тўғри кўра олмаётганлари етмагандек, бу сўзнинг моҳиятини нотўғри тушуниб, унга эришиш йўлида бошқа умматларнинг ҳар қандай лойиҳа, тажриба ва услубларини қабул қилмоқдалар. Уларни олиш мумкин ёки мумкин эмаслиги тўғрисида ўйлаб ўтирмаяптилар.

Бу ўринда аҳамияти жиҳатидан ўта муҳим бўлган бир нуқта бор. Мусулмонлар бошқа умматлардан олиниши жоиз ва олиниши ножоиз бўлган нарсаларни ажратиб олишлари зарур. Демак, олиниши мумкин бўлмаган нарсалар: булар шундай нарсаларки, улар ғайримусулмонлар ақидасидан келиб чиқади. Яъни кофирлар ақидасига хос бўлган нарсалар. Чунки улар Ислом ақидасига зид бўлиб, мусулмонлар ҳеч қачон уларни қабул қилмасликлари лозим. Буларга кофирлар ақидасидан келиб чиққан сақофат, дунёқараш, фалсафа, қонунлар, лойиҳалар, бошқарув услублари кабиларни мисол қилиш мумкин.

Олиниши мумкин бўлган нарсалар: уларга кофирлар ақидасига хос бўлмаган, барча умматлар учун умумий бўлган нарсалар киради. Мусулмонлар уларни қабул қилиб, татбиқ қилишлари, фойдаланишлари жоиз, чунки улар Ислом ақидасига зид бўлмаган умумий нарсалардир. Масалан, тузумни татбиқ қилишда ижро соҳасига тегишли бўлган услублар, техника ва технологиялар, турли соҳаларга тегишли бўлган илмий тажриба ва лойиҳалар, ихтиролар ва ҳоказо. Мана шу асосда, яъни Ислом ақидасига зид келиши ва келмаслигига таянган ҳолда бошқа умматлардан фойдаланиш учун қабул қилинадиган нарсаларни ажратиш тўғри бўлади. Шундай қилинса, тараққий этиш иши тўғри йўналишга солинган бўлади.

Қолоқлигимизнинг сабабларидан бири бўлган ушбу масалага бефарқлигимиз давом этаверар экан, биз тараққий этиш ҳақида гапирмасак ҳам бўлаверади. “Ривожланган давлатлар тажрибаси” деган дастак билан ақидамизга зид бўлишига қарамай, ўйламай-нетмай тўғри келган нарсани татбиқ қилавериш бизни янада қолоқлаштиради. Ва биз аждодларимиз эришган тараққиёт чўққилари билан қуруқдан-қуруқ мақтаниб юрадиган умматлигимизча қолаверамиз.

Ҳизб ут-Таҳрирнинг Ўзбекистондаги медиа офиси. Фаррух   

30.11.2019й