بسم الله الرحمن الرحيم

Матбуот баёноти

Референдум ва янги Конституциядан асл мақсад президент Мирзиёевнинг президентлик муддатини узайтиришдир!

Ўзбекистон Олий Мажлиси Сенати (парламент юқори палатаси) парламентнинг қуйи палатаси томонидан қабул қилинган янги таҳрирдаги Конституция лойиҳаси бўйича 2023 йил 30 апрелда референдум ўтказиш тўғрисидаги қарорни 14 март куни бўлиб ўтган ялпи мажлисда маъқуллади. Конституциявий қонун лойиҳаси билан амалдаги Конституцияга 27 та янги модда киритилмоқда, моддалар сони 128 тадан 155 тага ошмоқда, Конституциянинг амалдаги 275 та нормаси 434 тага кўпаймоқда, яъни амалдаги Конституция 65 фоизга янгиланмоқда. Конституцияга киритилаётган ўзгартиришларнинг улканлигига қарамай, кўзланган мақсад юртимиздаги катта-ю кичикка аён бўлиб улгурган. Зеро, агар Конституция янгиланса – бу катта эҳтимол билан амалга ошиши кутилаётган ишдир – президент Мирзиёевнинг ҳокимиятда қолиши таъминланади. Чунки 2021 йил 24 октябрда бўлиб ўтган президентлик сайловларида Мирзиёев иккинчи муддатга сайланган эди, бу ҳозирги Конституция бўйича охирги муддатдир. Шунинг учун референдумдан асл мақсад президент Мирзиёевнинг учинчи муддатга сайланишига замин тайёрлашдир. Рефрендум орқали Конституцияни янгилаш олдинги ўша икки муддатни “ноллаштириб”, Мирзиёевнинг учинчи ва тўртинчи муддатга ўз номзодини қўйишига йўл очиб беради. Буни Ўзбекистон Сенати вице-спикери Содиқ Сафоевнинг қуйидаги сўзларидан тушуниб олиш мумкин:

“Агар янги Конституция қабул қилинса, бу барча фуқароларга, шу жумладан ҳозирги президентга ҳам янги Конституция бўйича сайловларда иштирок этиш имкониятини яратади”.

Албатта, Мирзиёевнинг ўз ҳокимияти умрини узайтиришига Ўзбекистон учун ўзаро курашаётган икки асосий геополитик ўйинчи – Россия ва Америка “кўк чироқ” ёқиб беряпти. Чунки референдум эълон қилинганидан кейин ҳам, ундан аввал ҳам бу икки йирик давлатнинг Конституцияни янгилашга нисбатан жиддий босим қилганлиги кузатилмади. Мирзиёев ҳам булардан хотиржам бўлган ҳолда референдумни халқчил қилиб кўрсатишга жиддий ҳаракат қилмоқда. Бу билан у янги Конституцияни қабул қилиб, ўз ҳокимияти умрини узайтириш гўё ўзининг эмас, балки халқнинг хоҳиши сифатида кўрсатмоқчи. Шунинг учун ҳам ҳукумат халқни референдумда фаол иштирок этишга тарғиб қилиб, бутун мамлакат бўйлаб тадбирлар уюштиряпти. Бу тадбирларда санъаткорлар, машҳур шахслар, вазирлар, ҳокимлар, ҳатто “дин уламолари” ҳам иштирок этиб, халқни референдумда фаол қатнашишга тарғиб қиляпти. Лекин бу “ноллаштириш” ҳақида ҳеч ким гапирмаяпти, бунга матбуотда умуман эътибор йўқ, Мирзиёевнинг ўзи ҳам учинчи муддатга қолиш режалари ҳақида чурқ этгани йўқ. Аксинча ҳукумат мулозимлари конституцияга ўзгариш киритишларни Мирзиёев бошлаган ислоҳотларни давом эттириш учун ташланаётган бир муҳим қадам сифатида кўрсатишяпти. Албатта, ҳукумат бундай спектаклни бутун дунёга, хусусан Ғарбга Конституцияни янгилаш халқнинг хоҳиш-иродаси эканлиги ва демократик қонун-қоидалар асосида ўтказилаётганлигини кўрсатиш мақсадида уюштирмоқда. Яъни халқни навбатдаги “ухлатиш” кампанияси кетяпти!

Биз юртимиздаги мусулмонларга хитобан шуни айтамизки, бундай спектаклда иштирок этиб ўз бошингизга яна бир диктаторлик тузумини ўрнаштириб оласиз. Шунинг учун референдумда иштирок этишдан бош тортинг ва уни бойкот қилинг! Зеро, капитализм каби куфр тузумларда, айниқса авторитар режимларда қонун ва Конституциялар вақт ўтиши билан эскириши ва ислоҳ қилишга доимо муҳтож бўлиши етмаганидек, диктаторлар ва капиталистлар ўз хоҳишларига қараб ўзгартириб олаверадилар. Бироқ референдумни рад қилиш ва бойкот қилиш ҳақиқий ечим эмас. Ҳақиқий ечим Исломда бўлиб, ундаги Конституция ва қонунлар Яратувчи Зотнинг аҳкомлари асосида ишлаб чиқилгани учун асло эскирмайди ва ўзгармайди, ислоҳ қилишга муҳтож бўлмайди. Чунки Ислом ҳар қандай замон ва маконга мос келадиган ечимларга эга.

Эй Ўзбекистон мусулмонлари! Ўзингизга маълумки, ҳалолни ҳаром, ҳаромни эса ҳалол қилувчи конституция ва қонунлар куфрдир! Бу куфр конституциялари ва қонунлари сизларга қашшоқлик, азият, кулфат, мусибатдан бошқа нарса келтирмаганига, устингиздаги диктатор ҳокимлар фақат ўзларининг мустамлакачи кофир хўжайинларини рози қилишга ҳаракат қилишига узоқ йиллардан бери гувоҳ бўлиб келмоқдасиз. Шундай экан, бу куфр конституциялари ва қонунларини куфр режимлар билан бирга қўшиб тарих ахлатхонасига улоқтиринг! Ислом ақидаси ва Шариат аҳкомлари асосида ишлаб чиқиладиган Конституция ва қонунларни олиб келувчи Пайғамбарлик минҳожи асосидаги Рошид Халифалик Давлатини тиклашга ҳаракат қилаётган Ҳизб ут-Таҳрирга ёрдам беринг! Зеро, бунда Аллоҳ Субҳанаҳу ва Таолонинг ризолиги бор!  

وَفِي ذَٰلِكَ فَلْيَتَنَافَسِ الْمُتَنَافِسُونَ

– Бас, баҳслашгувчи кишилар (мана шундай мангу неъматга етиш йўлида) баҳслашсинлар.     (Мутоффифyн:26)

Ҳизб ут-Таҳрирнинг Ўзбекистондаги матбуот бўлими