Салимова Марғуба аянинг вафотлари муносабати билан таъзия
Салимова Марғуба аянинг вафотлари муносабати билан таъзия
بِسْمِ اللهِ الرَّحْمٰنِ الرَّحِيمِ
Узоқ йиллар давомида золим Каримов режими қамоқларида умри ҳазон бўлган Мирислом биродаримизнинг волидаи муҳтарамалари Салимова Марғуба Абдуллоҳ қизи 24 ноябр, душанба куни 86 ёшда Аллоҳга омонатини топширдилар. Марғуба ая 4 нафар балоғатга етмаган фарзандлари билан ёш бева қолгандилар. Шунга қарамай, онахон ёлғиз аёл боши билан фарзандларига Аллоҳни танитиб, Исломий тарбия бериб улғайтирдилар. Ушбу гўзал тарбия натижаси ўлароқ, фарзандлар даврасида умргузаронлик қиламан деб турганларида яна бир кутилмаган оғир синов бошларига тушди. Қонхўр Каримов режимининг Ислом ва мусулмонларга қарши қаратилган зулм машинаси ишга тушган даврда Марғуба аянинг ўғли Мирислом ҳам унинг қурбонига айланди. Бунга Мирисломнинг ёшликдан олган Исломий тарбияси ва ундан кейин Ислом асосида уйғониб, мусулмонларга Исломий ҳаёт билан яшаш фарзлигини ва бу фақат Халифалик давлатида гавдаланиши мумкинлигини англаб етгани сабаб бўлганди.
Шундай қилиб, Марғуба ая қарийб 20 йил давомида мазлум ўғли ортидан қатнамаган қамоқхона қолмади ҳисоб. Ая ўғли билан учрашувларида унга далда бериб: “Ўғлим, сабр қил, бу кунлар ота-боболарингдан мерос. Улар аҳли илм, қори эдилар. Қуръон ва Суннатга амал қилишгани учун босмачи деб ўлдиришган, қамашган, сургун килишган. Ҳозир эса Исломга амал қилувчиларни террорист ва экстремист деб қамаяпти, ўлдиряпти. Аллоҳ бизларни Ислом билан азиз қилди. Исломга амал қилганингиз учун сизларни қамади. Сизлар тўғри йўлдасиз, бу йўл боболаримиз мероси, Пайғамбаримиз ﷺнинг омонатлари”, – дер эдилар.
Шу билан бирга, ўша пайтда қамоқдаги мазлум мусулмон йигитларга ғайриинсоний жисмоний ва руҳий азоб-уқубатлар етказишдек жирканч иш устида турган золим бошлиқларнинг юзига тик қараб, жасурлик билан уларнинг ноҳақлиги ва золимлигини айтганлар. Улар ҳам аядаги бундай жасоратни кўриб тан беришган, ҳурмат-иззат кўрсатишган. Бу, албатта, Аллоҳдан қўрқиш, Унгагина суяниш ва таваккул қилишнинг самараси эди.
Онахон Аллоҳга берган ваъдасида қаттиқ турган пок-иффатли, ўзи заифа бўлса-да, тоғдек суянч бўла оладиган жасоратли муслима эдилар. Ҳеч шубҳасиз, Марғуба аянинг ҳаёт йўлини бугунги ёш авлодга намуна қилиб кўрсатишга арзийди.
Биз ўз замонининг Сумайяси бўлган Марғуба аядан жудо бўлганимиздан чуқур қайғуга ботган ҳолда Аллоҳдан онахонни ўз раҳмати ила буркашни, Фирдавсу Аъло аҳлидан қилишини, Марғуба ая ният қилганларидек Росулуллоҳ ﷺ “Онахон Жаннатга сиз биринчи бўлиб киринг” дейдиган бандаларидан қилишини сўраб дуои илтижо қиламиз. Биродаримиз Мирислом ва аянинг бошқа яқинларига чуқур таъзиямизни изҳор қиламиз ҳамда Аллоҳдан офият ва гўзал сабру жамил сўраб қоламиз. Бундай ҳолларда вожиб бўлган энг муносиб ушбу сўзни айтамиз:
إِنَّا لِلَّهِ وَإِنَّا إِلَيْهِ رَاجِعُونَ
Албатта, биз Аллоҳникимиз ва, албатта, биз Унга қайтгувчимиз.
Ҳизб ут-Таҳрир Ўзбекистон матбуот бўлими
