Шундай бир нур борки, унинг ёруғлиги асло сўнмайди!

بِسْمِ اللهِ الرَّحْمٰنِ الرَّحِيم

Аллоҳ Субҳанаҳу Ўз каломида айтади:

يُرِيدُونَ لِيُطْفِئُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ

– “Улар Оллоҳнинг нурини (яъни Исломни) оғизлари (яъни беҳуда гаплари) билан ўчирмоқчи бўлурлар. Оллоҳ эса, гарчи кофирлар истамасалар-да, Ўз нурини (яъни динини) тўла (яъни ҳар тарафга) ёйгувчидир”.                                             (Соф:8)

Дунё тарихига назар солган инсон англаб етиши мумкин бўлган бир ҳақиқат борки, барча замонларда иймон ва куфр жангги давом этиб келган ва ҳануз давом этмоқда. Масалан, бизнинг юртларимизни кўрадиган бўлсак, етмиш йил умр кўрган собиқ Совет Иттифоқи худосизликка асосланган даҳрий тузум бу умматнинг дини бўлган Исломдан узоқлаштириш учун қўлидан келган барча ишларни амалда татбиқ этди. Давлат органлари Исломнинг ҳар қандай кўринишига қарши қатъий чораларни қўллади. Жумладан, ўсмир-ёшларни Исломни ўрганишидан тўсиш учун барча диний урф-одатларни тақиқлаш, ҳатто ўз уйларида ёш фарзандларига Қуръон таълимотини ўргатаётган дин кишиларига таҳдидлар қилиш, ҳибсга олиш ва ҳоказо.

Аммо ҳукумат томонидан ушбу қатъий чоралар кўрилишига қарамасдан, Исломни инсонлар қалбидан суғуриб ташлай олмади. Сабаби, диндорлик инсоннинг табиий фитратидир. Шу ўринда,  мутафаккир олим, шайх Тақийюддин Набаҳонийнинг “Ислом низоми” китобидан иқтибос келтирамиз: “Аллоҳнинг борлигини инкор қиладиган, руҳни инкор қиладиган моддий мабда вужудга келишига қарамасдан, бу табиий тадайюн (диндорлик)ни йўқ қила олмади. Фақат инсоннинг ўзидан буюкроқ, қудратлироқ куч ҳақидаги тасаввурини, бу кучни муқаддаслаштиришини ўзгартириб, бу куч моддий мабда ва унинг доҳийларида деб тасаввур қилишга, бу мабда ва унинг доҳийларини муқаддаслаштиришга-улуғлашга ўргатди. Гўё бу мабда яна орқага қайтиб, инсонларнинг муқаддас деб билишини Аллоҳга ибодат қилишдан бандаларга ибодат қилишга, Аллоҳнинг оятларини муқаддас деб билишдан махлуқотларнинг сўзларини муқаддас деб билишга айлантирди. Айни шу хусусда бу мабда реакцион (жаҳолатпараст)дир. У тадайюн ғаризасини йўқ қила олмади, балки чалғитиш орқали реакцион тусда унинг ўрнини алмаштириб қўйди. Шунинг учун ҳам бу мабданинг мафкураси инсон табиатига тескари ва салбий мафкурадир. Шу туфайли коммунизм мафкураси фитрий жиҳатдан муваффақиятсизликка учради. Ошқозонни тузоқ қилиб, ўз мафкурасини ўтказиш учун ҳийлалар ўйлаб топди. Бу мафкура оч-юпунларни, қўрқоқ-ҳамиятсизларни ва ноумид-йўқсилларни ўзига жалб қилар эди. Бу мафкурани асосан тубанлашиб кетган, ҳаётда муваффақият қозона олмаган, омадсиз, бировларнинг бахтини кўра олмайдиган ҳамда ақлан носоғлом кишилар қабул қилар эди. Яна бу кишилар сезги ва ақлнинг гувоҳлигида бузуқлиги ва нотўғрилиги яққол кўриниб турган диалектика (ривожланиш) назариясини кўкларга кўтариб оғиз кўпиртирсалар, уларни кучли тафаккур эгалари дедилар. Бу мафкура одамларни ўз мабдасига бўйсундириш учун куч ва зўравонликни қурол қилди. Бундан тазйиқ, тақиқ ва таъқиблар келиб чиқди. Унинг энг муҳим воситалари қўзғолонлар, бетартибликлар, вайронагарчиликлар ва беқарорликлардан иборат эди”.

Ҳа, худосизликка асосланган бу мафкура ҳеч қандай натижага эриша олмаганлиги тез кунда яққол кўзга кўринди. Бу тузум ўтган асрнинг охирларига келиб дунё саҳнасида ўз ўрнини йўқотди. Буюк қудрат эгаси бўлган Аллоҳ Субҳанаҳу томонидан юборилган Ислом мафкураси мана шундай тўсиқларни енгиб ўтиб хамон ўз нурини ёйишда давом этмоқда. Ушбу нур асло сўнмагай, гарчи динимиз душманлари бўлган кофир ва мушрик кимсалар ёқтирмасалар ҳам!

 Аллоҳ Таоло айтади:

هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ

– “У (Аллоҳ) Ўз пайғамбарини ҳидоят ва ҳақ дин билан — гарчи мушриклар хоҳламасалар-да — барча динларга ғолиб қилиш учун юборган зотдир”.  (Тавба:33)

Ҳизб ут-Таҳрирнинг Ўзбекистондаги медиа офиси. Зайниддин

04.07.2020й