Сисий Миср аҳлига хоинлик қилиш ва яҳудийларга хизмат қилишда аввалги раҳбарлардан ҳам ўтиб тушди
بسم الله الرحمن الرحيم
Роя газетаси:
Сисий Миср аҳлига хоинлик қилиш ва яҳудийларга хизмат қилишда аввалги раҳбарлардан ҳам ўтиб тушди
Тель-Авивдаги сафарбарлик: Яҳудийлар давлати Сисий иқтисодини қутқариши мумкинми?
«Intelligence Online»нинг хабар қилишича, яҳудийлар давлати Қоҳира билан Риёз ўртасидаги муносабатлар дарз кетиши ортидан Мисрдаги иқтисодий тебранишларни эътиборга олган ҳолда, ўзининг регионал иттифоқчиси Сисийни қўллаб-қувватлаш масаласини кўриб чиқмоқда.
Яҳудийлар давлати хавфсизлик хизмати доираларида Мисрдаги ёмон иқтисодий вазиятга нисбатан хавотир мавжуд. Сўнгги кунларда бу давлатнинг мудофаа вазирлиги, ҳарбий кучлар ва хавфсизлик хизмати стратеглари бир неча йиғинлар ўтказиб, бу йиғинларда ўзларининг энг кучли иттифоқчилари бўлган президент Абдулфаттоҳ Сисий иқтисодига ёрдамлашиш воситаларини муҳокама қилдилар.
Мазкур манба ҳисоботларига кўра, яҳудийлар давлати хавфсизлик масъуллари, ўз иқтисодий вазирликлари орқали Мисрдаги инвестицион иқтисодни бевосита қўллаб-қувватлашни ҳамда у ердаги бизнес жамияти, бутун дунёдаги, хусусан, АҚШдаги ширкат ва шахсларни ҳаракатлантиришни ҳамон афзал, деб билмоқдалар. Уларга кўра мазкур доиралар энергетика, қишлоқ хўжалиги ва алоқа секторларига сармоя ётқизишлари мумкин.
Яҳудийлар давлати юқори лавозимдаги масъуллар ҳамма нарсадан кўра кўпроқ умид қилишаётган нарса шуки, ҳар қандай қўллаб-қувватлаш Миср жунайҳига ижобий таъсир қилмай қолмайди. Чунки Саудиянинг нефт етказиб беришни тўхтатиш қароридан сўнг бугун Миср фунти бир неча кун аввалги қийматидан 45 % тушиб кетган.
Маълумки, Сисий қудратга келгандан бошлаб, Миср ўзини яҳудийлар давлати учун минтақада энг яқин иттифоқчи эканини намоён этди. Икки томон ўртасидаги разведка ва ҳарбий соҳадаги ҳамкорлик етмишинчи йиллар ниҳоясида муносабатлари нормаллашганидан бери энг кучли ҳамкорликка айланган.
Манбада таъкидланишича, яҳудийлар давлати ўз хавфсизлик хизматини, Моссад, «Shin Bet» ва «8200» каби қисмларини «ИШИД»га алоқадор қуролли гуруҳлар ва бошқаларга қарши урушда Миср хавфсизлик хизмати ва мудофаа вазирлигига ёрдам беришга сафарбар этган.
Бундан ташқари, яҳудийлар давлати ўзининг бир нечта ҳарбий учоқларини, шу жумладан, учувчисиз бошқариладиган учоқларини Қоҳиранинг Синай шимолидаги жиҳодчилар жойлашган ерларни нишонга олишига ёрдамлашиш учун ажратди. Шунингдек, Миср армиясига, ҳаво кучларига бир неча минг аскарларини Синайга жойлаштиришга ва у ердаги ҳаво базаларини қайта очишларига ҳам рухсат берди. (Аср журнали).
