بِسْمِ اللهِ الرَّحْمنِ الرَّحِيمِ

Таровийҳ намозининг ўқиши нархи 1 000 000 сўм !!!

Ҳукумат тарафидан Ислом ва мусулмонларга бўлаётган зулм ва хорликлар кўпайса кўпаймоқдаки, асло камайгани йўқ. Бу ҳолат муборак Рамазон ойида ҳам давом этмоқда. “Озодлик” нинг хабарига кўра, “Қўқон шаҳридаги касб-ҳунар коллежларидан бирининг ўқувчиси 29 июнь куни таровийҳ ўқиш учун борганида шаҳардаги Жоме масжидига қўйилмаганидан шикоят қилди. Коллеж ўқувчиларининг мурожаати ортидан Озодлик мухбирининг аниқлашича, шаҳарда бу йилги Рамазонда ҳам мактаб ва коллеж ўқувчиларининг масжидда ўқиладиган жума ва таровеҳ намозларига қатнашига тақиқ қўйилган.  

Қўқон шаҳридаги касб-ҳунар коллежларидан бирининг 2-босқичида ўқийдиган ўқувчи 29 июнь куни оқшом шаҳардаги жоме масжидига киритилмаганини айтиб, Озодликка боғланди. Унинг айтишича, у намозга маҳалладош синфдошлари билан бирга борган ва масжид остонасиданоқ нотаниш кимсалар томонидан қайтарилган.

– Кечқурун борсак, масжид эшиги ёнида турган оддий кийимдаги икки киши тўхтатди. Кимсан, ёшинг нечада, деб сўради ва кейин ўқувчиларга таровийҳга келиш мумкинмас, агар яна келсанг 1 миллион сўм жарима соламиз, яна келсанг қамаймиз, деб қўрқитди. Қарасак, катталар индамай кириб кетишаётган эди, биз ҳам қайтиб келавердик, – дейди исмини сир сақлашимизни сўраган қўқонлик ўқувчи. Озодликнинг Фарғона водийсидаги манбаси бу мурожаатдан сўнг Қўқон Жоме масжидига боғланди.

"Бизнинг масжидда шунақа бўлибдими? Биз эса намозда бўлганмиз, кўрмадик унақа нотаниш кишиларни. Лекин аслида болалар дарсдан қолмасин, деган гаплар қилинаяпти. Таровийҳ намозлари ҳам кеч ўқилаяпти, болалар чарчаб қолса, эртаси куни ўқишида ҳам қийналадида. Шунинг учун, уйда ота-онангиз билан ўқинг, деган гаплар қилинаяпти", деди Озодлик манбаси билан суҳбатлашган Жоме масжиди ходими. "20 ёшга тўлмаганлар масжидга қўйилмасин" деган талаб борми, бўлса кимдан, деган саволга Қўқондаги масжид ходимидан шундай жавоб олинди: 

"18 ёшдан кичиклар келмасин, деган гаплар бор. Ҳали айтганимдай, дарсдан қолмасин, деган мақсадда", деди масжид ходими. Аммо, масжид дарвозасини қоровуллаётганлару, ўқувчиларнинг масжиддаги ибодатини тақиқлаётганлар шаҳар Ички ишлар бошқармасидан эканига аниқ ишорат берди.

"Болалар тинчгина уйида намозини ўқиса яхшида, хотиржамроқ бўлади. Биз энди ўқувчиларни масжидга жалб қилолмаймизда", деди ожизона тавсиясини тилга келтирган Қўқон шаҳридаги масжид ходими”.

Бу зулм ва хорликлар етти ёшдан етмиш ёшгача бўлган барча одамларни ўз ичига олади. Айниқса, ёшларни иложи борича Исломдан узоқлаштириш – уларнинг олдига қўйган мақсадларидан биридир. Бунинг учун улар катта жарималар ва қамоқ билан ёшларни қўрқитмоқдалар. Шу ўринда, ёши катталарга ҳам ҳайрон қоласан, ахир улар шу болаларни, гарчи улар қўшнисининг ёки маҳалладошининг болалари бўлган тақдирда ҳам, ҳимоя қилишлари керак эдику, ахир бир болага етти маҳалла ота-она, деган мақол бекорга айтилмагандир? Шу даражада ҳам лоқайд ва худбин бўлиб кетадими одам деган? Бизнинг қон томиримиз бўлган Исломга куфр малайлари болта ураётган бир пайтда, қўлидан ушлаб тийиб қўйиш ўрнига, кўриб туриб кўрмасликка олиб индамай кетганингизни Аллоҳ кўрмайди, деб ўйлайсизми ёки бу менинг ишим эмас, деб тескари қараб ўтиб кетганингиз учун Аллоҳнинг олдида жавоб бермайман, деб ўйлайсизми? Йўқ, бу айнан сизу бизнинг ишимиз, чунки Пайғамбар алайҳиссалом бир ҳадисда: “Агар мункарни кўрсангиз, уни қўлингиз билан тўхтатинг, қўл билан иложи бўлмаса тил билан тўхтатинг, шуни ҳам иложи бўлмаса дилларингизда ёмон кўриб туринг, ундан у ёғида иймон йўқдир”, деб айтганлар.

Масжид ходимининг гапи эса бизга янгилик эмас, улар аллақачон ўз бурчларини, яъни Исломни халққа етказишдек олий бурчни унутиб қўйганлар. Уларга бир амал берилгандек, масжидга худди ишхонага келиб-кетаётгандек муносабатда бўлиб қолишган. Бу масъулиятни нақадар шарафли эканлигини билишмайди ёки билишни ҳоҳлашмайди.

Биз мусулмонликни даъво қилар эканмиз, бу номга муносиб бўлишимиз керак. Мусулмон Исломни маҳкам ушласагина икки дунё саодатини қўлга киритади. Шундай экан, бизни тўппа-тўғри жаҳаннамга етаклаб кетаётганларга: йўқ, бўлди етар, сенларга бор-будимни бериб бўлдим, энди фарзандларимни бермайман; йўқ, бўлди етар, сенларга иймонимни бериб бўлдим, энди фарзандларим иймонини бермайман; йўқ, бўлди етар, сенларга эргашиб ўзимни ҳам, фарзандларимни ҳам охиратини куйдирмайман, деб айтишдек жасорат беришини Аллоҳдан сўраймиз.

Фаррух

04.07.2014й.