Тинчлик шиорлари ортидаги қонли излар 

بِسْمِ اللهِ الرَّحْمٰنِ الرَّحِيمِ

10 сентябр куни Тошкентда Иккинчи халқаро форум – “Декларациялар мулоқоти” ўз ишини бошлади. Уч кун давом этадиган бу анжуман Президент ҳузуридаги Стратегик ва минтақалараро тадқиқотлар институти томонидан АҚШнинг “Love Your Neighbor Community” нодавлат ташкилоти билан ҳамкорликда, шунингдек, Дин ишлари бўйича қўмита, Ўзбекистон Ташқи ишлар вазирлиги ва Ислом цивилизацияси маркази кўмагида ташкил этилди.

Форум расман тинчлик, диний бағрикенглик ва ҳамжиҳатлик шиорлари остида ўтаётган бўлса-да, саҳнасидаги асосий иштирокчилар – АҚШ, Британия ва Хитой дунёдаги урушлар, зиддиятлар ва исломофобиянинг бош манбаи эканини унутмаслик керак.

Ташкилотчи сифатида қатнашаётган Америка ва унинг соясида юрадиган Британия геосиёсий манфаатлари йўлида инсоният тақдирини қурбон қилишдан бир дақиқа ҳам тўхтамаяпти.

Британия 1917 йилги Бальфур декларацияси орқали Фаластин тақдирини яҳудий вужудини қуриш эвазига қурбон қилди. Бугунги Ғазодаги фожеаларнинг илдизи айнан Британиядан бошланган. АҚШ эса, Ғазодаги қонли қирғин ортида турган ҳолда бугунги кунгача (исроил)га энг йирик ҳарбий, иқтисодий ва сиёсий ёрдамчи ҳисобланади. Шунингдек, Ҳиндистондан Африкагача бўлган ҳудудларда Британия олиб борган мустамлакачилик сиёсатининг асоратлари ҳали ҳам йўқолмади. Британия Америка билан биргаликда нефт манфаатлари учун араб дунёсидаги зиддиятларни қўзғатишдан ортиқ иш қилмаган.

Американинг 2000 йиллардаги интервенциялари бутун минтақани издан чиқариб, миллионлаб қурбонларга сабаб бўлди. Россияга қарши Украина орқали геосиёсий уруш олиб борар экан, урушни узайтириш учун тинчликни эмас, балки зиддиятни кучайтирмоқда.

Хитой эса ўзини Ғарбга қарши “мувозанат кучи” сифатида кўрсатса-да, Ғарбий Туркистондаги мусулмонлар устида олиб бораётган систематик қийноқ, ассимиляция ва тазйиқ сиёсати билан мусулмон халқларнинг ашаддий душманларидан бирига айланди. У ерда мусулмон бўлиш – экстремизм, лицензиясиз ибодат қилиш эса жиноят ҳисобланмоқда. Бундан ташқари, Хитой иқтисодий сармоя номи билан Ўзбекистон сингари кўплаб исломий юртларни қарз домига тортмоқда.

Шундай экан, бу каби мустамлакачи давлатлар ташкил қиладиган ёки иштирок этадиган ҳар қандай форум ёки саммит тинчлик учун эмас, балки инсоният устидаги ҳарбий ва ғайриинсоний жиноятларини оқлаб бериш учун ритуалларга айланган. Аслида, улар бу майдонларни ўзининг манфур геостратегик мақсадлари учун ишлатади. Шунинг учун бугунги глобал кескинликлар ва урушларнинг асосий сабабчилари ҳам айнан мана шу мустамлакачи давлатлардир.

Америка ва Британиянинг Ғазодаги жиноятлари, Хитойнинг уйғур мусулмонларига қарши сиёсати – исломофобиянинг энг юқори чўққиси ҳисобланади. Улар турли қитъаларда, турли услубларда ҳаракат қилса-да, мақсади бир: мусулмонларнинг сиёсий, иқтисодий ва ҳарбий куч сифатида тикланишига йўл бермаслик. Шунинг учун Тошкент форумининг асосий мақсади – мусулмонларни Ислом ҳақиқатини тушунишдан узоқлаштириб, ҳаёт майдонида ҳеч бир таъсирга эга бўлмаган “денгиз кўпиклари”га айлантиришдир. Чунки Ислом Умматини Буюк Умматга айлантириб, дунё саҳнасида ҳарбий ва иқтисодий қудратга айлантирадиган нарса – фақатгина Ислом ва унинг асосида барпо бўладиган Рошид Халифалик давлатидир. Аллоҳ таоло айтади: 

وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَٰكِنَّ الْمُنَافِقِينَ لَا يَعْلَمُونَ

– “Ҳолбуки, куч-қудрат Аллоҳники, Расулиники ва мўминларникидир. Аммо мунофиқлар билмаслар”. (Мунофиқлар:8)

Иззатуллоҳ

15.09.2025й