بِسْمِ اللهِ الرَّحْمنِ الرَّحِيمِ

Ҳукумат халққа электрни узлуксиз етказиб беришни хоҳлайдими?

Совуқ қиш остонасида турган Ўзбекистон халқининг кўнглида ғашлик оралаб юрган бўлса ажаб эмас. Чунки қишнинг қаҳратон совуғида газ ва электрнинг бўлмаслигига кўникиб кетган одамлар, бу йилги қишни қандай қилиб чиқаришни ўйлаётган бўлсалар керак. Энди ҳукумат бу масалага қандай қарамоқда, бу йилнинг қишини халқимиз қандай чиқаради? Бу ҳақда kun.uz хабар бермоқда.  

“Вазирлар Маҳкамасининг 21 октябр куни бўлиб ўтган мажлисида иқтисодиёт тармоқлари, уй-жой фонди, ижтимоий соҳа объектларини ва ишлаб чиқариш инфратузилмасини куз-қиш даврига тайёрлаш ишлари тўғрисидаги ҳисоботлар эшитилди.

«Ушбу масалани муҳокама қилишда раҳбарларнинг эътибори иқтисодиёт тармоқлари, ижтимоий соҳа объектлари ва турар-жой фондининг 2014-2015 йиллар куз-қиш даврига тайёрлиги ва барқарор фаолият кўрсатиши, шу жумладан, газ-транспорт ва энергия билан таъминлайдиган объектлар барқарор ишлашини, табиий газ, кўмир ва электр энергияси узлуксиз етказиб берилишини таъминлаш учун шахсан масъул эканликларига қаратилди», – дейилади ЎзА хабарида.

Қайд этилишича, ушбу масалада Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, «Ўзбекэнерго», «Ўзтрансгаз» компаниялари, «Ўзбеккўмир» акциядорлик жамияти, шунингдек, бир қанча вазирликлар ва идоралар раҳбарлари масъулдирлар.”

Демак, ҳукумат халқ ҳақида ҳозирданоқ “ташвишланмоқда”. Шу мақсадда бўлса керак, ўтган йили электр-энергияси ишлаб чиқариш ҳажми кўпайтирилган:

kun.uz: “2013 йилнинг январь-март ойларида Ўзбекистонда электр энергиясини ишлаб чиқариш ҳажми ўтган йилнинг худди шу давридаги кўрсаткичдан 5,1 фоизга ўсган. «Новый век» газетасининг Давлат статистика қўмитаси вакилига асосланиб тарқатган хабарига кўра, 2013 йилнинг биринчи чорагида Ўзбекистонда 13,965 миллиард киловатт/соат электр энергияси ишлаб чиқарилган.

Ўзбекистонда электр энергиясини ишлаб чиқариш салоҳияти 56-57 миллиард киловатт/соатни ташкил этади.”

Бироқ, электр-энергия ишлаб чиқаришни кўпайтиришдан мақсад, аҳолини узлуксиз электр билан таъминлаш эмаслиги кундай равшан. Чунки ҳукумат электрни четга кўпроқ сотиш учунгина ишлаб чиқариш ҳажмини орттирган кўринади:

kun.uz: “«Ўзбекэнерго» акциядорлик компанияси тўғридан-тўғри шартномалар бўйича қўшни мамлакатларга электр энергияси етказиб берди. Бу ҳақда компания матбуот хизмати хабар бермоқда.

Компания ахборотида қайд этилишича, қўшни мамлакатларга электр энергияси етказиб берилишидан ташқари улардаги электр тармоқларига хизмат кўрсатилган, лойиҳавий-қидирув ва қурилиш-монтаж ишлари олиб борилган.

Айнан қайси мамлакатларга электр энергияси етказиб берилгани, қайси мамлакатларда хизматлар амалга оширилгани тўғрисида батафсил ахборот берилмаган.

Қайд этишларича, 2014 йилнинг биринчи ярим йиллиги давомида «Ўзбекэнерго» томонидан маҳсулот ва хизматлар экспорти ҳажми ўтган йилнинг шу даврига нисбатан 23 фоизга ўсган.”

Мана энди ўзингиз баҳо беринг ҳукуматнинг қилаётган ишларига. Бу маълумотларни биз ўйлаб топмадик, ичимиздан тўқимадик. Бу ҳукумат ўз халқи зор бўлиб турган электр-энергиясини четга сотиб, чўнтагини тўлдиришдан бошқа иш қилаётгани йўқ. Қиш тугул, хатто ёзнинг иссиқ кунларида ҳам электрни тузук-қуруқ бермаётган бу ҳукумат, ўша четга сотилаётган электрнинг, ҳеч бўлмаганда, қанча миқдорда сотилди, ундан қанча даромад олинди, у даромад қаерга ишлатилди ва ҳоказо маълумотларни ҳам бермайди. Бера олмайди ҳам, чунки бунақа маълумотлар халққа ошкор қилинадиган бўлса, ўзларининг қинғир ишлари ошкор бўлиб қолади.

Ўзимизни алдашга йўл қўйиб бераётганимиздан унумли фойдаланаётган бу ҳукуматга яна қачонгача алданиш мумкин? Ҳамма бойликларимизни еб битирганларидан кейинми ёки биз ўлар ҳолатимизга етиб борганимиздами?

Ҳизб ут-Таҳрирнинг Ўзбекистондаги медиа офиси Фаррух

27.10.2014й.