Ҳукумат порани қонунийлаштириш орқали унга қарши курашмоқчи

بسم الله الرحمن الرحيم

Юртимизнинг у ёки бу ерида турли даражадаги давлат хизматчилари, ҳокимлар, уларнинг ўринбосарлари ва бошқаларнинг пора олаётганда қўлга тушганлиги тўғрисида кунда кунора хабарлар тарқалмоқда. Аслида, халқимиз шу хабарларсиз ҳам порахўрлик ва коррупция ҳар бир соҳада ақлбовар қилмас даражада чуқур илдиз отганини яхши билади. Ҳар қандай давлат идорасида “совға”сиз иш битириш деярли имконсиз эканлиги одамлар зеҳнига ўрнаб бўлган. Шунинг учун бирор иш билан давлат идорасига ташриф буюрган одам “муомала”сини қилиб ўз муаммосини тезроқ ҳал қилишни ўйлайди. Хуллас порахўрлик, коррупция жамиятимизнинг ва динни ҳаётдан ажратадиган тузум татбиқининг ажралмас қисмига айланиб улгурган. Ҳукумат бундай фалокатли иллатни таг-туги билан йўқотиш учун эмас, фақат камайтириш учун турли хил чоралар қўллаб келяпти. Масалан, жазоларни кучайтиряпти, давлат хизматчиларига ҳалолликка риоя қилиш бўйича семинарлар ташкил қиляпти, порахўрликни қораловчи ҳадисларни давлат идоралари деворларига осиб қўйяпти. Таклиф қилинаётган навбатдаги қонун лойиҳасида эса, белгиланган шартлар топилса базавий ҳисоблаш миқдорининг 5 бараваридан, яъни 1,5 миллион сўм (тақрибан 133 доллар)дан кўп бўлмаган миқдордаги совғани олишга рухсат этилиши мумкин. Бу ҳукуматнинг катта куч сарфлаётганига қарамай порахўрлик ва коррупцияга қарши курашишда ҳеч қандай муваффақиятга эриша олмаганини, унинг қаршисида ожиз қолаётганини, юқоридаги қонун лойиҳасига сўнгги илинж сифатида қараётганини кўрсатади. Чунки ушбу ҳужжат лойиҳаси айнан Коррупцияга қарши курашиш агентлиги томонидан ишлаб чиқилган ва мақсад ушбу иллатга барҳам бериш эмас, балки озгина бўлса ҳам камайтиришдир. Бундай услубда курашиш янгилик эмас, дунё давлатларининг қонунчиликларида шунга ўхшаш қонунлар бор. Бироқ уларда ҳозиргача порахўрлик ва коррупция билан айбланиб қўлга тушаётган раҳбар ва ходимларнинг кети узилгани йўқ. Ҳатто ушбу жиноятни содир қилганларга ўлим жазоси бериладиган Хитой ҳам унга барҳам бера олгани йўқ.

Агентлик эълон қилган ҳужжат лойиҳасига кўра, агар совға қиймати бу миқдордан ошса, ортиқча қисмини бюджетга тўлаш орқали совғани тасарруф этиш мумкин. Демак, бундан яна шу нарса аён бўладики, ортиқча суммани давлатга тўлаб пора олишга қонуний йўл очиляпти. Яъни давлатни ҳам порага “шерик” қилиб, уни ҳам “рози” қилинса ҳеч қандай муаммо бўлмайди. Ҳар қандай ақли расо инсон бундай чоралар билан ушбу жиноятни йўқотиш тугул камайтиришга ҳам эришилмаслигини, балки янада авж олишини тушуниши қийин эмас. Чунки пора олди-бердисини қонунийлаштириш орқали ҳукуматнинг ўзи бунга йўл очиб беряпти ва ҳаром мол билан давлат бюджетини тўлдиришни кўзлаяпти. Яъни ҳар доимгидек моддий манфаат нуқтаи назаридан қараяпти. У бундай қонунларни – гарчи улар кутилган натижа бермаган бўлса-да – биринчи бўлиб ўйлаб топган капиталистик давлатлардан кўчириб оляпти, уларга ҳар бир ишда эргашяпти. Аллоҳдан уялмай-нетмай куфр қонунларини мусулмонлар устида татбиқ қилишдан воз кечмаяпти. Ваҳоланки, Аллоҳ Таоло бу борада огоҳлантириб шундай марҳамат қилди:

وَاذْكُرُواْ نِعْمَةَ اللّهِ عَلَيْكُمْ وَمِيثَاقَهُ الَّذِي وَاثَقَكُم بِهِ إِذْ قُلْتُمْ سَمِعْنَا وَأَطَعْنَا وَاتَّقُواْ اللّهَ إِنَّ اللّهَ عَلِيمٌ بِذَاتِ الصُّدُورِ 

– “Аллоҳнинг сизга берган неъматини ва сиздан олган аҳдини эсланг. Ўзингиз: “Эшитдик ва итоат қилдик”, дегансиз-а?! Ва Аллоҳга тақво қилинг. Албатта, Аллоҳ кўкраклардаги нарсани ҳам билгувчи Зотдир”.       (Моида:7)

Ҳақиқат шуки, порахўрлик ва коррупцияни камайтириш эмас, балки уни батамом йўқотиш лозим. Бу йўлда ҳукумат кўр-кўрона эргашаётган Ғарб тажрибаси ҳам, бошқа ғайриисломий ёки Исломни фақат руҳий дин сифатида тарғиб қилиш усуллари ҳам ҳеч қандай натижа бермайди. Халқ ҳам, давлат идораларидаги раҳбарлару ходимлар ҳам порадан хазар қилишлари, у ҳаром деган ҳукмга қатъий амал қилишлари учун уларда Ислом ақидаси мустаҳкам ўрнашган бўлиши лозим. Чунки бу ишни ҳаром қилган Аллоҳдан ҳайбатланиб, Унинг буйруқ ва тақиқларига сўзсиз итоатда бўлишни айнан Ислом ақидаси ўргатади, инсонни Аллоҳнинг йўлида юрадиган қилиб тарбиялайди. Фақат ҳукмларнинг ўзини олиб деворга осиб қўйиш ёки ҳалол-ҳаромни қуруқ тушунтириб қўйиш билан иш битмайди. Асосийси эса, жиноятчиликни келтириб чиқараётган динни ҳаётдан ажратадиган тузум татбиқи давом этар экан, асло яхши тарафга ўзгариш бўлмайди. Чунки бундай тузумда одамларни жиноят қилишдан фақат қонуний жазогина тўхтатиб туриши мумкин. Амалда кўриб турганимиздек, бу кутилган натижани бермаяпти. Қачонки инсон ўз хоҳишига кўра жиноятдан тийилса ва бу жамиятда ҳам ўз аксини топса, ўшандагина жиноятчиликка барҳам бериш мумкин бўлади.

Шунинг учун ҳам жамиятда Исломий фикрлар, туйғулар ва қонунлар ҳукмронлик қилсагина, яъни давлат Ислом мафкурасини қабул қилиб, уни татбиқ қилсагина бошқа жиноятлар қатори порахўрлик ва коррупцияга ҳам барҳам берилади. Ҳа, айнан таг-туги билан йўқотилади! Ҳукумат эса, моли-ю жонини тикиб одамларни Исломий ҳаёт билан яшашга чақираётган, яхшиликка буюриб, ёмонликдан қайтараётган мўминларни овозларини ўчиряпти, таъқиб остига оляпти, арзимаган баҳоналар билан қамаяпти, қийноқлар қўллаб йўлидан қайтишга мажбурлаяпти. Шунинг учун ҳам унинг жамиятимиз ботиб қолган бузуқлик ва жиноятчиликка қарши кураши ҳақидаги сўзларида холислик йўқ. Агар холис бўлганида Ғарб ва бошқа мустамлакачиларни рози қилиш учун уларга эргашмаган бўларди, балки Аллоҳнинг розилиги учун Исломни татбиқ қилишга жидду жаҳд қилган бўларди! Юртимиздаги холис мусулмонлар бу борада ҳукуматни муҳосаба қилиб, уни ғайриисломий қонунларни қабул қилишдан тийиб қўйишлари лозим.

Ҳизб ут-Таҳрирнинг Ўзбекистондаги матбуот бўлими аъзоси Форуқ

26.11.2022й