بسم الله الرحمن الرحيم

Умматнинг йўлбошчилари ҳисобланадиган бугунги имомларимизнинг аҳволи қандай?

         Бундан ўн тўрт аср муқаддам, Пайғамбаримиз Муҳаммад САВ инсониятни хорликдан азизликка олиб чиқувчи буюк Ислом динини инсонларга олиб келдилар. Аллоҳнинг рисолатини  бутун инсониятга етказиб, Ислом оламида биринчи имом ва йўлбошчи бўлдилар. У кишининг олиб келган дустурларига бўйсуниб эргашганлар икки дунё саодатига эришиб, инсоният тарихида  улкан зафарлар эгасига айландилар. Бунга асосий сабаб шуки, Пайғамбар САВ ўз Роббиси  томонидан юкланган масъулиятни  чиройли,  сўзсиз адо этганликлари бўлди.

          У кишидан сўнг ушбу масъулиятли вазифани Халифалар давом эттирдилар. Ушбу саодатли давр сал кам ўн тўрт аср давом этиб, мустамлакачилар малайи Камол ота Турк томонидан ағдарилгунига қадар,  яъни 1924 йил 3 март соат 10:10 га қадар давом этди. Шу давр мобайнида 92 нафар халифалар келган бўлса, уларнинг аввали Абу Бакр (Аллоҳ у кишидан рози бўлсин) бўлса, энг сўнгги мусулмонлар халифаси Абдулмажид (1922-1924) эди. Исломий бошқарув соясидаги  Ислом диёрлари мисли кўрилмаган даражадаги ютуқларни қўлга киритиб, оз фурсатда бутун дунёни ларзага солувчи бир кучга айландилар. Инсоният юксалиши учун зарур бўлган барча соҳалар (таълим, иқтисод, ижтимо, ҳарбий соҳа) тўғри тартибга солинди. Буларнинг барчасида    инсоният келажаги учун жон куйдирган, уммат манфаатини ўз манфаатидан  устун  кўрган, холис,  тақводор халифаларнинг, олимларнинг буюк хизматлари бор эди.

    Бундан кўриниб турибдики, уммат етакчиларининг холислиги, йўлбошчиликка лойиқлиги жамиятни юксакликка интилтирар экан. Бу ҳолатни қуйидаги битта мисол билан тушуниб олишимиз мумкин: агар узоқ сафарга  йўл олсагу, аммо манзилга қандоқ етиб боришни билмасак, ўзимизга бир йўлбошчини тайин қиламиз ҳамда то манзилга етиб олгунга қадар унинг кўрсатмаларига риоя қиламиз. Агар йўлбошчи тўғри йўл кўрсатса, манзилга тинч-омон етиб оламиз.   Агар йўлбошчи адашса, барча сафар аҳли ҳам ўз йўлидан адашадилар. Шунга кўра ўринли бир савол туғилади, мусулмонларнинг йўлбошчилари ҳисобланадиган диний раҳнамоларимиз адашсаларчи? Минг афсуслар бўлсинки, Пайғамбар САВ “Олимлар менинг меросхўрларим”, деб мақтаган шундай буюк, шарафли вазифа кишилари бугунги кунда кимларнидир чизган чизиғидан юрадиган қўғирчоқ  олим ва имомларга айланиб қолдилар. Шуларни ўйлаб, мен бир оддий халқ фарзанди сифатида ўйга толаман, ўзимга ўзим савол бераман:

     Биз ёш Ислом умматининг келажаги, фаровонлиги, юксалиши йўлида ушбу олим ва  имомларимиз, йўлбошчиларимиз нималар ҳақида бош қотирмоқдалар? Биз ёшлар ғами билан лоақал бирор кеча тунларини кунга улаяптиларми? Ёки жума кунидаги ваъзларини биз илмга муштоқ умматнинг қалбига етиб боришини яратгандан сўраб, кўзлари намланяптими? Ёки олим,  имом деган сўзларнинг маънолари замонлар ўтиб  ўзгардими? Ёки имомлик фақат жамоат намозларини ўқиб берадиган бир лавозим бўлиб қолдими? Ёки ўз тасарруфидаги масжидни чиройли  безаклар билан қуриб битиришми? Ёки фосиқ ҳокимларимизнинг режаларини амалга ошириб беришми? Ёки асл вазифалари бўлган умматга ёруғ юлдуз бўлиш ўрнига, қасдданми, ожизлик қилибми куфр фойдасига тарғиботчилик қилишни танладиларми? Ёки кун сайин қутираётган ҳукуматни инсофга чақириш ўрнига, чиройли сўзлар билан дуоларда золимларни олқишлашларига  биз ҳам қўшилишимиз керакми? Бундай саволларнинг охири йўқ.

     Мен шу юртнинг бир ёш авлоди сифатида, ўз фикрларимни баён қилмоқчиман холос, асло  бировни маломат қилмоқчи эмасман,  аксинча, малай ҳокимларга ёрдам бераётган имомларимизни ҳаққа чақириб, бўйинларидаги масъулиятни тўғри адо этишларига ундамоқчиман. Шуни алоҳида  таъкид билан айтаманки, сиз имомлар ҳам шу уммат вакилисизлар, эртага борадиган жойимиз бир, қибламиз бир, бир сўз билан айтсак, бир Ислом умматимиз. Барча қилаётган ҳатту-ҳаракатларингиз Ислом ва мусулмонлар фойдасига бўлсин, асло унинг зиддига эмас! Сизларга бу илм ва мартабани Аллоҳ берди, сизлар унга ҳиёнат қилманглар! Биз Ислом уммати, сизларни Қиёмат кунида пешонангизда “мунофиқ” тамғаси билан қайта тирилишларингни асло хоҳламаймиз!

Олимларга куфр берди дорилар,

Эланганда чиқиб келди чорилар,

   Не бўлдилар унда Фозил қорилар?

  Оқибатда жаханнамга йиқилманг.

Дунё сизга кўринмоқда ялтироқ,

   Сезилмоқда дилингизда қалтироқ,

Кўзингизни очинг ахир эртароқ,

   Оқибатда жаханнамга йиқилманг.

Майлига ёв жисмингизни тўрласин,

Исломга зид гапир дея зўрласин,

  Майли сизни бу дунёда хўрласин,

  Оқибатда жаханнамга йиқилманг,

Ўтар ахир жисмингизни тилса ҳам,

Тириклайин кесиб мусла қилса ҳам,

Ҳақни тутинг терингизни шилса ҳам,

Оқибатда жаханнамга йиқилманг.

Қочинг энди фасодчилар ёнидан,

Қўрқинг ахир сўроқ-савол онидан,

Гумроҳ жасад айрилганда жонидан,

Оқибатда жаханнамга йиқилманг.

(Абдулбоқий)

Мухлисингиз Жамшидбек

15.08.2015й.