Ўзбек ҳукумати “катта оға”ларини рози қилиш учун БМТнинг Глобал аксилтеррор стратегиясини қўллаб-қувватлаяпти

Хабар: Жорий йилнинг 4-7 март кунлари Ўзбекистон Республикаси Ички ишлар вазирлиги академиясида янги технологиялардан террорчилик мақсадларида фойдаланиш бўйича семинар-тренинг ўтказилмоқда.

Ушбу тадбир ўзбекистонлик мутахассисларни бу борадаги илғор тажриба, замонавий услуб ва амалиётлар билан яқиндан таништириш, тегишли хавф ва таҳдидларнинг олдини олишга қаратилган миллий чора-тадбирлар ва тавсияларни ишлаб чиқишга қаратилган.

Тренинг БМТнинг Терроризмга қарши курашиш бошқармаси, БМТнинг Марказий Осиё учун превентив дипломатия бўйича Минтақавий маркази, Ўзбекистон Республикаси Президенти ҳузуридаги Стратегик ва минтақалараро тадқиқотлар институти, Ўзбекистон Республикаси Ички ишлар вазирлиги академияси ва Давлат хавфсизлик хизмати томонидан ташкил қилинмоқда. (Стратегик ва минтақалараро тадқиқотлар институти, 05.03.2024й)

Изоҳ: Хабарда айтилишича, мазкур тадбир Ўзбекистон Республикаси Президенти томонидан 2022 йилнинг 3-4 март кунлари БМТнинг Глобал аксилтеррор стратегиясини Марказий Осиёда амалга ошириш бўйича Тошкентда бўлиб ўтган юқори даражадаги конференцияда илгари сурилган ташаббус ва таклифларни амалга ошириш бўйича “Йўл харитаси” доирасида ўтказилмоқда. Мирзиёев ушбу конференцияда 5 та ташаббус ва таклифларни илгари сурган эди, уларнинг қисқача тафсилоти қуйидагича:

1. Минтақада БМТ Аксилтеррор бошқармаси офисини очиш;

2. Марказий Осиёда кибертерроризм бўйича Ягона электрон тизимни яратиш;

3. БМТнинг Аксилтеррор бошқармаси шафелигида Марказий Осиё мамлакатларининг етакчи мутахассислари орасидан Минтақавий эксперт кенгаш таъсис этиш;

4. Мирзиёев терроризм ва экстремизмга қарши муваффақиятли курашишнинг энг муҳим шарти самарали ёшларга оид сиёсат эканлигини таъкидлаб ўтди. Шу масалаларни ҳар томонлама муҳокама қилиш учун 2023 йилда Самарқанд шаҳрида доимий фаолият юритадиган Марказий ва Жанубий Осиё мамлакатлари Ёшлари кенгашини чақириш;

5. 2023 йилда БМТ шафелигида юқори даражадаги “Маърифат ва диний бағрикенглик” конференциясини ўтказиш.

Терроризм ва экстремизм, радикализмга қарши кураш деганда, Ислом ва мусулмонларга қарши кураш назарда тутилиши ҳеч кимга сир бўлмай қолди. Шу эътибордан, ўзбек ҳукумати ҳам – бошқа Исломий юртлар ҳукуматлари каби – Ислом ҳокимият тепасига келмаслиги учун кофир мустамлакачи давлатлар ва уларнинг манфаатларига хизмат қиладиган БМТ каби халқаро ташкилотлар чизган чизиқдан чиқмай келяпти. Ҳукумат бу билан кифояланиб қолмай, “катта оға”ларини рози қилиш учун ҳатто ўзи ташаббус кўрсатяпти. Юқорида Мирзиёев илгари сурган таклифлар шуни тасдиқлаб турибди. Буларнинг орасида интернет глобал тармоғида фаоллик билан юргизилаётган Ислом даъватига қарши чоралар кўриш ва ёшларга муҳим эътибор берилганини алоҳида таъкидлаш зарур. Шунингдек, Мирзиёев БМТ Бош Ассамблеясининг 78-сессиясида сўзлаган нутқида экстремизм тарқалишига, ёшларнинг радикаллашувига йўл қўймаслик учун биргаликдаги ҳаракатларни фаоллаштириш зарурлигини таъкидлаб ўтганди.

Албатта, бундай тадбирлар яқинда бошланиб қолгани йўқ, балки аввалдан давом этиб келяпти. Масалан, 2016 йил 15 сентябрда Тошкент шаҳрида ЕХҲТ томонидан ташкил қилиниб, терроризмга қарши курашишнинг халқаро ҳуқуқий меъёрларга асосланган миллий самарали дастурларини ишлаб чиқиш масалаларига бағишланган Ўзбекистон Республикаси вазирлик, муассаса ва идораларининг 40 та вакили иштирокида семинар ўтказилган эди. 2019 йил 11-15 ноябрь кунлари Тошкент шаҳрида жиноий даромадларни легаллаштириш ва терроризмни молиялаштиришга қарши курашиш мавзусида ЕХҲТ ва БМТ билан ҳамкорликда халқаро семинар ўтказилди. Бундай тадбирлар ҳатто энг қуйи бошқарув органи бўлмиш маҳаллаларни ҳам қамраб олган. Жумладан, 2022 йилда БМТ Тараққиёт дастури томонидан Тошкент шаҳар маҳаллалари раҳбарларини зўравон экстремизмнинг олдини олиш ва радикаллашув аломатларига тезкорлик билан муносабатда бўлиш бўйича ўқув курслари ташкил қилинган. Шунингдек, курслар экстремизмга сабаб бўлаётган аҳоли ўртасидаги норозиликни эрта босқичда аниқлашга ёрдам бериши ҳам айтилган. Хуллас, жамиятдан Ислом ва унинг аҳкомларини узоқлаштиришга уриниш, хусусан сиёсий Исломга қарши курашда бу каби чора-тадбирларнинг сон-саноғи йўқ.

Ҳеч муболағасиз айтиш мумкинки, ўзбек ҳукумати “терроризм, экстремизм ва радикализм”, яъни асосан сиёсий Исломга қарши курашда Ҳизб ут-Таҳрирни нишонга олиб, унга энг катта хавф сифатида қарамоқда. Жумладан, Ҳизб ут-Таҳрир Ўзбекистоннинг фейсбук, телеграм саҳифаларини бир неча бор блоклаш, унга қарши баъзи ёлланма имомлар тарафидан ҳар турли бўҳтонга тўла ташвиқотлар… каби ишлар, айниқса сўнгги пайтларда кучайтириляпти. Ҳизбнинг Муборак Фаластиндаги мусулмонлар аҳволини фаол ёритиб, бу борадаги энг тўғри ечимни тақдим қилаётгани ва умматни шунга чақираётгани ҳам шундай чоралар кўришга туртки бераётган кўринади. Умуман олганда, Ҳизб Ислом ва унинг аҳкомларидан четга чиқмай, маломатчининг маломатидан қўрқмай, Росулуллоҳ ﷺнинг Ислом давлатини барпо қилишдаги тариқатларини маҳкам ушлаётгани… хоин ҳукмдорларнинг уйқусини қочирмоқда.

Ҳукуматнинг “катта оға”ларини рози қилиш учун БМТ каби Американинг қўғирчоқ ташкилотларининг фитна ва фасодга тўла лойиҳаларини татбиқ қилишга харис бўлаётгани, албатта, улкан хиёнатдир. Мусулмон халқимизнинг Исломга бўлган муҳаббати, ҳурмати ва интилишини тўлиқ ҳисобга олмай, нуқул ундан узоқлаштиришга интилаётгани – ҳукуматнинг фаровон жамият қуриш, тараққиётга эришиш ва кучли бўлиш ҳақидаги даъволари пуч эканлигини, бу билан фақат ўз режими умрини узайтиришни кўзлаётганини англатади холос. У қарши курашаётган Ҳизб ут-Таҳрирга келсак, Ҳизб йигитларига золим Каримов режими томонидан мисли йўқ қийноқлар, азоблаш ва ҳатто ўлдириб юборишлар билан қаттиқ зулм қилинган бўлса ҳам, Ҳизб ут-Таҳрир фаолияти – алҳамдулиллаҳ – тўхтаб қолмади ва бундан кейин ҳам, Аллоҳнинг изни ила давом этаверади. Чунки буни Аллоҳ барча мусулмонларга фарз қилган ва унинг амалга ошишига ваъда берган. Қолаверса, бу йўлда катта қийинчилик ва хавф-хатарларни писанд қилмай, собитқадамлик билан давом этиб келаётган забардаст Ҳизбни тўхтатишга қайси кучлар уринмади дейсиз. Аллоҳ таоло ҳақни ушлаган жамоат ёки қавмни, бир оз муддатдан кейин бўлса ҳам, албатта, ғолиб қилажак!

يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُمْ

– “Эй мўминлар, агар сизлар Аллоҳга ёрдам берсангизлар, У зот ҳам сизларга ёрдам берур ва (жанг майдонида) қадамларингизни собит-барқарор қилур”.  (Муҳаммад:7)

Ҳизб ут-Таҳрир Марказий медиа офиси радиоси учун Ислом Абу Халил – Ўзбекистон