Ёшларни масжидга киритмаслик ортидаги мақсадлар

بسم الله الرحمن الرحيم

Рамазон ойи Аллоҳ таоло томонидан мўмин-мусулмонлар учун берилган ҳидоят, баракот, фурсат ва ғанимат ойидир. Шукрки, халқимиз бу муборак ойни ўзига хос тарзда кўтаринки руҳ билан ва ажр-савобларга, хайрли ишларга бел боғлаган ҳолда кутиб олади. Шу мақсадда рўза тутиб, шариатимизда суннати муаккада бўлган таровеҳ намозларини адо этиш учун масжидларга ошиқишади. Бироқ ўзбек режими тақво, яхшилик ва меҳр-шафқат ойи бўлган Рамазонда ҳам халқимизнинг маънавий-руҳий озуқа олишига жиддий тўсқинлик қилмоқда. Иймонлари жўшиб, Роббисига қиём, рукуъ, саждалар билан ибодат қилиш лаззатини тотиш учун жамоатга ошиққан ёшларни масжидларга қўймаяпти. Во ажабо! Ёшларни масжиддан, ибодатдан тўсаётган ҳукумат ўзининг бу жирканч ишига уларнинг мактаб дарсликларини яхши ўзлаштира олмаслигини сабаб қилиб келтирмоқда. Савол туғиладики, агар ҳукумат чиндан ҳам мактаб ўқувчиларининг вақтлари ноўрин нарсаларга сарфланишидан шунчалик қайғураётган бўлса, нега унда оқшомлари ўғил-қизларнинг аралаш-қуралаш санқиб юришларига ёки ярим кечагача ва ҳатто эрталабгача бар, дискотека, тунги клубларда қолиб кетишларига ё интернет чатларда бемаъни суҳбатлар билан банд бўлишларига қарши чоралар кўрмаяпти?! Юз минглаган ёшларни ўз домига тортаётган бундай бузуқ муҳитдан узоқлашиб, ибодатга ошиққан ёшларни ўзбек режими масжидга киритмаётгани, шубҳасиз, иккиюзламачилик ва зулмдан бошқа нарса эмас. Аксинча, ҳукуматдагилар ўзларини мусулмон санар эканлар, ёшларнинг ҳидоят йўлига, Аллоҳга ибодат қилишга интилаётганидан хурсанд бўлиб, уларни рағбатлантирса, ибодат учун қулай шароитларни яратиб берса бўлмайдими ахир?!

Ўлганнинг устига тепгандек, ҳукуматнинг бундай ғайриисломий сиёсатини муфтий бошлиқ имомлар ҳам оқлаб чиққани, ёшларни масжиддан узоқлатиш тадбирларида иштирок этаётгани Аллоҳ ва Росули ﷺга нисбатан улкан хиёнатдир. Уларга ҳам худди шу сўзларни айтган бўлардик: Агар муфтий ва масжид имомлари ҳақиқатда ёшларимиз ҳақида қайғураётган бўлса, нега ёшларнинг ароқхўр, зинокор, наркоман бўлиб кетаётганларига сабаб бўлаётган, барча иллатларнинг уясига айланган тунги клубларни ёпишни ҳукуматдан талаб қилмайди?! Ёки кўпинча фаҳш ишлар ботқоғи бўлаёган сауна каби шайтоний масканларни таг-туги билан йўқотишни талаб қилмайди?! Ёки ҳукумат қиморга рухсат берганига лом-мим демайдилар?!… Ҳа, улар булар ҳақида гапирмайдилар, соқов шайтон каби сукут сақлайдилар!

Мавзуга қайтиб айтамизки, Набий ﷺ саҳиҳ ҳадисда: “Фарзандларингизни етти ёшга етганида намозга буюринг. Ўн ёш бўлганида ҳам ўқимаса, (намоз учун) уларни уринг ва ўринларини алоҳида қилинг”, – деганлар. Бошқа бир ҳадисда эса, У зот ﷺ: “Ким Аллоҳдан савоб умид қилиб Рамазон намозини (яъни таровеҳни) ўқиса, олдинги гуноҳлари кечирилади”, – дея марҳамат қилганлар. (Бухорий, Муслим ривояти).

Пайғамбар ﷺ Таровеҳни жамоат билан ўқишни хуш кўрардилар. У зотга иқтидо қилиб таровеҳ намозини ўқишга келувчилар тўртинчи кечада масжидга сиғмай кетдилар. У киши ﷺ бомдод намозини ўқиб бўлгач, одамларга юзландилар ва: “Сизнинг ҳолингиз менга махфий бўлгани йўқ. Лекин (таровеҳ намози) сизга фарз бўлиб, сўнг унинг адосида ожиз қолишингиздан қўрқдим”, – дедилар. Ҳазрати Умар розияллоҳу анҳу халифа бўлгач, одамлар таровеҳин тарқоқ ҳолда адо этишаётганини кўриб, бу намозни яна жамоат билан ўқишни жорий қилди (“Муватто”, 84). Одил Халифа Умар розияллоҳу анҳу таровеҳни жамоат намози сифатида белгилаб қўйганининг ҳикмати шуки, мусулмонлар раҳмат ва имкониятлар ойи бўлган Рамазонда Аллоҳга янада кучлироқ боғланишсин. Чунки бу ойдаги ибодатлар олдинги хатоларни ўчиради ва ҳисобсиз яхшилик ва баракотларга эшик очади. Шундай экан, имомлар халқ устидаги масъулиятидан келиб чиқиб, бу ойдаги таровеҳнинг аҳамияти ва хатми Қуръоннинг фазилатини кенг ёритиб, айниқса жамиятнинг эртаси бўлган ёшларни масжидларга чорлаши зарур эди. Афсуски, Ўзбекистондаги имом-домлалар ҳукумат шарт қилгандек, Исломни, Аллоҳнинг аҳкомларини қўйиб, ўзбек режимининг зулмкор қарорларини танлашди. Натижада Қуръон оятлари ва Расулуллоҳ ﷺ ҳадисларини нотўғри таъвил қилишга ўтишди, агар буни ҳам эплай олишмаса, ҳукумат буйруқларига асоссиз равишда Исломдан тўн кийдиришяпти. Хусусан, муфтий Нуриддин Холиқназаров мактаб ўқувчиларини масжидга киритмаслик тўғрисидаги “юқори”дан келган топшириқни оқлаш учун жамоатнинг хушуъ билан намоз ўқишига ёшлар халал беради, дея юзсизларча чиқиш қилди. Ҳолбуки, бундай иддаоларнинг шариатда бирор асоси бўлса, ёшларни биринчи навбатда масжидларга жалб қилиб, уларнинг таҳорат, намоз ва масжид одобларига тааллуқли хатоларини тўғрилаш ўша имом-домлаларнинг вазифаси эмасми?! Уларни асоссиз равишда масжидга киритмаслик жамоатга хушуъ эмас, аксинча бало, мусибат ва гуноҳдан ўзгасини олиб келмайди. Бўлиб ҳам, Ҳақ таоло улар сабабли устимизга бало юбормайдиган бегуноҳ болаларни масжиддан қувиш ўрнига, дуога очилган қўллар орасида уларнинг ҳам жажжи қўлчалари бўлса, мусулмонлар жамоаси учун, бутун халқимиз учун манфаатли бўлмасмиди?! Ахир Пайғамбаримиз ﷺ: “Албатта сизлар Аллоҳнинг ёрдамига заифларингиз сабабли эришасизлар”, – дедилар-ку.

Бундан ташқари, фарзанди масжидга киритилмаган ота-онанинг ёки жамоат намозидан маҳрум қилинган ўсмирнинг изтироби ва ички кечинмаларини сўз билан ифодалаш имконсиздир. Ҳукуматдагилар ўзларини мусулмон санаса, Рамазондек улуғ ойга ҳурматсизлик қилиш ва намозхонларга қарши курашишдан Аллоҳдан қўрқиши керак эмасми?! Ҳукумат ўзига халқимизнинг ғазаби ва қарғишини олиб келадиган бундай зулмкор, ақлсиз сиёсатини дарҳол тўхтатиши зарур! Мирзиёев ҳукумати бугун коррупция ва порахўрликка қарши курашда муваффақиятсизликка учраганидан сўнг бу иллат билан курашишда қисман бўлса-да Исломга мурожаат қилишга мажбур бўлмоқда-ку! Агар бола ёшлигидан Исломий таълимдан тўсилса, масжидларга киритилмаса ва Исломнинг ҳар қандай кўринишига қарши кураш олиб борилса, жамиятни коррупция, пора каби ҳаромхўрликлардан қандай тозалаш мумкин?!

Ёшларимизнинг масжидларга ошиқиши Россиянинг Кавказ мусулмонларидан, Хитойнинг уйғурлардан, Америка ва Ғарбнинг Афғонистон халқидан еган зарбаларини ёдга солади. Шу сабабли ҳам улар Мирзиёев режимига молиявий кўмак ва грантлар ажратиб, муборак Рамазон ойи ҳурматини ҳам бир четга суриб, Исломга қарши курашишни талаб қилмоқда. Ҳукумат эса мустамлакачи давлатларга қулоқ тутиб, динга босим қилиш ва ўз халқини эзиш орқали назоратни ушлайман, тахтимни мустаҳкамлайман, деб хомхаёл қиляпти. Бу борада Мирзиёев устозининг аччиқ қисматидан ибрат олиши керак. Каримов режими Ислом ва унинг даъватига қарши туну-кун курашганига қарамай, ҳеч бир натижага эриша олмади, аксинча айнан ўша мустамлакачилар қўли билан тарихнинг ахлат қутисига улоқтирилди.

Унутмаслигимиз лозим, динни ҳаётдан ажратиш тузуми бўлган яроқсиз демократияга қурилган ҳокимиятда, давлат тепасига ким келишидан қатъий назар, албатта, у динимизга қарши курашади. Мана, ҳукумат болаларни масжиддан қайтараётганини илмга шароит яратаётиб бераётгани билан хаспўшламоқда. Лекин нега бугун ёшларда ахлоқий бузилиш кузатиляпти ва ҳатто ўз жонига қасд қилиш ҳолатлари ортиб боряпти? Айрим расмийлар мактаб ўқувчилари орасида ҳомиладор бўлиб қолиш кўрсаткичлари қўрқинчли даражада ортаётгани сабабли бу рақамларни ҳукумат яширишга мажбур бўлаётганини айтишяпти. Ўсмирлар орасида гиёҳвандлик, зўравонлик, ўғрилик ва бошқа турдаги жиноятлар тобора ортаётгани бу таълим тизими асосидан-илдизидан бошлаб чирик эканлигини кўрсатади. Бу тузумдаги таълим дастурининг асл ғояси – ҳукуматга муте ва унинг бузуқ тузумига содиқ кадрларни етиштириб чиқаришдан бошқа нарса эмас. Шу сабабдан ҳукумат Аллоҳнинг ҳукмларидан кўра президент фармонлари ва қарорларини муқаддам қўядиган авлодни пайдо қилиш учун ёшларни эътиқодий-маънавий жиҳатдан мажруҳ қилувчи дарсликларни мажбурий қилиб қўйди.

Мусулмон халқимизга шуни таъкидлаймизки, Аллоҳ инсонларни – улар ёш ёки қари бўлсин, эркак ёки аёл бўлсин – Ўзига ибодат қилишлари учун, Исломга бутунича амал қилишлари учун яратган.

يَا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ ‎

– “Эй мўминлар, тўла ҳолдаги Исломга кирингиз! (Яъни Исломнинг баъзи ҳукмларига итоат қилиб, баъзиларига итоат қилмайдиган кимсалардан бўлмангиз!) Ва шайтоннинг изидан эргашманглар! Албатта, у сизларнинг очиқ душманингиздир”.                  (Бақара:208)

Шубҳасиз, намоз ўзи бир катта тарбиядир. Намозда қоим туриш, Аллоҳнинг ҳаёт ишларидаги барча ҳукмларини барпо қилишнинг бошланғичи ҳисобланади. Аллоҳнинг дини нозил бўлган ва дуолар ижобат бўладиган бу Муборак ойда устимиздаги бошқарувчиларга инсоф тилайлик. Агар улар тавфиқ ва ҳидоятга лойиқ бўлишмаса, Аллоҳ уларни устимиздан дарҳол кўтарсин. Ва уларнинг ўрнига Ўзининг шариатини қоим қиладиган, мўмин-мусулмонларни ҳар томонлама ҳимоя қиладиган имом-халифани бизга тезроқ ато этсин! Ушбу хайрли дуо бугунги муборак лаҳзаларда ҳар бир иймон аҳлининг энг биринчи дуоси бўлиши нақадар муносибдир. Зеро, бу дуонинг ижобатида нафақат юртимиз мусулмонлари, балки бутун Умматнинг дардига малҳам, мушкулига ечим бордир! Расулуллоҳ ﷺ дедилар: “Имом (яъни халифа) қалқондир, у билан ҳимояланилади ва унинг ортида туриб жанг қилинади”.

Ҳизб ут-Таҳрир Ўзбекистон матбуот бўлими аъзоси Абдураҳмон

09.03.2025й