Оддий ҳақиқатлар

بِسْمِ اللهِ الرَّحْمٰنِ الرَّحِيم

Бу борлиқни яратган, шу жумладан бизни ҳам яратган Яратувчимиз борлигини ва У буюк зот барча нарсага қодир эканлигини биламиз. Лекин Аллоҳни рози қилишни, ҳатто У зотнинг розилиги тўғрисида, яъни қандай яшасак Яратувчимиз рози бўлиши тўғрисида ўйламаймиз. Бузуқлик, гуноҳ, маъсият билан яшашнинг охири албатта жазоланишини биламиз, лекин афсуски тўғри яшашни, тўғрилик қаерда эканлигини фикрламаймиз. Қуръон оятларини ёд оламиз, жуда чиройли тарзда ўқиймиз, керак бўлса кўзларимиздан ёш ҳам оқади, лекин Қуръони каримни нозил қилиниши сабабини, яъни нима учун тушурилганини билмаймиз ёки билиш учун изланмаймиз ёхуд билсак-да риоя қилмаймиз. 

Ҳаётимиз муаммолар гирдобида ва ҳатто унинг ботқоғига ботиб кетди. Бу муаммоларимизнинг барчасига ечим Қуръон ва Суннатда борлигини биламиз, лекин шундай муолажа қилишга интилмаймиз. Фарзандларимиз, зурриётларимиз, келажагимиз бузуқлик сари кетаётганини ва кундан-кунга аҳвол янада ёмонлашиб бораётганини, агар Ислом шариатига амал қилиб яшасак, шу ҳолатлар бўлмаслигини биламиз, лекин замонни айблаб ўтираверамиз. Энг оғриқли нуқтамиз бўлган аёл-қизларимиз албатта улар оналаримиз, опа-сингилларимиз, лекин шундай айтиб қўйиб бугунги ҳолатларига жим қараб ўтирамиз, улар ҳатто бошқа юртларга бориб ишлашмоқда, уларнинг орасида фоҳишалик билан маблағ топаётганлари ҳам кўп. Шундай ишларга Ислом асло йўл қўймаслигини, ҳар қандай ҳолатда ҳам қабул қила олмаслигини биламиз, лекин қабул қилаётган эркаклар жамиятда кўплигини, керак бўлса шундай ишларни касбга айлантириб олишганини билиб туриб сукут қиламиз.

Бугун биз хормиз. Буни фикрлашимиз, яшаш даражамиз кўрсатиб турибди. Лекин ҳар қандай ҳолатда ҳам буни тан олмасликка ҳаракат қиламиз. Ислом бундай ҳолатга кўз юммаслигини, тезликда бу хорликдан чиқиш йўлида ҳаракат қилинишини биламиз, лекин яна ва яна Исломсизликка, яъни Ғарб ҳаётига, улар алдаб ечим, деб тавсия қилган тузоқларга интилаверамиз.

Ислом билан яшашимиз кераклиги бу оддий ҳақиқат, лекин кимларнидир эшитиб, уларнинг хоинона фикрларига эргашамиз, куфрни Исломдан, дея чиқариб берган фатволаридан қалбимиз таскинланмаса ҳам, гуноҳи ўзига, дея бу фатвони кўтариб юрамиз, ҳатто бу аҳмоқлик эканлигини билсак ҳам.

Ислом бу бизни икки дунё саодатига эриштирувчи диндир, лекин шу икки дунё саодатига эришиш учун ҳаракат қилмаяпмиз, булар ҳам оддий ҳақиқатлардир.

Ҳизб ут-Таҳрирнинг Ўзбекистондаги медиа офиси. Абдуллоҳ

21.04.2020й