بِسْمِ اللهِ الرَّحْمٰنِ الرَّحِيمِ

Миср парламенти депутатининг ўзи гувоҳлик бермоқда: Иқтисодий ислоҳотлар адолатсиздир, қарз олишда давом этиш бизни банкротликка олиб келади

Ал-Жазира нет веб-сайти (ҳижрий 1441 йил 29 шаввол, милодий 2020 йил 20 июн шанба куни) нашр қилган хабарда бундай дейилади:

«Миср парламенти депутати Аҳмад Тантовий ўз ҳукумати томонидан татбиқ этилаётган иқтисодий ислоҳот дастурини «адолатсиз», деди ҳамда юртнинг қарз олиш сиёсатини давом эттиришини қоралади.

Келгуси молия йили 2020-2021 йиллар учун давлатнинг бош бюджети лойиҳасини муҳокама қилиш йиғилиши чоғида Тантовий бундай деди: «Ҳукумат иқтисодий ислоҳот деяётган нарса пул ислоҳотидан бошқа нарса эмас, у инсонийлик нуқтаи назаридан қараганда адолатсиздир».

Депутат шунингдек, ҳукуматнинг бюджет лойиҳасига жиддий ўзгартиришлар киритмагани учун парламентни ҳам танқид қилди.

У соғлиқни сақлаш, таълим ва деҳқон хўжаликлари учун ажратилган маблағларда ноаниқликларга оид саволларни ўртага ташлар экан, буни ялпи ички маҳсулот билан солиштириш лозимлигини таъкидлади.

Ушбу муҳим соҳаларга сарф қилинадиган харажатларнинг ялпи ички маҳсулотларга нисбатини солиштириб, ўрганиб чиқадиган бўлсак, бу соҳаларга ажратилган харажатларнинг йилдан-йилга камайиб бораётганини ҳамда конституцияда белгиланган ставкаларга етиб бормаётганига гувоҳ бўламиз, деди Тантовий.

Мухолафатчи депутат қарз олиш сиёсатини давом эттириш оқибатларидан огоҳлантириб, давлат бюджетидаги қарзга сарфланаётган харажатларнинг соғлиқни сақлашга сарфланган маблағдан 12 баробар кўп эканини таъкидлади.

«Биз авлодларга оғир мерос қолдирамиз. Минг афсуски, таълим ва соғлиқни сақлаш харажатларини кўтариш камбағал мисрлик ватандош елкасига тушмоқда», деди Тантовий.

У «Ўз-ўзидан савол туғилади: бу ҳукумат қандай қилиб таълим ислоҳотига жиддий қараяпмиз, демоқда, ахир, ўқитувчилар сони камлик қилаётган, мактаблар етишмаётган ва ўқитувчилар маошлари оз бўлиб турган бир пайтда, таълим секторига жуда оз маблағ ажратаётган бўлса?!», дея қўшимча қилди.

Сўзининг ниҳоясида Тантовий масхараомуз саволларни ўртага ташлади: «Ҳукумат ўзи тақдим этган бюджет лойиҳасининг парламент томонидан маъқулланмай қолишидан қўрқяптимикин?! Ҳукумат депутатлар тавсияларини қабул қиладими?! Парламент бюджет лойиҳасини рад этадими ёки унга жиддий ўзгартишлар киритадими?!».

Роя газетасининг 2020 йил 1 июл чоршанба кунги 293-сонидан

0

0

Related posts:

Кувайт дефицитини ёпиш учун 16.5 миллиард доллар қарз олишга қарор қилди!!! Миср парламенти Халқаро Валюта Жамғармаси кўрсатмаларини ижроси сифатида қўшимча қиймат солиғини жорий қилмоқда Ливан Халқаро Валюта Фондининг кундасига бошини қўйиб берди Сисий давлатнинг кўпайиб бораётган қарзларини ёпиш учун давлат активларини сотмоқчи