Балки ўйлаб кўрсак, террорист деб қамаб ташламас
Балки ўйлаб кўрсак, террорист деб қамаб ташламас
بسم الله الرحمن الرحيم
Шоҳнинг кимлигини англамоқчи бўлсанг, у қатл қилаётган кишиларни ўрган. Дарҳақиқат, биринчи президент Каримовнинг мусулмонларга қарши бошлаган зулми шогирди Мирзиёев даврида ҳам тўхтайдиганга ўхшамайди. Зеро, воқелик шуни кўрсатмоқда. 1999 йилдан буён мусулмонлар ҳануз Ўзбекистон зиндонларида қолмоқда.
Каримов даврида барчамизнинг кўз ўнгимизда сара мусулмонлар қатл ва қувғин қилинди. Аммо халққа улар террорист, экстремист, дея танитилди, ҳануз шундай танитилмоқда. Чорак аср қамоқларда қатли ва зулмларини тўхтатишмади. Модомики, халқ шоҳ ва унинг сиёсатига хизмат қилаётган “уламолар”га ишониб тураверар экан, кундаси мўминлар бошидан, болтаси мусулмон бўйнидан нари кетмайди.
Эй халқ, қачонгача ақлни ишлатишдан қўрқасиз, ахир ўйлаб, фикр юритсангиз золимлар сизни террорист, деб қамаб ташламас?!
Ҳизбий деб қатл қилишди, сиз шунақа экан, дедингиз. Чунки анави “дин пешволари” сизни шунга ишонтирди. Ваҳҳобий дея таъқиб қилишди, чатоқ экан-да, дедингиз. Чунки ўша салла-чопонлар тасдиқладилар. Аммо оқ дўппингизга, машинангиздаги жойнамозингизга, қизингиз рўмолига ҳужум қилганида нега сиз: “ие, аслида шоҳ ўзи чатақ экан-ку” демадингиз. “Анави сарой муллалари шоҳнинг шу жирканч ишини оқлади-я” демоқдан тийилдингиз. Ҳатто сўз айтмасангиз-да, ўйлашдан ҳам чўчидингиз. Албатта сиздаги ақл ҳақ билан ноҳақни етарлича ажратди. Аммо “оч қорним, тинч қулоғим” демоқни танладингиз. Энди дўппингизни олиб қўйиб бир ўйлаб кўринг. Устингиздаги ҳокимлар динингизга, ҳаққингизга хиёнат қилгани етмаганидек, бойлигингизни ҳам итдек талашди, болаларингизни қул қилиб сотишди, чақалоғингизни қарз билан туғилишга маҳкум қилишди. Сувингизни пулга сотиб олишга кўникдингиз, тезак уйингиз тўрида эъзозланадиган бўлди…
Айтинг, нимангиз қолди? Ерингизми? Ётоғингизми? Эртага қарзларингиз эвазига водий ёки воҳангизни анави тожиклар шоҳидек Хитойга берворса, ўшанда ўйлаб, фикрлашга тушасизми?
Кеч бўлмасидан этагингизни ёпинг, десак, аллақачон этаклар ёпишга ярамас аҳволда!
Ахир бошимизни кўтариб, сал наридаги ўтмишга назар солсак, етарли ибратга лойиқ аждодларимиз бор. Уларни оламга танитган нарса дин эди. Динни соф ҳолича етказувчи алломаларимизни, олимларимизни, рижолларимизни – биз ҳам ўша аждодларимиз йўлини танлаб қолмаслигимиз учун – юқоридаги номлар остида қириб, қамаб, қатл қилишди.
Тан олинг. Золимга сукут қилдикми, демак, биз ўша золимнинг зулмига шерикмиз.
Эй Роббимиз, бизларни кечир, Ҳақни танитувчи ақлларимизни ишлатмоқдан қўрқадиган осийлардан қилма!
رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ
– “Парвардигоро, агар унутган ёки хато қилган бўлсак, бизни азобингга гирифтор айлама! Парвардигоро, бизларнинг зиммамизга биздан илгари ўтганларнинг бўйинларига қўйган юкингни юклама! Парвардигоро, бизларни тоқатимиз етмайдиган нарсага зўрлама! Бизларни афв эт, (гуноҳларимизни) мағфират қил, (ҳолимизга) раҳм айла! Ўзинг хожамизсан! Бас, бу кофир қавм устига Ўзинг бизни ғолиб қил!” (Бақара:286)
Ҳизб ут-Таҳрирнинг Ўзбекистондаги матбуот бўлими аъзоси Зайниддин
06.05.2023й
