بِسْمِ اللهِ الرَّحْمٰنِ الرَّحِيم

Матбуот баёноти

Адлия вазирлиги баёноти ўзбек ҳукуматининг мусулмонларга очиқ таҳдиддир

Ўзбекистон Республикаси Адлия вазирлиги 7 сентябр куни бир баёнот чиқарди. Унда жумладан шундай дейилади:

Бош қомусимизнинг 31-моддасига кўра, ҳар бир инсон хоҳлаган динга эътиқод қилиш ёки ҳеч қайси динга эътиқод қилмаслик ҳуқуқига эга… Бу шуни англатадики, ҳар ким ўз эътиқодига амал қилиш ёки қилмасликда мустақилдир… Кузатувлар кўрсатяптики, ахлоқий-диний нуқтаи назарларни ҳуқуқий муносабатлар предметига айлантиришга уриниш, миллий қадриятларимизга зид, инсонларнинг шахсий ҳуқуқларини топтовчи ва чекловчи ахборот ташвиқотлари олиб бориш ҳолатлари аниқланди… Мамлакатимизда диний қарашларни мажбуран сингдиришга йўл қўйилмайди. Қатъий ва ўзгармас ушбу конституциявий тамойилдан ҳеч қачон воз кечилмайди. Шахсларга диний қарашларни мажбурий сингдиришга қаратилган ҳар қандай хатти-ҳаракат, тарғибот-ташвиқот жавобгарликни келтириб чиқаради… Ўзбекистон халқи бундан 30 йил олдин ўзининг тараққиёт йўлини танлаб олган – у дунёвийликка асосланган инсонпарвар демократик ҳуқуқий давлат барпо этишни кўзлайди. Ушбу ҳақиқатни шубҳа остига олишга, мутаассиб ғояларни тарғибот қилишга ҳеч кимнинг ҳаққи йўқ. (Иқтибос тугади)

Адлия вазирлигининг бу баёноти ҳукумат позициясини акс эттириб турибди. Албатта, бу баёнот Исломга зид бўлибгина қолмай, балки унга қарши қаратилган эканлиги ойдек равшан бўлса-да, ундаги баъзи фикрларга тўхталиб ўтамиз. Аввало, шуни таъкидлаш керакки, баёнотда демократик принциплар ҳимоя қилинган экан, Адлия вазирлиги ва умуман ўзбек ҳукуматига бир савол бермоқчимиз: демократияни татбиқ қилиш ҳам аслида бир ақидани одамларга тиқиштириш эмасми? Зеро, демократия капитализмнинг таркибий қисми бўлиб, капитализм инсонга бу дунё ҳаёти ҳақида муайян фикрни, яъни дин ҳаётдан ажратилганлиги ҳақидаги умумий фикрни беради ва қонунлар ҳам шу фикрга асосланади. Демак, капитализм ҳам Ислом ёки социализм каби бир ақида, мафкура, мабдадир. Шундай бўлгач, сиз қандай қилиб ва қайси асосга кўра Ислом ва мусулмонларга бегона бўлган нарсани мажбурлаб тиқиштиришни қонуний ёки тўғри иш сифатида баҳолаяпсиз?! Бундан ташқари, сиз худдики юртимиздаги мусулмонларга танлаш имкониятини бергандек, улар гўёки демократия ва Исломни бир-бири билан таққослаб кўриб, шундан сўнг демократияни танлагандек гапирмоқдасиз. Ваҳоланки, Ўрта Осиёга Ислом даъвати етиб келиб, юрт аҳолиси мусулмон бўлганидан бери ва сохта мустақиллик берилганидан кейин ҳам Ўзбекистон аҳолиси мусулмонлигича қолмоқда. Бу  халқ Исломдан воз кечиб, демократияни танлагани йўқ! У ҳатто демократиянинг мазмун-моҳиятини ҳам тушунмайди, унга эргашмайди ҳам, аксинча унга қаршидир. Қолаверса, агар бу халқни Исломдан узоқлаштириш, турли макр-ҳийлалар билан унга Исломни ёмон кўрсатиш сиёсатини олиб бормай, уни ўз ҳолига қўйганингизда, одамларнинг яшин тезлигида ўз Исломларига қайтишларини кўрган бўлардингиз.

Энди динни ҳаётдан ажратишга асосланган конституцияни ҳурмат қилиш ва унга итоат этиш шартлигига келсак, буни аввало ҳукуматдан талаб қилинг. Чунки ушбу конституция қабул қилинганидан бери унга ҳукуматнинг ўзи бир кун ҳам амал қилмаган! Ҳеч кимга сир эмаски, Ўзбекистон норасмий ва оғзаки буйруқлар билан бошқарилади. Ҳукумат ўзи қабул қилган конституцияни ҳам, бошқа қонун-қоидаларни ҳам оёқости қилиб ташлаган. Бу инсон ўйлаб топган қонунларнинг нақадар яроқсиз эканлигини кўрсатади. Шундай бўлгани ҳолида сиз мусулмонлардан уни ҳурмат қилиш ва унга итоат этишни талаб қиляпсизми? Албатта, биз мусулмонлар қонунларга итоат этамиз, бироқ бу қонунларнинг манбаси тўғри бўлса. Яъни улар Ислом ақидаси асосида бўлсагина итоат қиламиз. Чунки “Ла илаҳа илаллоҳ Муҳаммадар расулуллоҳ” га иймон келтирган ҳар бир инсонга Исломий ҳаёт билан яшаш фарздир.

Ушбу баёнотнинг Исломга нисбатан нафрат-адоватга тўла эканлиги, у орқали соф Ислом даъватини ёяётган мусулмонларга ҳукуматнинг очиқ таҳдид қилаётгани билиниб турибди. Шунингдек, уни юртимиздаги мусулмонларнинг ўз Исломларига қайтаётганлигини кўрган ҳукуматнинг қўрқуви сифатида баҳолаш мумкин. Бизнинг айтар сўзимиз шуки, сиз энди мусулмонларнинг Ислом асосида уйғонишларини на таъқиб қилиб, на қамаб, на ўлдириб тўхтата оласиз. Бунга ўзингиз мана неча йиллардан бери гувоҳи бўлиб келяпсиз. Агар ақлингизни ишлатсангиз, бу ишингизни тўхтатасиз ва агар одамларнинг Исломий ҳаёт билан яшашлари борасида ёрдам бера олмасангиз, ҳеч бўлмаса бунга тўсиқ бўлишдан тийиласиз. Акс ҳолда Аллоҳнинг шиддатли азоби бошингизга тушадиган Кунга тайёргарлик кўраверинг.

يَسْمَعُ آيَاتِ اللَّهِ تُتْلَى عَلَيْهِ ثُمَّ يُصِرُّ مُسْتَكْبِرًا كَأَن لَّمْ يَسْمَعْهَا فَبَشِّرْهُ بِعَذَابٍ أَلِيمٍ

– “Ўзига тиловат қилинган Аллоҳнинг оятларини эшитади-ю, сўнгра, худди эшитмагандек, мутакаббирлик қилиб туриб олади. Бас, унга аламли азоб “хушхабар”ини бер”.                           (Жосия:8)

Ҳизб ут-Таҳрирнинг Ўзбекистондаги матбуот бўлими