بِسْمِ اللهِ الرَّحْمٰنِ الرَّحِيمِ

Матбуот баёноти

Бажва режими Халқаро Валюта Фонди шартларига кўниб, уларни одамларга Покистоннинг иқтисодий омади сифатида тавсия қилмоқда

Имрон Хон 2019 йил 19 ноябр куни ўз саҳифасида жўшқин твит қолдириб, унда: «Покистон иқтисоди ва ниҳоят тўғри йўналиш бўйлаб кетмоқда», деди. Имрон Хон бу билан жорий ҳисоб дефицитида яхши томонга ўзгариш борлигига ишора қилди. Хизматлар ва импорт товарларининг қиймати экспорт товарлар қийматидан ўтиб кетган пайтда жорий ҳисобда дефицит рўй беради. Лекин шундай бўлса-да, жорий ҳисоб дефицитидаги яхшиланиш (аслида бу тантана қилишга арзимайди) маҳаллий иқтисоднинг ачинарли эканини кўрсатмоқда. Чунки импорт жиҳатидан олиб қараганда, импортнинг пасайиши автомобил ва техникалар импортининг камайишига сабаб бўлади. Покистон саноатини эса, Халқаро Валюта Фонди шартлари бўғиб ташлаган. Бу шартлар мустамлакачилик шартлари бўлиб, энергия соҳасидаги нархларнинг баландлиги, солиқларнинг тинмай ортиб бориши ва катта инфляцияни пайдо қилган рупиянинг заифлигида ўз аксини топади. Экспорт жиҳатидан олиб қараганда эса, Халқаро Валюта Фонди маҳаллий саноатга катта мажбуриятлар юклаган. Рупиянинг қадрсизлиги туфайли уни ҳатто компенсация қилиб бўлмайди. Бу эса, Покистон маҳсулотларини ташқи бозорда арзон қилиб қўяди.

Шунинг учун Покистон ҳокимлари Халқаро Валюта Фонди шартларини бажарганларидан хурсанд бўлишмоқда. Ишлаб чиқариш бўғилиб бормоқда, одамлар эса ишсизлик кучайгани сабабли яхши яшашдан маҳрум бўлмоқда. Халқаро Валюта Фондининг мақсади, Покистон иқтисодини тиклаш эмас. Балки у халқаро тижоратда доллар ҳукмронлигини сақлаб қолишга ҳаракат қилади. Шунинг учун у Покистонда доллар захирасини яхшилаш мақсадида турли шартларни – бу шартлар маҳаллий иқтисодни вайрон қилувчи ва унга зарар етказувчи шартлар бўлишидан қатъий назар – қўймоқда. Шунингдек, валюта захирасини кучайтириш ва жорий ҳисоб дефицитини озайтиришга ҳаракат қилади.

Иқтисодни ривожлантиришнинг ягона йўли жорий низомни йўқ қилиб, унинг ўрнига Аллоҳ нозил қилган аҳкомлар билан ҳукм юритишдир. Пайғамбарлик минҳожи асосидаги Халифаликкина халқаро тижоратда доллар билан муомала қилишга чек қўяди. Исломда валюта тилла ва кумушдан иборат мустаҳкам асосга суянади. Халифалик тиклангач, у импорт ва экспорт соҳасида тилла ва кумуш билан муомала қилишни йўлга қўяди. Халқаро майдонда тилла ва кумуш валютаси ишлатилса Американинг бошқа давлатлар устидан ҳукмронлик қилишига имтиёз бераётган айирбошлаш курсларидаги ўйинларига чек қўйилади. Чунки доллар муҳим қийматга эга бўлмаган сохта валютадир. Маҳаллий жиҳатдан олиб қараганда, тилла динор ва кумуш дирҳам айирбошлаш курслари ва ишлаб чиқариш харажатларидаги барқарорликни таъминлайди. Натижада рупия қадрсизланиши туфайли содир бўлаётган кучли инфляциялар рўй бермайди. Шунинг учун барчамиз Аллоҳ нозил қилган аҳкомлар татбиқ қилиниши сари ҳаракат қилишимиз зарур. Токи, дунё ва охиратда Аллоҳнинг розилигига эришайлик. Аллоҳ Таоло айтади:

﴿وَابْتَغِ فِيمَا آتَاكَ اللَّهُ الدَّارَ الآخِرَةَ وَلاَ تَنسَ نَصِيبَكَ مِنَ الدُّنْيَا وَأَحْسِنْ كَمَا أَحْسَنَ اللَّهُ إِلَيْكَ وَلاَ تَبْغِ الْفَسَادَ فِي الأَرْضِ إِنَّ اللَّهَ لاَ يُحِبُّ الْمُفْسِدِينَ﴾

«Ва Аллоҳ сенга ато этган мол-давлат билан (аввало) охират (ободлигини) истагин ва дунёдан бўлган насибангни ҳам унутмагин. Аллоҳ сенга эҳсон қилгани каби сен ҳам (Аллоҳнинг бандаларига) инфоқ-эҳсон қил. Ерда (зулму-зўравонлик билан) бузғунчилик қилишга уринма. Чунки Аллоҳ бузғунчи кимсаларни суймас»                                                                         [Қасос 77]