Демократия жарчиларидан огоҳ бўлинг!

بِسْمِ اللهِ الرَّحْمٰنِ الرَّحِيم

Сўнгги йилларда Ўзбекистонда демократик ислоҳотларни талаб қилувчиларнинг фаоллашгани кузатилмоқда. Шиорларидан бирида “Автократия кетсин, ҳуқуқ давлати келсин” дейилаётган демократик фаолиятга сиёсатчи, иқтисодчи, тиббиёт ходими, журналист, блогер ва диндорлардан иборат фаоллар етакчилик қилмоқда. Уларнинг айримлари партия тузиш йўналишида курашаётган бўлса, бошқалари интернет тармоқларида ҳукумат ва халққа қаратилган ёзма ва видео мурожаатлар билан чиқишаётгани кўзга ташланади.

Ўз соҳасида мутахассис бўлган бундай кишиларнинг сиёсий чақириқлари бизнинг тузум, қонун ва сиёсат ҳақида тиниқ тасаввурга эга бўлмаган халқимизга ўз таъсирини ўтказмай қолмаяпти. Чунки инсонлар халқ ҳаёти тўкис бўлишига давлат имкон бермаётганини ва мухолифатга эргашган одамларнинг сиёсий танқидлари натижасида ҳукумат ўрнатган қўрқув девори аста-секин емирилаётганини кўрмоқда. Бундай ҳолатда оддий халқ ўшалар бераётган сиёсий фикрлар билан ўзининг ҳаёт ҳақидаги орзуларини озиқлантириши табиий ҳол. Бўлиб ҳам онгига “сиёсатга аралашма” деган таҳдидона фикр сингдирилган халқ, ўз кўзи билан чет давлатлардаги моддий имкониятларни кўрганидан кейин жонини хатарга қўйиб “эй халқимиз!” деб куйиниб гапираётган бундай демократ мухолифчиларга ишониши, уларни қўллаб-қувватлаши ва уларга эргашиши хавфи вужудга келади.

Ҳақиқатда Мирзиёевнинг тутруқсиз сиёсати ҳамманинг ҳам жонига тегди. Муаммоларни ҳамма ўз танасида ҳис қилиб турибди. Фақат шу муаммоларнинг асл келиб чиқиш сабаблари ва ечимларини жасорат билан пухта баён қиладиган етакчилар йўқ. Бундай вазиятда “Демократия – инсоният эришган энг мукаммал тузум”, «Демократия – ғояга олиб борувчи муносиб восита” каби гапларни айтувчи зиёлилар майдонга чиқишди. Улар барча соҳага кириб борган коррупциянинг ва бошқа муаммоларнинг манбаи деб ҳукуматни кўрсатишмоқда. Автократия – якка ҳокимлик йўқолса муаммолар ўз-ўзидан йўқ бўлиб кетади, деб халқнинг эътиборини Ўзбекистон ичкарисидаги муаммоларга қаратишмоқда. Ташқи сиёсат ҳақида сўз борганда эса, яқинларини ташлаб чет давлатларга ишлашга кетаётганларга ҳам, у ерлардан маййити қайтган минглаган ҳамюртларимизнинг ўлимига ҳам яккаҳокимлик сиёсати айбдор, деб масалага ўта юзаки қарашмоқда. Хуллас, масалага кенг доирада, яъни Ўзбекистон, Марказий Осиё ва бутун дунёни қамровчи идеологик нуқтаи назардан қарашмаяпти. Бунга сабаб, улар ўз олдига қўйган мақсадни ва унга олиб бориши гумон қилинган демократик асосларни тиниқ тушунишмайди. Ҳақ Субҳанаҳу айтади:

وَمَا يَتَّبِعُ أَكْثَرُهُمْ إِلاَّ ظَنًّا إَنَّ الظَّنَّ لاَ يُغْنِي مِنَ الْحَقِّ شَيْئًا إِنَّ اللّهَ عَلَيمٌ بِمَا يَفْعَلُونَ

– “Уларнинг кўплари гумонга эргашадилар, холос. Албатта, гумон ҳақ ўрнида ҳеч нарса бўла олмас”.                                                 (Юнус:36)

Юқорида келтирилган демократ мухолифлар ўз соҳасида мутахассис бўлган кишилардир. Бироқ улар мафкура, низом, бошқарув, сиёсат, қўйингки, миллионлаган, миллиардлаган инсонларнинг тақдирини белгилайдиган тузумлар ҳақида мутахассис эмаслар. Уларнинг бор йўқ истак ва интилиши бугунги кунда етакчилик қилаётган Ғарбдаги илм-фан, технология ва саноатдан баҳраманд бўлиш холос. Ваҳоланки, дунёқарашга алоқаси бўлмаган бундай соҳаларда (мафкуравий кураш ва совуқ уруш турткиси билан бўлса-да) Совет Иттифоқи (СССР) ҳам катта натижаларга эришган эди. Агар Ислом ҳам бир давлатда татбиқ этилса, рақобат талабидангина келиб чиқиб эмас, балки ўзининг асосларига кўра инсониятга янги уфқларни очиб беради.

Демократия халқ ҳокимияти демакдир. Демократия принциплари ҳам ўзгармасдир. У Руминияда, Чилида, Конгода қандай бўлса Туркия ва Индонезияда ҳам ўз асосига кўра фарқ қилмай, динни, яъни илоҳий ваҳийни давлат ва ҳаёт ишларидан узоқлатади. Демократ мухолифлар барча иллатларнинг манбаи деяётган якка ҳокимлик демократиянинг маҳсулидир. Чунки бу тузумда хўжайинлик ва қонун чиқариш ҳаққини халққа берилади, дейилса-да, амалда бир ҳовуч капиталистлар президент ва парламент устидан ҳукмронлик қилишади. Мана шу йирик сармоядорлар президент ва парламент сайловларининг жуда катта миқдордаги ташвиқот ҳаражатларини зиммасига олиш билан ҳокимият структуралари устидан ҳукмронликни қўлга киритишади. Ғарбдаги усти ялтироқ, асли шафқатсиз бўлган ҳаёт муҳитини ҳокимиятни қўлга олган оз сонли кишилар пайдо қилган. Шу сабабдан дунёдаги ҳамма диктаторлар қуруқ танқид қилинади ва ҳар йили экстремизм ва терроризмга (яъни Исломга) қарши курашни қўллаб-қувватлаш учун уларга катта миқдорда молиявий кўмаклар ажратилади. Оқибатда ҳукуматлар алмашса-да, мустамлакачи Америка ёки Россия ўрнатган устимиздаги зулм машинаси ишлашда давом этаверади.

Ўзбекистон аҳолисини мусулмонлар ташкил қилади, унинг Исломга чанқоқлигини социалистик тузум ҳам йўқ қила олмаган. Эндиликда Америка ва Европа давлатлари юртларимизда Ғарб дунёқараши ва фикрларини кенг ёйишга уринмоқда. Мақсадлари мусулмонлар фикр юритишлари ва ҳаёт ҳақидаги нуқтаи назари учун Ғарб мафкурасини асос қилиб олишига эришишдир. Бу билан Бухорий авлодларини Исломдан узилган ҳолда ушлаб туришни ва уни татбиқ қилишдан узоқлатишни мақсад қилишган. Кекса авлод коммунизм билан, кейингилар эса, ундан-да тубанроқ мафкуралар билан онгги ювилгани учун Исломни шахсий эътиқод ва ибодатдан иборат, деб тушуниб қолишган. Шу сабабдан Ислом нуқтаи назаридан туриб фикр билдирилса “сиёсатга динни нима алоқаси бор?” деган эътирозларни эшитасиз. Динининг мукаммаллигини тушунмаган халқ “Халифалик” сўзи нима учун таъқиқлангани сабабини ўрганишдан ҳам ғафлатда. Бунда фақат халқни айбдор санаш тўғри бўлмайди. Негаки, фикрий қолоқлик ва адашиб юришларнинг катта айбдорлари сарой уламоларидир. Улар Ислом асосидаги сиёсий фаолиятларга қаттиқ қарши туришиб, Қуръон оятларининг битта ҳарфи учун бериладиган ажрлар билан халқни чалғитишди. Улар Қуръон ва Исломнинг қандай мақсад учун Аллоҳ ҳузуридан нозил қилинганини ҳақиқатда тушунишмайди ёки қасддан яширишяпти. Ҳамма биладики, Росулуллоҳ ﷺ жоҳилият даврида ибодатга эмас, аввал иймонга даъват этганлар. Инсонларни яратилган нарсалар устида тафаккур юритишга ва ўзига нозил қилинаётган оятларни тадаббур қилишга чақирганлар. Инсонлар ўзлари фикрлаб Аллоҳга ва Унинг Росули ﷺга иймон келтирдилар. Сўнг солих амалларни шу даражада гўзал адо этдиларки, ҳатто Аллоҳ уларнинг баъзиларини тириклигидаёқ Жаннат эгаси эканлиги хушхабарини берди.

Демократияга чақираётган ўзини мусулмон деб биладиган биродарларимизга шуни таъкидлаймизки, улар демократик ўлкалардаги ойлик маошларни идеал кўрсатиш билан мусулмонларни дунёга ва куфр давлатларига қизиқишни уйғотиб қўяётганини билишармикин?! Ҳукм ва қонуннинг манбаи Қуръон ва Суннат эмас, халқ фикри дейиш куфр эканлигини, агар киши мана шу фикрни тушунган ҳолда айтса Исломдан чиқишини билишармикин?!

Росулуллоҳ ﷺ зулмлар кенг авж олган жамиятда шахс эркинликларига ёки халқ ҳокимиятига даъват қилмаганлар. Одамлар қандай яшашни (демократиядаги каби) ўзлари кенгашиб ҳал қилсинлар, демаганлар. У киши Аллоҳга ва Унинг пайғамбарига иймон келтиришга ҳамда Аллоҳ нозил қилган Қуръондаги ўзгармас қонунларга бўйин эгишга чақирганлар. Шу сабабдан бугун мусулмонлар олдидаги катта мажбурият қўлимизда Қуръон тургани ҳолда ақлимиз ва ҳаётимизни бузуқ демократия тушунчалари ҳамда ҳаёт тарзи ишғол қилишига йўл қўймасликдир. Демократия бузуқликка нисбатан мусулмонларнинг оёқ-қўлини кишанлайди. Саййидимиз Муҳаммад Мустафо ﷺни ҳақоратлашни эса, фикр эркинлиги деб, бу жирканч эркинликни ҳурмат қилишни мусулмонлардан талаб қилади…

Авлодлари ўзидан ҳам тақводор мўмин-мўминалар бўлиб етишишини истаганлар юртларимизда ЛГБТ байроқлари эмас, Росулуллоҳ ﷺнинг байроқлари хилпираб туришини хоҳлаганлар, бузуқ демократиянинг ҳар қандай кўринишига қарши курашишсин. Зеро, демократия нафс ва ҳаво-ю хоҳишни асос қилишга тарғиб қилади. Ислом эса, Аллоҳнинг буйруқ ва қайтариқларини асос қилиш билан нафс ва хоҳишларни инсонга хотиржамлик ва саодатни таъминлайдиган йўсинда қондиради. Аллоҳ Таоло айтади:

وَلَيَنْصُرَنَّ اللَّهُ مَنْ يَنْصُرُهُ إِنَّ اللَّهَ لَقَوِيٌّ عَزِيزٌ

– “Албатта Аллоҳ Ўзига (яъни динига) ёрдам берадиган зотларни ғолиб қилур. Шубҳасиз Аллоҳ кучли, қудратлидир”.           (Ҳаж:40)

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

30.03.2022й