Дунёни қутқаришга фақат Ислом Уммати қодир!

بِسْمِ اللهِ الرَّحْمٰنِ الرَّحِيمِ

Бугун Ғарб капиталистик ҳазорат-дунёқарашидан таъсирланмаган миллат қолмади. Глобализация натижасида у бутун бошли халқ ва миллатларни ютиб юборди. Ҳеч ким унга қаршилик кўрсата олмади, балки ундан янада кучлироқ таъсирланиш авж олди. Капиталистик тузумнинг асл ёвуз башараси ҳаммага маълум бўла бошлагач, кеч бўлганди. У ҳамма ёқни эгаллаб, худди чирмовиқдек ўраб-чирмаб, домига тортиб олишга улгурганди. Энди бу яроқсиз тузумнинг шафқатсиз ва иккиюзламачи қонунларини қандайдир қилиб “ислоҳ қилиш”дан бошқа чора топа олишмаяпти…

Бироқ таъкидлаш лозимки, бошқа миллатлар ва халқларни маҳв этган капиталистик демократияга ҳали-ҳануз қаттиқ қаршилик кўрсатаётган ягона миллат бор. У Ислом Умматидир! Фақат угина бу ёвуз тузумга қарши бош кўтаришда давом этяпти. Бу уммат ёлғиз ўзи бутун дунёга қарши чиқмоқда, десак муболаға бўлмайди. Чунки дунё давлатлари Ислом ва мусулмонларга қарши урушда йирик капиталист давлатлар билан бир сафда туриб олган. Шунинг учун ҳам бугун умматнинг бошига ақлбовар қилмас зулму ситамлар ёғилмоқда. Энг арзон қон мусулмон қони бўлиб қолган. Энг катта бало-мусибатларга ҳам мусулмон халқлар гирифтор қилинмоқда. Аммо Ислом Уммати неча бор йиқилмасин, ҳар сафар яна қаддини ростлашга уриняпти. Қайта-қайта зарба еявериб, вужуди моматалоқ бўлиб кетганига қарамай, барибир таслим бўлмаяпти.

Албатта, бундай ҳолат Америка, Британия, Франция, Россия, Хитой каби мустамлакачи давлатларнинг ақлини бошидан учиряпти. Лекин улар қўлларида “кузир карта”лар ҳам тугаб битганига қарамай, Ислом Умматини тиз чўктириш учун янгидан янги фитналар, ҳийла ва найрангларни ўйлаб топишдан ҳеч ҳам чарчашмаяпти. Ахийри энди фақат куч ишлатиш, таҳдид қилиш билан Ислом Умматини бостиришга ҳаракат қилишяпти. Бу энг сўнгги чорадир, чунки одатда бошқа ҳеч нима иш бермай қўйганидан кейин, ноилож очиқдан-очиқ қўрқитиш ва куч ишлатишга ўтилади. Аслида, бу уларнинг ожизлашиб, кучсизланиб қолганлигига далолат қилади. Демак, улар жуда қаттиқ қўрқувдалар, Ислом Умматининг қўли баланд келадиган кунларга жуда яқин қолаётганидан жазавага тушиб қолганлар.

Энди бутун дунёни домига тортган капиталистик мабданинг (ақида ва тузум) нега мусулмонларга кучи етмаётганига келсак, бошқа халқларда унга қарши тура оладиган мабда-мафкура йўқ эди. Улар бу дунё ҳаёти моҳиятини очиб берадиган ва барча муаммоларга ечим берадиган мафкурага эга эмасдилар. Эга бўлганлари ҳам – масалан, Россия каби – қисқа вақт ичида ундан воз кечиб, капитализмни қабул қилди. Ислом Умматида эса бундай мафкура мавжуд, у – Ислом мабдасидир. Гарчи мусулмонлар Ислом ва унинг аҳкомларини тушунишда турли хато-камчиликларга йўл қўйган бўлсалар-да, у ҳамон тирикдир. Дарҳақиқат, ҳозир Ислом Уммати ўз динига қайтишни хоҳламоқда, яъни Исломий уйғонишни бошидан кечирмоқда. Бу уйғониш кучайиб борар экан, параллел равишда дунё тартиботини белгилаётган капитализмга ва ана шу тузум ҳомийлари бўлмиш кофир мустамлакачи давлатларга қарши туриши ҳам кучаймоқда. Мусулмонларнинг бундай тартиботга қарши бош кўтаришлари табиий ҳол, чунки у Аллоҳ таолонинг буйруқ ва қайтариқларига тамоман зид келади.

Шундай қилиб, Ислом Уммати капитализмни муаммоларнинг туб ечими сифатида қабул қилмади. Шу вақтгача бирорта мусулмон халқ капиталистик демократияга қайрилиб ҳам қарамади. Ҳолбуки, мусулмон халқларга уни тиқиштириш учун қанчалик кўп уринишлар бўлганини ва бўлаётганини санаб тугатиб бўлмайди. Шунга қарамай, кофир мустамлакачи давлатлар ва уларга хизмат қилаётган Исломий юртлар ҳукмдорларининг мусулмонларга етти ёт бегона капитализмни тиқиштириш учун сарфлаган улкан меҳнати ва маблағлари Аллоҳнинг ёрдами ила ҳавога учди. Мусулмонларнинг бошқа халқлардан ажралиб турадиган жиҳати мана шу – уларда қоядек мустаҳкам Ислом мафкураси бор. У ҳақ ва адолатга асосланган бўлиб, инсон ақлини қаноатлантиради, фитратига мос келади ва қалбини хотиржам қилади. Хўш, мусулмонлар бундай сифатлардан мосуво бўлган капитализмни қабул қилсинларми?! Яхши нарсани паст нарсага алмашсинларми?! Албатта, йўқ!

Уммат ўзининг буюк Исломий ақидаси ва тенгсиз тузумини ҳаётга татбиқ қиладиган кунларга тобора яқинлашар экан, бу кун нафақат Ислом оламининг, балки бутун дунёнинг ўзгаришидан дарак беради. Чунки бугун бутун дунёни ҳозирги боши берк кўчадан мана шу Уммат Исломни ҳаётда татбиқ қилиш орқалигина чиқара олади. У Ислом низомини ўзида гавдалантирувчи Халифалик давлатини тиклайди ва бу давлат мазлумлар ҳимоячиси ва ғамхўрига айланади. Бу нафақат мусулмонларга, балки дунё бўйича эзилаётган, зулм остида қолган барча халқларга тегишлидир. Бир сўз билан айтганда, Халифалик дунёни ўзгартиради, унга ҳақ ва адолат билан етакчилик қилади.

Эй мусулмон биродар! Кўриб турганингиздек, сизнинг елкангизда дунёни ўзгартириш масъулияти бор ва сиз буни амалга оширишга қодирсиз! Зеро, Аллоҳ таоло бизнинг зиммамизга тоқатимиздан ортиқча нарсани юкламайди. Демак, дунёни ўзгартиришга тоқатингиз ҳам, имкониятингиз ҳам етади. Бундай буюк ишга бор куч-қувватингиз, молингиз ва жонингиз билан киришинг! Ана шунда Аллоҳнинг розилигига эришасиз ва икки дунё саодатини қўлга киритасиз иншаАллоҳ!

Ҳизб ут-Таҳрир Ўзбекистон Матбуот бўлими аъзоси Форуқ

18.08.2025й