بِسْمِ اللهِ الرَّحْمٰنِ الرَّحِيم

Халифалик – ҳам буюк фарз, ҳам фавқулодда эҳтиёждир

Бугун Ислом Уммати бошдан кечираётган улкан мусибат ва машаққатлар унинг Пайғамбарлик минҳожи асосидаги рошид Халифалик давлатига жуда-жуда муҳтож эканини кўрсатиб, бунга асло шубҳа қолдирмаяпти. Зеро, бу давлат мусулмонларни мудофаа қилиб, номусларини сақлайди ҳамда Росулуллоҳ ﷺ асҳоблари ва тобеинлар ўн уч аср мобайнида етказганларидек, Исломни бутун дунёга ҳидоят ва раҳмат рисолати сифатида етказади.

Мусулмонлар бугун қай аҳволда қолганлари ҳеч кимга сир бўлмай қолди: узоқдаги кимсалар ҳам, яқиндагилар ҳам уларга қарши тил бириктирмоқда… Барча умматлар, ҳатто заифлари ҳам уларнинг устига итдек ёпирилишмоқда… Юрт бойликлари талон-тарож қилиниб, истак-иродасидан маҳрум қилинди, мустамлакачи кофирлар у ерларни ўз томорқаларига айлантириб олиб, истаганларича фасод, бузғунчилик тарқатишмоқда… Бизнинг баъзи диндош фарзандларимиз ва малай, қўриқчи ҳукмдорлар ҳам уларнинг сафига ўтиб олиб, душманга хизмат қилишяпти. Барчаси бирга тил бириктириб, Аллоҳнинг динига қарши, Аллоҳ шариатини ҳоким қилиш учун фаолият қилаётганларга қарши курашишяпти… Уммат фарзандлари орасидаги андак ҳаракат қилганки инсонни йўқ қилиш учун барча имкониятларини, саъй-ҳаракатларини сарфлашяпти… Буларнинг барчасини фақат хўжайинларини рози қилиш учун бажаришяпти.

Уларнинг жиноятлари шуларгагина чекланмай, фикрий курашгача етиб борди. Бу курашни Ғарб мусулмонларга қарши сарой уламолари ва ахборот воситалари орқали олиб боряпти… Ахборот воситалари мусулмонларни адаштириш ва динларидан узоқ қилиш вазифасини бажариб беряпти.

Эй ростгўй мусулмонлар!

Ғарб карвонига эргашиш, фикрларини қабул қилиш, қарорларини ижро этиш ҳамда ташкилотларига бўйсуниш билан Ислом Умматини бошдан кечираётган бу азоб-уқубатлардан ҳаргиз қутқариб бўлмайди ва бу ўз исботини топди ҳам. Билъакс, бунда зиёндан ўзга нарса йўқ. Аллоҳ Таоло бундай дейди:

﴿يَا أَيُّهَا الَّذِينَ آمَنُوا إِنْ تُطِيعُوا الَّذِينَ كَفَرُوا يَرُدُّوكُمْ عَلَى أَعْقَابِكُمْ فَتَنْقَلِبُوا خَاسِرِينَ﴾

«Эй мўминлар, агар кофирларга итоат қилсангиз, сизларни ортингизга (куфрга) қайтарадилар. Бас, зиён кўргувчиларга айланиб қоласизлар»                                                     [Оли Имрон 149]

Шунингдек, ноумидлик, тушкунлик ва таслим бўлиш билан ҳам Умматни азоблардан қутқариб бўлмайди. Булар билан бирорта ҳам уммат халос бўлмаган. Аксинча, улар билан хорлик ва хўрликка юз тутамиз, бизни ёмон кўрувчи душманларимиз ва ҳукмдорлар динимиз, тақдиримиз, номусимиз устидан зўравонлик қилишади.

Шубҳасиз, бугун ушбу аянчли аҳволимиздан қутулиш ва Уммат ҳолини ислоҳ этишнинг ягона йўли аввалда нима ислоҳ қилинган бўлса, ўша нарса билан ислоҳ қилишдир. Яъни Пайғамбарлик минҳожи асосидаги рошид Халифалик соясида Ислом билан ҳукм юритишдир. Ислом – уни татбиқ қиладиган, фуқароси ишларини у билан бошқарадиган, уни ҳидоят ва нур сифатида бошқаларга етказадиган давлат билангина ҳаёт воқеида гавдаланади.

Халифалик билангина бўлиниш ва тарқоқлигимизни ягона байроқ остида қайта бирлаштирамиз, фақат у билангина душманимиз макрини қайтариб, бизга зиён етказаётган қўлларига болта урамиз, фақат уни барпо этиш билангина Умматимиз инсонлар учун чиқарилган энг яхши уммат мақомига қайтади.

Росулуллоҳ ﷺ

«… وَإِنَّمَا الإِمَامُ جُنَّةٌ يُقَاتَلُ مِنْ وَرَائِهِ وَيُتَّقَى بِهِ…»

«… Албатта имом-халифа қалқондир, унинг ортида жанг қилинади, у билан ҳимояланилади…», дея марҳамат қилдилар. Демак, халифа ва Халифалик қалқон, яъни, ҳимоя экан. Кимнинг ҳимояси бўлса, Аллоҳнинг изни ила, у албатта нусрат қучади, ҳақ-ҳуқуқлари ва юрти оёқ ости қилинмайди, душманлари унга ҳатто яқинлашишга ҳам журъат қилолмайди.

Халифалик тарихи бунга қатъий далилдир. Чунки у Рум ва Форс давлатларини парчалаб юборган. Шунингдек, Халифалик юртлар ва пойтахтларни фатҳ қилиб, уларни Ислом адолати ила бошқарган.

Эй Шомдаги мусулмонлар!

Мана, Ғарб сизни нималар қилганини ўз кўзингиз билан кўрдингиз, танингиз билан ҳис қилдингиз… Унинг малайи Башарга қарши қўзғалгандингиз, сизга жавоби қатли ом билан мукофотлаш бўлди, барча турдаги тақиқлангану, тақиқланмаган қуроллар билан сизни қирғин қилди… уй-жойингиздан маҳрум қилди, қочқинга айлантирди, буларни сизга ўзини дўст қилиб кўрсатганлар ва гуруҳ етакчилари билан тил бириктирган ҳолда амалга оширди. Бу етакчилар қўлига қурол олиб, сизни мудофаа қилишларини иддао қилишганди, сиз ҳам уларга ишониб, ҳону монингизни улар учун сарфладингиз, бирга жанг қилиш учун гулдек фарзандларингизни бердингиз… Бироқ бу кимсалар шунча берган қурбонларингизни қўзғолонингиз ва динингиз душманларига сотди, ўзларини уларга гаров қилиб топширди… Гаров қилишгани учун ҳам истак-иродаларидан айрилиб, сулҳ ва қон тўкишни тўхтатиш, деган дастаклар остида душманингиз режаларини бажарувчи қўғирчоқларга айланишди.

Эй Шом диёридаги сабр-бардошли мусулмонлар!

Зулматли кунлар жуда чўзилиб кетди, юраклар бўғизларга тиқилди, ёрдам берувчи топилмай қолди… Бутун давлатларнинг Уммат қўзғолонига қарши тил бириктираётганини, берган ваъдалари ёлғон ва сароб эканини ўзингиз кўриб турибсиз. Куни кеча, Туркиянинг кузатув пунктлари бўлишига қарамай ва уларнинг кўз-ўнгида Ғарбий Ҳалаб ва Идлибда қатли ом қилишгани бунга яққол мисол бўлади. Умматни бу аҳволдан қутқаришнинг ягона йўли аждодларимизни қутқарган йўлдир. У ҳам бўлса, Пайғамбарлик минҳожи асосидаги рошид Халифаликни барпо этиш йўлидир. Зотан, Халифалик Роббимиз фарзи, қудратимиз манбаи, халос бўлишимизнинг ягона тариқатидир. Уни барпо этиш билан душманларимиз макрини қайтарамиз ҳамда мустамлакачилардан халос бўлиб, куч-қудрат ва нусратга ноил бўламиз. Чунки Халифалик сизнинг қутқарув чамбарагингиз, халоскорингиз, бош уражак қўрғонингиздир. Халифалик нусратга интилаётганлар учун зарурат бўлишидан ташқари, фарздир, фарзларнинг тожидир. У бу дунёда куч-қудрат, охиратда муваффақият келтиради. Бас, уни барпо этишга фаолият олиб бораётганлар сафига қўшилиб, сўзда ва амалда ҳаракат қилинг. Шу орқали бир-бирингиз билан ҳам, Роббингиз билан ҳам аҳдлашиб, бу аҳдингизни маҳкам тутинг, унга қаттиқ амал қилинг. Ҳақиқатдан ҳам, рошид Халифалик халоскорингиздир.

Ҳизб ут-Таҳрир                                                                        2 зул-ҳижжа 1439ҳ

Сурия вилояти                                                                         13 август 2018м