بسم الله الرحمن الرحيم

Хотиржамлик – асл бахтдир

Бугунги кунда инсониятга етишмаётган ва эришиш ўта қийин бўлиб бораётган нарсалардан бири бу қалб хотиржамлигидир. Худди бозорда бир маҳсулот кундан кунга қимматлашиб боргани каби унинг нархи қолган ҳамма нарсаларнинг нархидан ҳам қимматроқ бўлиб бораётгандек гўё. Хотиржамликнинг йўқолиши ёки умуман хотиржамликни билмай яшаш муаммоларнинг ечилмаслигидан, аниқроқ айтадиган бўлсак, муаммоларга тўғри ечим берилмаслигидан келиб чиқади. Агар инсонда қалб хотиржамлиги бўлмаса, у ҳеч қачон ўзини чинакамига бахтли ҳис қила олмайди. Бу гап бою камбағалга ҳам, раҳбар ва хизматчига ҳам, ғарблигу шарқликка ҳам, хуллас инсон зоти борки, ҳаммага тегишли. Ҳаттоки ўша оғиз кўпиртириб мақталадиган Америка ва Европа давлатларида ҳам инсонларда руҳий тушкунлик ҳолатлари тобора авж олиб бораётганлигини уларнинг ўзлари ҳам тан олмоқдалар. Сўнгги маълумотларга кўра, Европа Иттифоқи давлатларида ҳар олтинчи европалик руҳий тушкунликдан азият чекар экан ва бу умумий ҳисобда ҳар йили 600 миллиард доллар миқдорида зарар келтирар экан. Европалик мутахассислар зарар миқдори янада ортиб кетмасидан олдин бу муаммога тезроқ ечим топиш кераклигини таъкидлашган. Шу ўринда таъкидлаш керакки, Европа давлатларида моддий манфаатдорликка асосланган капиталистик тузум татбиқ қилинишини эътиборга оладиган бўлсак, бу муаммони ҳам айнан моддий зарар ортиб кетишини олдини олиш учун ҳал қилиниши зарур, деб ҳисоблашяпти. Демак, агар моддий зарар унчалик кўп бўлмаганида бу муаммо ҳисобланмас эди. Инсонларнинг руҳий тушкунликка тушишлари моддий зарар келтираётгани учунгина муаммо ҳисобланмоқда. Аслида, ҳамма муаммо ҳам шунда. Капиталистик тузумда моддий манфаат муқаддас ҳисобланади, унга ҳеч нима тенглаштирилмайди, ҳатто яқин ҳам кела олмайди. Бу тузум инсонларни қийнаётган оиладаги, жамиятдаги ва инсонлар ўртасидаги алоқаларда келиб чиқадиган муаммоларга ечим бермайди, агар берса ҳам у нотўғри бўлади. Бунинг ортидан инсонларда руҳий зўриқиш кучайиб бораверади, қалб хотиржамлиги йўқолади.

Кўкка кўтариб мақталадиган Ғарб давлатларидан бири бўлган Америкада ҳам шунга ўхшаш ҳолат ҳукмрон. Деярли ҳар бир оиланинг ўз оилавий психологи бор. Психология бўйича жуда кўп илмий ишлар қилинган, китоблар ёзилган, маърузалар ўқилган, хуллас бу соҳага жуда катта эътибор қаратилган. Албатта буларнинг барчаси учун жуда катта маблағ сарфланади. Оиладами, ишдами, одамлар билан алоқалардами, нимаики муаммо бўлса ҳамма биринчи бўлиб психологга мурожаат қилади. Чунки капиталистик ақидада инсон муаммосига тўлиқ ва тўғри ечим берилмаган. Ўзи эътиқод қилаётган ақидадан ечим топа олмаган ёки топса ҳам ечимдан қалби хотиржам бўлмаган ғарблик ноилож психологга сўнгги умид сифатида қарайди. Бу ақида инсонни бахтли яшаши учун, яъни қалби хотиржам бўлиши учун унга мутлақ эркинлик берилиши зарур, деб ҳисоблади. Лекин бугунги кун кўрсатиб турибдики, инсонни айнан мутлақ эркинлик бахтсиз қилди, қалб хотиржамлигини бериш ўрнига руҳий тушкунликка туширди.

Юқоридаги мулоҳазалар фақат Ғарб оламига тегишли эмас, бу исломий оламга ҳам тегишлидир. Агар ғарбликлар ўзлари эътиқод қилаётган ақидадан ечим топа олмаётганларидан руҳий зўриқишга учраётган бўлсалар, мусулмонлар Исломда барча муаммоларга ечим бўла туриб, уни татбиқ этмаётганларидан азият чекмоқдалар. Умуман олиб қараганда, мусулмонлар билан бошқа халқларнинг инсон сифатидаги муаммолари бир хил. Чунки мусулмон ҳам, ғайримусулмон ҳам инсон, фақат ақидаси бошқа-бошқа холос. Ислом ақидасидан келиб чиқадиган ечимлар эса, инсон зоти борки барчасига қалб хотиржамлигини беради. Бундан бошқа ҳеч қандай ақида ёки бошқа нарса инсон муаммосига – у хоҳ катта, хоҳ кичик бўлсин – тўғри ечим бера олмайди. Бунга инсониятнинг тарихи ва бугуни гувоҳлик бермоқда. Қаерда ва қачон бўлса ҳам Ислом берган ечимлар татбиқ қилинган бўлса, ўша ерда фаровонлик, адолат қарор топган, одамлар орасида меҳр-оқибат кучли бўлган ва албатта уларнинг қалблари ором олиб, бахтли ҳаёт кечирганлар. Қаердаки инсоннинг ноқис ақли маҳсули бўлган қонунлар татбиқ қилинган бўлса, ўша ерда уруш, вайронагарчилик, йўқсиллик доимий равишда соя солиб турган, инсонлар қалб хотиржамлиги нималигини билмай азоб-уқубатда, руҳан абгор ҳолатда яшаганлар.

Хулоса қиладиган бўлсак, бутун оламлар Яратувчиси Аллоҳ Таоло дастури амал қилиб берган Буюк Ислом динининг, унинг ўхшаши йўқ бўлган ўзига хос низомининг татбиқи бутун инсоният учун сув ва ҳаводек зарур бўлиб турибди. Тоғдек уюлиб ётган ва инсонларга азоб-уқубат келтираётган барча муаммоларнинг ечими фақат Исломдадир. У ташна қалбларга хотиржамлик берувчи ва асл бахт лаззатини торттирувчи ягона чашмадир.

Ҳизб ут-Таҳрирнинг Ўзбекистондаги медиа офиси. Фаррух

29.11.2018