Куч органларини ҳимоя қилишга қаратилган қонун лойиҳаси халқни репрессия қилишни кучайтиришдир

بِسْمِ اللهِ الرَّحْمٰنِ الرَّحِيم

Хабар: Ўзбекистонда ички ишлар органлари ходимлари, миллий гвардия ҳарбий хизматчилари ва бошқа ҳокимият вакилларининг ўз хизмат бурчини бажаришига қаршилик кўрсатганлик ёки тўсқинлик қилганлик учун жазо кескин кучайтирилиши мумкин (“Маҳалла” газетаси, 21 август).

Жиноят кодексига ҳамда Маъмурий жавобгарлик тўғрисидаги кодексга ўзгартишлар киритиш ҳақидаги қонун лойиҳасида ана шу жиҳат таъкидланган. Айни чоқда, мазкур лойиҳа депутатларнинг эътирозларига сабаб бўлмоқда.

“Назаримда, республикамизда ички ишлар органи ходимлари хатти-ҳаракатидан келиб чиқсак, бу лойиҳани қабул қилиш бироз эрта деб ўйлайман… Барчангизга маълум, ижтимоий тармоқлар орқали ички ишлар ходимларининг хатти-ҳаракати билан боғлиқ салбий ҳолатларни кузатиб боряпмиз. Бундай ҳолатда мазкур қонунни қабул қилиш тескари натижаларни бериши мумкин…”, – дейди Олий Мажлис Қонунчилик палатаси депутати Қодир Жўраев. (Озодлик, 29.08.2021й)

Изоҳ: Одатда, адолат қарор топмаган юртда кучишлатар тизимларга кўп ваколатлар ва кенг имкониятлар берилади. Бу эса, ушбу тизим вакилларининг ҳаддидан ошишига, одамларга зулм қилишига олиб келади. Ўз ўрнида одамларнинг бундай зулмга тоқати етмай, орган ходимларига қаршилик қиладилар, уларнинг талабларини бажаришдан бўйин товлайдилар. Ахир, ҳар соҳада зулм ҳаддан ташқари кучайиб бораётган бир пайтда халқнинг норози бўлиши табиий ҳолат-да. Бироқ ҳукумат одамларнинг муаммоларига тўғри ечим бериш ўрнига, уларни куч билан бостиришни афзал кўрмоқда. Шунинг учун ҳукуматни халқдан ҳимоя қилишда асосий қуролга айланган куч тузилмаларига кенг ваколатлар бермоқда. Ички ишлар органлари ходимлари, миллий гвардия ҳарбий хизматчилари ва бошқа ҳокимият вакилларининг ўз хизмат бурчини бажаришига қаршилик кўрсатганлик ёки тўсқинлик қилганлик учун жазонинг кескин кучайтирилиши тўғрисидаги қонун лойиҳаси ҳам шу мақсадда ишлаб чиқилган. Ҳукуматнинг бундай йўл тутиши нотўғри эканлиги шу даражада очиқ-ойдинки, ҳатто депутатлар ҳам бу лойиҳага эътироз билдиришган. Бундан кўриниб турибдики, ҳукумат одамларни жазолаш борасида чораларни кучайтиришдан халқни қўрқувда ушлаб, ўз бошқаруви давомийлигини таъминлашни кўзламоқда. Бир сўз билан айтганда, бу ишлар Мирзиёев ўзи ахлат тузум, деб номлаган Каримов даврини ўзгартираётганлиги ҳақидаги даъволарининг ёлғонлигини яна бир исботидир.

Яна шуни эслатиб қўймоқчимизки, шу йилнинг июл ойи давомида куч органлари томонидан уч нафар фуқаро қийноққа солиниб ўлдирилди. Ундан олдин ҳам орган ходимларининг қўли бегуноҳ одамлар қонига ботган ҳолатлар кўп бўлган. Бироқ ушбу жиноятларга нисбатан ҳукумат томонидан таъсирчан чоралар кўрилмади. Ҳукумат – худди Каримов даврида бўлганидек – буларнинг барчасига кўз юмиб келди. Агар юқоридаги қонун лойиҳаси қабул қилинадиган бўлса, ҳукумат орган ходимларининг жиноятларини рағбатлантираётганлиги яна бир бора ўз исботини топади, худдики елкасига қоқиб, шундай давом этинглар, дегандек. Бироқ ушбу қонун лойиҳаси қабул қилинмаса ҳам ҳеч бир ўзгариш юз бермайди. Чунки бу қонун лойиҳасидан кўзланган мақсад ноқонуний бўлаётган ишларни қонунийлаштириб қўйиш холос.

Юртимиз аҳли бундай қонунларнинг ўзларига қарши чиқарилаётганини яхши билади. Буни фақат аҳмоқ одамгина ўз фойдаси учун деб билиши мумкин. Бироқ буни билиш билан, ҳатто танқид қилиш билан ҳам иш битмайди. Сўзимиз бошида айтганимиздек, адолат қарор топмаган юртда мана шундай халққа қарши бўлган қонунлар татбиқ қилинади. Агар бошқарув адолатли бўлса, одамлар норози бўлмайдилар, аксинча ҳукуматни қўллаб-қувватлайдилар, мустаҳкам таянч бўладилар. Ислом татбиқи даврида мана шундай бўлган эди. Уммат ўз ҳокимларини яхши кўрар ва уларни дуо қиларди, ҳокимлар ҳам умматни яхши кўрар ва уни дуо қиларди. Умматга нисбатан қўрқитув ва жазолаш билан муомала қилмасдилар, балки адолат ва яхшилик билан муомала қилардилар. Шунинг учун ҳам Умар р.а. халифа бўлган даврида ҳеч қандай қўриқчисиз, кўчада, бир дарахтнинг соясида хотиржам ухлаган эди. Шунга кўра айтамизки, мусулмонлар эътиборни динни ҳаётдан ажратишга асосланган қонунларни қабул қилиш ёки қилмаслик ёки уларни ислоҳ қилишга эмас, балки ушбу ботил тузумни таг-томири билан қўпориб ташлаб, илоҳий тузумни ҳаётга қайтаришга қаратишлари лозим.   

أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللّهِ حُكْمًا لِّقَوْمٍ يُوقِنُونَ

– “Жоҳилият ҳукмини истайдиларми?! Аниқ ишонадиган қавмлар учун Аллоҳдан кўра ҳукми яхшироқ ким бор?!” (Моида:50)

Ҳизб ут-Таҳрирнинг Ўзбекистондаги матбуот бўлими аъзоси Фаррух

09.09.2021й