Россиянинг Лукашенко орқали провокациясига муносиб жавоб

بِسْمِ اللهِ الرَّحْمٰنِ الرَّحِيم

Беларусь Республикаси президенти Александр Лукашенко Воронеж вилояти губернатори Александр Гусев билан учрашувда Россия ва Беларусь Иттифоқ давлатига келгусида собиқ СССР таркибига кирган бошқа республикалар ҳам қўшилишини урғулаб провокацион фикр билдирган. Жумладан у, “Ўйлашимча, Туркманистон, Ўзбекистон ва Тожикистон ҳам иқтисодий заруриятдан келиб чиқиб, қўшилади. Арманистоннинг ҳам борадиган жойи йўқ”, деган.

2015 йил Россия армиясининг Суриядаги муборак Шом қўзғалонини бостириш учун қўллаган ваҳшийликлари Россияни бутун дунёга аср жиноятчиси сифатида танитди. Бироқ қурбон кетганлар мусулмонлар бўлгани учун Россияга ҳеч қандай босим бўлмади. Аксинча Америка президенти Доналд Трампнинг Қрим масаласида Россияга ён бериши Москванинг сиёсий мавқеини бир мунча мустаҳкамлади. Украина босқини эса, Россияни иқтисодий жазо чоралари билан юзлашишдан ташқари Собиқ Шўро давлатларидаги манфаатларидан ажралиш хатарига йўлиқтирди. Шунинг учун Кремлнинг сиёсий режаларини таҳдидли равишда очиқ баён қилишда Жириновский каби Лукашенкодан фойдаланилаётганини кўряпмиз. Иддао ва таъмадан иборат бундай гаплар Россия ўзининг томорқаси деб биладиган Марказий Осиё давлатларида қўл келиши мумкин. Чунки бу юртларда бошқарув маъмурий буйруқбозлик асосида юритилади. Масалага бошқа тарафдан қаралса, ҳар қандай мустамлакачи давлат ўзига хос услуб билан давлатларни ўзига қарам қилади. Масалан, Хитой ҳозирда Қирғизистон ва Ўзбекистонни ўзига боғлайдиган янги транспорт йўлагини тайёрламоқда. Бу режа Хитойнинг чет давлатлардаги манфаатларга иқтисодий ва молиявий лойиҳалар орқали етишни кўзлаётганини англатади. Америка эса, сиёсий, иқтисодий, ижтимоий ва сақофий дастурлари орқали ўз нуфузини ёяди. Масалан, олий таълим муассасаларига талабаликка қабул қилишда инглиз тилига талаб кучаяётгани Ўзбекистонда Ғарб мафкурасининг илдизи мустаҳкамланаётганини кўрсатади. Россия манфаатларини рўёбга чиқаришда асосан ҳарбий қудратига ва у билан таҳдид қилишга суяниб келади. Шунга кўра, Лукашенконинг иддаоларини Россиянинг айиқ сиёсатининг бир кўриниши дейишимиз мумкин. Мазкур давлатлар халқимизнинг тақдирини ўзига бўйсундириш мақсадида турли макр ва таҳдидларни қўллашар экан, уларга нисбатан тўғри позиция эгаллай олмай ожизлик билан улар билан муносабатларини одатдагидек давом эттираётган Ўрта Осиёнинг миллий республикалари мустақил давлатлар эмаслиги ойдек равшан бўлиб қолади. Чунки мустақил бўлиш халқининг эътиқодидан келиб чиқиб, ана шу эътиқодга суяниш ва унга кўра мустаҳкам позицияни эгаллашни, қандай яшашни ва ким билан дўст, ким билан душман бўлишни ҳам шу эътиқодга кўра ўзи белгилашда намоён бўлади. Бошқача қилиб айтганда, иқтисодий танглик сабаб Россияга қўшилиши ҳақида башорат қилинадиган заиф давлат бўлмайди.

Лукашенконинг иддаоларига Шавкат Мирзиёевдан раддия кутаётган сиёсий фаолларга келсак, улар Ўзбекистон чегаралари доирасида фикрлаётган кишилардир. Чунки ҳамма билиб турибдики, Белорус президентининг провокацион фикри Россиянинг сиёсий режасидан келиб чиқмоқда. Агар эртага Россия Лукашенконинг фикрларини ўз ичига олган сиёсий, иқтисодий режаларни қўллаб-қувватлашни Ўзбекистонга кескин талаб сифатида қўйса, биринчилардан бўлиб ўша сиёсий фаоллар Путин билан муроса қилишни Мирзиёевдан талаб қила бошлашади. Чунки Ўзбекистон доирасидаги тор фикрлилик Россияга таъсир ўтказиш, унга бас келиш ва ниҳоят уни етаклаш ҳақида юксак мулоҳаза юритишдан маҳрумлик ҳисобланади. Мана шу саёз фикр сабаб зиёлилар ва сиёсатчилар Тожикистондаги ерларимизни Хитой эгалласа, Қирғизистон ва Қозоғистон иқтисодини Россия ўзига қарам қилса, Ўзбекистон бундай тузоқларга тушмади, деб қувониб юришларига олиб келди. Ваҳоланки, бу халқларнинг дини ва мазҳаби бир бўлганидек, сиёсий ва иқтисодий масалалари ҳам бирдир. 2019 йилнинг ёзида Ўзбекистоннинг Риштон ва Сўх туманларини боғловчи йўл очилгани, бироқ орадан икки кун ўтмай, қирғиз расмийлари йўл очилиши ЕОИИ талабларига жавоб бермаслигини баҳона қилиб йўлни қайта ёпиб қўйгани ҳам Ўрта Осиёдаги мусулмон халқларнинг бир-бирига чамбарчас боғлиқ бир вужуд эканлигини, уларнинг қайси бирига душман суқилса барчасига зарар етишини кўрсатди. Шуни таъкидлаб айтиш мақсадга мувофиқки, юртларимиз устида талашиб-тортишаётган бу мустамлакачи давлатларни фақат мусулмонларгина бартараф қила оладилар. Бунинг учун улар бир байроқ, бир давлат – тўғри йўлдаги Халифалик остида бирлашмоқлари лозим. Агар бу уммат Аллоҳга ихлос, Пайғамбари ﷺга садоқат билан дунё-ю охират азизлигига интилиб астойдил ҳаракат қилса, бу ишнинг уддасидан чиқади. Аллоҳ Ўзига ёрдам берганларга ёрдам бергувчидир. Аллоҳ кучли ва азиздир.

وَاعْتَصِمُواْ بِحَبْلِ اللّهِ جَمِيعًا وَلاَ تَفَرَّقُواْ وَاذْكُرُواْ نِعْمَتَ اللّهِ عَلَيْكُمْ إِذْ كُنتُمْ أَعْدَاء فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَانًا وَكُنتُمْ عَلَىَ شَفَا حُفْرَةٍ مِّنَ النَّارِ فَأَنقَذَكُم مِّنْهَا كَذَلِكَ يُبَيِّنُ اللّهُ لَكُمْ آيَاتِهِ لَعَلَّكُمْ تَهْتَدُونَ 

– “Барчангиз Аллоҳнинг арқонини маҳкам тутинг ва бўлиниб кетманг. Ва Аллоҳнинг сизга берган неъматини эсланг: бир вақтлар душман эдингиз, бас, қалбларингизни улфат қилди. Унинг неъмати ила биродар бўлдингиз. Ўтли жар ёқасида эдингиз, сизни ундан қутқарди. Аллоҳ сизга Ўз оятларини ана шундай баён қилади. Шоядки, ҳидоят топсангиз”.                      (Оли Имрон:103)

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

11.05.2022й