Менга ҳеч ким етказмаган демаслигиз учун
“Зиндон хотиралари” туркумидан
Менга ҳеч ким етказмаган демаслигиз учун
بسم الله الرحمن الرحيم
Аллоҳнинг омонати бўлган Унинг йўлидаги даъват бутун инсониятга тўлиқ етказилиши лозим бўлган оғир ва шарафли вазифадир. Буни ўз зиммасига олган ҳар бир даъватчи тинимсиз жидду жаҳд қилишда асло сустлашмаслиги лозим. Бугунги ривожланган технологиялар даврида туну кун тоғ-тоғ даъват савобларини қўлга киритиш имкони бор. Минглаган чанқоқ уммат ўғлонлари интернет тармоқларидан ҳаёти учун тўғри йўл излаб қаноатли фикрлар қидирмоқдалар. Бизлар эса, уларнинг оғриқли муаммоларига қаноатли ечимни вақтида тақдим қилолсак кифоя. У сизнинг қайноқ суҳбатдошингиз бўлиб қолишига асло шубҳа йўқ. Чунки Аллоҳнинг шариати ҳар қандай холис кишининг ҳаётини инқилобий суратда ўзгартириб, қалбига хотиржамлик беришга яроқли ягона йўлдир. Зеро, бугунги муаммолар исканжасида изтиробдаги одамларга Аллоҳнинг кўрсатмаларидек, Пайғамбаримиз ﷺ тариқатидек малҳам бошқа ёлғончи тузумларнинг бирортасида топилиши мумкин эмас. Хуллас ҳар бир даъватчини ўз эшитувчиси уни изламоқда. Уни топмоқ эса, бир сониялик ишдир.
Аллоҳ субҳанаҳу бандаларига ҳидоят йўлини кенг қилди. Ҳатто тиконли симлар ичидан чиқолмай, ўша ботқоқларда умри зое кетаётган аристонларга-ю, уларни устидан назорат қилувчи зона ходимларига ҳам Роббул аъламин ўз даъватчиларини юбориб уларни огоҳ қилиш тадбирини қилиш билан уларга ҳам “менга етказмаган” демоқликка узр қолдирмади. Қуйидаги зона хотираларидан бўлган навбатдаги ҳикоямиз балки сиз азиз даъват аҳлига ибрат бўлар, деб умидландим. Ва бу хотирани “Менга ҳеч ким етказмаган демаслигингиз учун” дея номладим.
Зонага киришимиз оғир бўлди, иккита биродаримиз шаҳид бўлиб, бир неча азизларнинг юриб-туриши имконсиз ҳолга келди.
Ур-йиқитдан кейинги мелисалар билан суҳбат бошланди. Юрса юргудай биродарларни жамлаб, зона оперлари, режимнийлари ва бошқа турли олабўжилар суҳбатга чақиришди. Уларни баъзиси бизларни ич-ичидан ёмон кўрса, баъзилари бизларни тушунишни хоҳларди.
– Санларни бу кўйга солганлар ўзлари четларда ялло қилиб юрибди. Пўх бормиди сиёсатга аралашиб. Қисиииб масжидларда бошқалардек номозингни ўқииииб юровирмайсанларми? Зонада … борми санларга?
Бу саволми ёки киноями англамай тургандим. Кейинчалик шу зонада кўкраклари тирноқкесарда қирқиб қатл қилинган бир биродарим ҳозиржавоблик қилиб деди:
– Аллоҳ Ўзини йўлига чорловчи даъватчиларини жамиятдаги ҳар бир қатламга юборувчидир. Сиз айтган масжидда даъватчи етарли. Кўчада ҳам имкон қадар даъват ўз маромида кетмоқда. Аммо сиз каби тиконли симлар ичидаги Худодан узоқлашиб кетган золимларга ҳам “Менга ҳеч ким етказмаган” демасларинг учун ўз даъватчиларини юборди. Аммо сизлар у яхшиларни қатл қилдингиз.
وَمَنْ أَحْسَنُ قَوْلًا مِّمَّن دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ
– “(Одамларни) Аллоҳ(нинг дини)га даъват қилган ва ўзи ҳам яхши амал қилиб, “Шак-шубҳасиз мен мусулмонлардандирман”, деган кишидан ҳам чиройлироқ сўзловчи ким бор?” (Фуссилат: 33)
(Золимлар тарафидан даҳшатли суратда қатл қилинган биродаримни эслаганим – ўша хотиралардан)
Ҳизб ут-Таҳрирнинг Ўзбекистондаги матбуот бўлими аъзоси Зайниддин
10.06.2022й
