Роя газетаси:

Миср Шимолий Африка учун янги ҳарбий кучга етакчилик қилади

Миср президенти Абдулфаттоҳ Сисийнинг Эфиопия пойтахти Аддис-Абебадаги ғайратига терроризмга қарши кураш лойиҳаси туртки бўлди. У ўтган шанба куни бошланган Африка Иттифоқи саммитида қатнашиш учун борган Миср делегациясига раислик қилди. Мисрнинг Эфиопиядаги элчиси Абу Бакр Ҳанафийнинг билдиришича, Қоҳира Шимолий Африка давлатларини ўз ичига олган янги ҳарбий куч ташкил қилиш лойиҳасига етакчилик қилади. У Мисрнинг Шимолий Африкада «ҳарбий куч» ташкил қилиш лойиҳасига етакчилик қилишини Африка Иттифоқи саммити бошланишидан олдинроқ эълон қилган эди. Бу дипломат Шимолий Африкада тузилиши кутилаётган айни «ҳарбий куч»нинг қандай бўлиши, аскарлари сони қанча бўлиши, қароргоҳи ва қўмондонлигининг қаерда жойлашиши ҳақида ҳеч қандай тафсилотларга киришмади. Бироқ у «Шарқул Авсат» ахборот агентлиги томонидан тарқатилган баёнотида «Бу етакчиликнинг Африкада тинчлик ва хавфсизликни муҳофаза қилиш учун муштарак Африка ҳарбий кучини тузишга қаратилган саъй-ҳаракатлар доирасида бўлиши»ни таъкидлади. Ушбу Миср ахборот агентлигининг хабарига кўра, «Африка ҳарбий кучи қурилишида муҳим ғишт сифатида хизмат қилувчи айни лойиҳага раҳбарлик қилиш масъулиятини Миср мудофаа вазири ёрдамчиси генерал Муҳсин Шозлий ўз зиммасига олган». Афтидан, ташкил этилиши кутилаётган айни кучнинг асосий мақсади – айниқса Африкада ИШИД ва ал-Қоида ташкилотлари кучайиб бораётган бир пайтда – терроризмга қарши курашдан иборат бўлади. (Ҳаёт газетаси).

Роя газетаси шарҳи:

Африка ҳарбий кучини ташкил қилиш лойиҳасининг Мисрга топширилиши «Давлат ташкилоти»га қарши кураш ниқоби остида Ливияга ҳарбий жиҳатдан аралашиш учун Америка билан Европа давлатлари ўзаро рақобатлашаётган бир пайтга тўғри келмоқда. Бундан кўриниб турибдики, Америка Ливия каби юртларда ўз сиёсатини амалга ошириш учун янги Африка кучларидан фойдаланишда ўзининг малайи Абдулфаттоҳ Сисийга таянмоқда.

Роя газетасининг 2016 йил 3 феврал чоршанба кунги 63-сонидан