Норов Лавровга Конституциявий ислоҳот ҳақида маълумот берди

بِسْمِ اللهِ الرَّحْمٰنِ الرَّحِيم

Хабар: Россияга Ўзбекистонда бошланган конституциявий ислоҳотларнинг бориши ва устувор йўналишлари ҳақида маълумот берилди. Бу ҳақда жорий йилнинг 12 июль куни Москвада бўлиб ўтган Ўзбекистон Ташқи ишлар вазири Владимир Норов ва Россия Федерацияси Ташқи ишлар вазири Сергей Лавров иштирокидаги учрашувда сўз борган.

Унда Ўзбекистон-Россия стратегик шериклик муносабатларини янада мустаҳкамлаш масалалари кўриб чиқилган.

Бўлажак тадбирларнинг ташкилий-мазмуний жиҳатлари, жумладан, 2022 йил 28-29 июль кунлари Тошкент шаҳрида бўлиб ўтадиган ШҲТга аъзо давлатлар Ташқи ишлар вазирлари кенгашининг мажлиси муҳокама қилинган.

Изоҳ: Мирзиёев қайта сайланганидан кейиноқ Конституцияни янгилашга киришиб қолганининг сабаблари ойдинлашмоқда. Маълумки, қайта сайланиш борасида Мирзиёев янги конституцияга 2026 йилда муҳтож бўлади. Демак, сайловдан бошқа муҳим омиллар ҳам борки, улар янги қомусни ҳозироқ ишлаб чиқишни талаб қилмоқда.

Владимир Норовнинг Москвага жўнаб кетишидан бир кун олдин Шавкат Мирзиёев Евроосиё иқтисодий комиссияси ҳайъати раиси Михаил Мясниковични қабул қилди. Учрашувда Евроосиё иқтисодий иттифоқи билан ҳамкорликнинг қўшимча йўналишлари рўйхати имзолангани айтилди. Демак, Ўзбекистон ташқи ишлар вазирининг Лавровга Конституциявий ислоҳот ҳақида маълумот бераётганининг ўзи бу ишда Россия манфаатлари борлигини кўрсатади. Россия учун Мирзиёевнинг иқтидорда қолиши ҳамда қонунчиликдаги айрим таъқиқларнинг бекор қилиниши жиҳатидан Ўзбекистон конституциясининг ўзгартирилиши муҳим аҳамиятга эга. 2005 йилдаги Андижон қирғинидан кейин ташқи сиёсат концепциясида Ўзбекистонни ҳарбий блокларга қўшилмаслиги ҳамда сиёсий мустақиллигига таъсир кўрсатиши мумкин бўлган халқаро ташкилотлардаги фаолиятига чек қўйилган. Бу нарса Ўзбекистонни Россия ташкилотларига қўшилишига монелик қилади. Шунга кўра, Мирзиёев ҳукуматининг Москва таъсирига кириб бориши халқни Россия ташкилотларига қўшилиш ғоясига оғдиришга уринишида ва давлат низомига ўзгартириш киритишида кўринади. Нукус воқеаларидан кейин бу ишни амалга ошириш имкониятлари кенгайди. Чунки Қорақалпоғистондаги ҳодиса Россия таъсирида юзага келтирилиб унинг қўллаб-қувватлови билан бостирилгач, Мирзиёев ҳукуматининг Москва билан алоқалари жадаллашиб қолди. Бу пайтгача Ўзбекистон ҳукумати ЕОИИдан кўра Жаҳон савдо ташкилотига мойиллиги кўрилаётган эди. Лекин бу икки ташкилотнинг фаолияти ўрганилса, уларга аъзо давлатлар бир-биридан шикоят қилаётганини ва ташкилот низомини қайта кўриб чиқишни талаб этаётганини кўрамиз. Бир сўз билан айтганда, ЕОИИ Россиянинг, ЖСТ эса Американинг манфаатларини муқаддам қўювчи низом асосида тузилган, ҳатто уларнинг манфаатлари бирламчи ҳисобланади. Ҳозирда Ўзбекистон мисолида кўплаб Ислом диёрлари Америка, Европа ва Россия ташкилотларига аъзо бўлишга мажбурланмоқда. Улар гўё жон сақлаш учун бу ташкилотларга киришмоқда. Ўзбекистон ЕОИИдаги иштирокисиз ҳам Россия учун мамлакат эшикларини ланг очиб қўйган. Мисол учун, жорий йилнинг январь-июнь ойларида янги ташкил этилган корхоналарнинг давлатлар кесимида сони бўйича Россия (399 та) етакчилик қилмоқда. Кўриниб турганидек, Россия Ўзбекистонга минтақанинг энг қийматли ўлкаси, деб қарайди. Шу сабабдан Ўзбекистонни сиёсий, иқтисодий, ҳарбий ва сақофий жиҳатдан қарам қилишга ҳаракат қилади.

Хулоса ўрнида шуни айтамизки, хоҳ Россия бўлсин, хоҳ Ғарб, хусусан Америка бўлсин, уларнинг қучоғига кириш ўзини оловга отиш билан баробардир. Улар билан ҳамкорлик қилиш ҳеч қачон тенг шериклик асосида бўлмаган ва бўлмайди ҳам. Улар биз мусулмонларни ҳеч қачон ўзларига тенг кўрмайдилар. Чунки улар бизнинг душманимиздир. Аллоҳ Таоло бу ҳақида бизни огоҳлантириб шундай дейди:

يَا أَيُّهَا الَّذِينَ آمَنُواْ لاَ تَتَّخِذُواْ الْيَهُودَ وَالنَّصَارَى أَوْلِيَاء بَعْضُهُمْ أَوْلِيَاء بَعْضٍ وَمَن يَتَوَلَّهُم مِّنكُمْ فَإِنَّهُ مِنْهُمْ إِنَّ اللّهَ لاَ يَهْدِي الْقَوْمَ الظَّالِمِينَ 

– “Эй иймон келтирганлар! Яҳудий ва насороларни ўзингизга дўст тутманг. Улар бир-бирлари билан дўстдирлар. Сиздан ким уларни дўст тутса, албатта, у улардандир. Албатта, Аллоҳ золим қавмларни ҳидоят этмас”.     (Моида:51) 

Бизнинг устимиздан масъул бўлган раҳбарлар Аллоҳнинг ушбу таълимотига беписандлик билан қараб, душманларимизни рози қилиш учун ўлиб тирилмоқдалар. Бизни халқаро ташкилотлар, мустамлакачи давлатлар қўлига қул қилиб бериб, бунинг эвазига тахтларида узоқроқ ўтиришни хоҳламоқдалар. Мазкур халқаро тизимнинг кишанларидан озод бўлишнинг ягона йўли Ислом асосида уйғониб, уни ҳаётга татбиқ қилиш учун ҳаракат қилишдир. Бу мақсад рўёбга чиқиши учун мусулмонларни фикрий ва шуурий жиҳатдан бирлаштирадиган Ислом ақидасига ҳамда унинг сиёсий тузуми бўлган Халифаликка ҳамма жойда даъват этилиши зарур.

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

30.07.2022й