بِسْمِ اللهِ الرَّحْمٰنِ الرَّحِيم

Пайғамбар соллаллоҳу алайҳи ва салламни ҳақоратлашларга муносабат

Эй Росулуллоҳ, сиз Аллоҳ Субҳаноҳу ва Таоло айтганидек

وَإِنَّكَ لَعَلى خُلُقٍ عَظِيمٍ

– “Албатта сиз улуғ Хулқ устидадирсиз”. (Қалам:4)

Бу замон Ислом уммати учун асл хорлик замони бўлди. Қайсики эътиқоди бузуқлар томонидан айтилаётган ҳақоратларга ҳатто тиш синиб кетгудек бўлса ҳам тишни-тишга қўйиб, юрак зарбидан кўкрак қафаси ёрилиб кетгудек бўлса ҳам чидаш замони. Эй мусулмонлар, биз бугун худди етим бола кабимиз. Ҳа, биз ҳамма туртаверадиган, ҳар қандай қаланғию қасанғи ҳақоратлайверадиган етим бола кабимиз. Афсуски, Ислом Давлати тикланмас экан шундаймиз! 

Биз бугун Росулуллоҳ соллаллоҳу алайҳи ва салламни ҳақорат қилганлар ким эканлигини эътиқодий жиҳатдан очиб берамиз. Улар ўзларини демократлар, деб биладилар, сўз эркинлиги, дея даъво қиладилар. Мана кўриб қўйинг, Эй Мусулмонлар, демократия қандай бўлади. Унда сиз муқаддас деб биладиган нарсаларни ҳақорат қилишга, оёқ ости қилишга рухсат берилади. Бугун Аллоҳнинг Росули ҳақорат қилинса, эртага Аллоҳнинг Ўзини ҳақорат қилишади. Ишонмасангиз, ахлоқсизлик ботқоғига ботган Ғарб ҳаётига қаранг. Улар моддий бойликни барча нарсадан устун кўрган манфур инсонлардир. Ҳақоратлаганларнинг бирига қарасангиз давлат мансабдори, бошқалари матбуот ходимлари, яна бошқаларини Аллоҳ билади. Улар худдики шу йўл билан обрў орттириш илинжида. Нега биласизми?! Чунки мусулмонлар яшайдиган жамиятлар кофирлар ва уларнинг малайлари бошқарувида кун кечирмоқда. У манфур инсонларнинг мақсади шуларнинг розилигини олишдир.

Бу каби ҳолатларни бугунги кунда ҳар бир мусулмонлар юртида учратиш мумкин. Агар мусулмонлар юртларининг ҳокимлари озгина бўлса ҳам Исломга муҳаббатли бўлишганида эди, бу ҳолатларга жим қараб туриша олмаган бўлардилар. Афсуски, улар ҳамон сукутда. Росулуллоҳ с.а.в. ни ҳақорат қилишга ботина олган инсонларнинг журъати ҳам аслида шундан.

Бизни бундай шахсларга айтадиган гапимиз йўқ. Фақат бир нарсани, яъни уларни қўллайдиган тузум ва ҳукмдорларнинг замони охирлаб қолганлигини, эрта ё индин албатта Ислом тонгги қайта отажагини, Рошид Халифалик тикланиб мусулмонларнинг аслий даражалари ўз ўрнига келажагини эслатиб қўймоқчимиз. Чунки у кунда Аллоҳ ва Росулининг, Ислом ва мусулмонларнинг душманлари мағлуб бўлажак.

Мўминларнинг Аллоҳ ва Росулини яхши кўришлари ҳар қандай ботил қавмнинг ўзлари муқаддаслаб олган нарсаларини яхши кўришидан қаттиқроқдир.

قُلْ إِنْ كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُمْ مِنْ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا حَتَّى يَأْتِيَ اللَّهُ بِأَمْرِهِ وَاللَّهُ لاَ يَهْدِي الْقَوْمَ الْفَاسِقِينَ  

– “(Эй Муҳаммад алайҳис-салом), айтинг: “Агар ота-оналарингиз, болаларингиз, ака-укаларингиз, жуфтларингиз, қариндош-уруғларингиз ва касб қилиб топган мол-дунёларингиз, касод бўлиб қолишидан қўрқадиган тижоратларингиз ҳамда яхши кўрадиган уй-жойларингиз сизларга Аллоҳдан, Унинг пайғамбаридан ва Унинг Йўлида жиҳод қилишдан суюклироқ бўлса, у ҳолда то Аллоҳ Ўз амрини (яъни азобини) келтиргунича кутиб тураверинглар. (Зеро), Аллоҳ бундай итоатсиз қавмни ҳидоят қилмас””.    (Тавба:24)

Биз буларни мўминларга эслатма учун келтириб ўтмоқдамиз.

Ибн Ҳиббон ўзининг «саҳиҳ»ида ривоят қилади: «… Урва ибн Масъуд дўстларининг олдига келиб, эй қавм, Аллоҳга қасамки, мен подшоҳларнинг, Кисроларнинг, Қайсарларнинг, Нажжошийнинг олдига вакил бўлиб борганман, аммо Муҳаммад каби асҳоби улуғлайдиган подшоҳни кўрмадим, Аллоҳга қасамки, агар балғам ташласа, улардан бирининг кафтига тушар экан, уни юзи ёки баданига суртиб оларкан, бир ишга буюрса, ошиқиб бажарар эканлар, таҳорат қилса, таҳоратидан ортган сувни талашиб, уришиб кетарканлар, гап бошласа, овозларини пасайтирарканлар, уни улуғлаб унга тик қарамас эканлар, деди».

Абдуллоҳ ибн Ҳишом айтади:

«كُنَّا مَعَ النَّبِيِّ  , وَهُوَ آخِذٌ بِيَدِ عُمَرَ بْنِ الْخَطَّابِ, فَقَالَ لَهُ عُمَرُ: يَا رَسُولَ اللَّهِ لأَنْتَ أَحَبُّ إِلَيَّ مِنْ كُلِّ شَيْءٍ إِلاَّ مِنْ نَفْسِي, فَقَالَ النَّبِيُّ  : لاَ, وَالَّذِي نَفْسِي بِيَدِهِ, حَتَّى أَكُونَ أَحَبَّ إِلَيْكَ مِنْ نَفْسِكَ, فَقَالَ لَهُ عُمَرُ: فَإِنَّهُ الآنَ, وَاللَّهِ لأَنْتَ أَحَبُّ إِلَيَّ مِنْ نَفْسِي, فَقَالَ النَّبِيُّ : الآنَ يَا عُمَرُ»

«Пайғамбар с.а.в. билан бирга эдик. У киши Умар ибн Хаттобнинг қўлини ушлаб олгандилар. Умар у кишига: «Эй Аллоҳнинг Пайғамбари, сиз менга ҳамма нарсадан маҳбуброқсиз, фақат ўзимдан эмас», деди. Пайғамбар с.а.в.: «Йўқ, жоним Унинг қўлида бўлган зотга қасамки, то сенга ўзингдан ҳам маҳбуброқ бўлмагунимча бўлмайди», дедилар. Шунда Умар: «Мана энди, ҳозир, Аллоҳга қасамки, сиз менга ўзимдан ҳам маҳбуброқсиз», деди. Пайғамбар с.а.в.: «Ана энди бўлди, эй Умар», дедилар». (Бухорий).

Биз буларни Росулуллоҳ соллаллоҳу алайҳи ва салламнинг шаънларини ҳимояси учун гапирмадик. Чунки Аллоҳнинг Росулини шаъни ҳимоялашга муҳтож эмас. У зот бутун борлиқни яратган Яратувчининг муҳаббатига лойиқ бўлган зотдир. У зот Яратувчининг Ўзи томонидан айтилганидек улуғ хулқ устидадир!

وَإِنَّكَ لَعَلى خُلُقٍ عَظِيمٍ

– “Албатта, сиз улуғ Хулқ устидадирсиз”. (Қалам:4)

Ҳизб ут-Таҳрирнинг Ўзбекистондаги медиа офиси