بِسْمِ اللَّـهِ الرَّحْمَـٰنِ الرَّحِيمِ

Роя газетаси:

Шом қўзғолони ҳам касал бўлиши мумкин

Бироқ у Аллоҳнинг изни ила ҳаргиз ўлмайди

Аҳмад Абдулваҳҳоб қаламига мансуб

Биз Шомдаги муборак қўзғолон қай аҳволга келиб қолганини ҳамда қатли ом, айрим минтақаларни бой бериш каби Ҳалабда содир бўлаётган ҳодисаларни кўриб турибмиз. Шундай экан, фақат ва фақат, ростгўй позицияни эгаллаб, ишларни ўрни-ўрнига қўйишимиз ҳамда ташаббус тизгинини қайта қўлга олишимиз лозим.

Биз энг аввало, шуни англаб етишимиз лозимки, Ислом Уммати тирик, ўлмас Уммат бўлиб, Аллоҳ Исломни бутун дунёга етказиш вазифасини шу Умматга чамбарчас боғлиқ қилиб қўйган. Чунки унинг қўлида Муҳаммад САВ рисолати бор, у касал бўлиши мумкин, аммо ўлмайди, ухлаши мумкин, бироқ бир кун албатта уйғониб, қайта қўзғалади… бутун асрлар давомида шу ҳолатда бўлиб келди.

Дарҳақиқат, Аллоҳ Субҳанаҳу ва Таоло Ўз динини бутун оламларга раҳмат сифатида улашиш учун бутун дунё билан қарама-қарши келишни Уммат тақдирига ёзиб қўйди. Мана шу нарса бутун куфр кучларини унга қарши жамланишга, уни йўқ қилиш учун қайта-қайта уринишга мажбур қилди. Бироқ буни амалга ошириш уларга йўл бўлсин. Чунки Муҳаммад САВ Уммати Аллоҳ Субҳанаҳу ва Таолонинг дини боқийлигича боқийдир. Аллоҳ Азза ва Жалла дини ҳаргиз ўлмайди, уни борлиқ, инсон ва ҳаётнинг Холиқи сақлаб туради. Аллоҳ Таоло бундай деди:

إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ

«Албатта бу эслатмани Биз Ўзимиз нозил қилдик ва шубҳасиз, Ўзимиз уни сақлагувчимиз»

                                                                                                         [Ҳижр 9]

Ишлар оқимига бир бор назар ташлашнинг ўзи бизга Шомдаги муборак қўзғолон иши қаердан бузилганини ва бу бузилиш унинг тақдирини хавф остига олиб келиб қўйганини яққол кўрсатиб беради. Дарҳақиқат, Америка ишлар жараёнини ўз назорати остига олишга муваффақ бўлди. Бунга Суриядаги гуруҳлар қўмондонларининг ўз душманларига ишониб-алданиб қолишлари сабабдир. Улар душманга алданганда ҳам бутунлай лаққа тушиб, ҳатто Ғарб доирасидан чиқмай, унинг тайёр хизматкорига айланиб қолишди! Ўзларини эса тўғри иш қиляпмиз деб ўйлашмоқда. Американинг асосий муваффақиятлари қуйидагилардан иборат:

Биринчи: Америка Шом тоғути бўлмиш ўз малайига қарши курашни терроризмга қарши курашга ўзгартириб, уни биринчи даражага қўя олди. Хорижий жиҳатдан олганда, халқаро салибчилик коалициясини тузиб, қўзғолонга қарши курашни – ҳатто ўзларини Сурия халқи дўстлари дея даъво қилган давлатлар наздида ҳам – биринчи навбатдаги вазифага айлантирди. Ички жиҳатдан айтадиган бўлсак ҳам, «Терроризм»га қарши курашни гуруҳлар қўмондонлари наздида ҳам биринчи навбатдаги урушга айлантирди. Бунга бир томондан, ИШИДнинг нотўғри хатти-ҳаракатлари сабабли бўлса, иккинчи томондан, қўллаб-қувватловчи давлатлар ва бир нуқтага қаратилган ахборот йўналиши сабаб бўлди. Масалан, бунга энг кучли далил: гуруҳ қўмондонлари Ҳалабни дунё душманлари қаршисида бир ўзини ташлаб, «Фурот қалқони»да иштирок этиш учун кетишди!

Иккинчи: Қўзғолонни ифлос сиёсий маблағга кўмиб юборди, гуруҳ қўмондонларини уларни қўллаб-қувватловчи давлатларга боғлаб қўйди, натижада, бугун кўриб турганимиздек, улар мустақил қарор чиқаролмайдиган бўлиб қолишди. Энди, ўзларига ўзлари хўжайин бўла олмайдиган, ўша давлатлар босимларидан узоқда қадам ташлолмайдиган бўлиб қолишди, уларнинг топшириқ ва шартлари гуруҳлар оёқ-қўлларини кишанлаб, ҳаракатлана олмайдиган шол қилиб қўйди… Шу орқали уларни стратегик минтақалардан узоқлаштирди. Бу минтақалар гуруҳлар учун яқинлашишдан ҳам маҳрум этилган қизил чизиқларга айланди, гуруҳларни кучларини бекорга сарфлаб, холдан тойдирадиган минтақаларга чеклаб қўйди. Қўллаб-қувватловчи давлатлар ҳам гуруҳларни бир-бири билан бўлган низога тиқиб, бўлиб ташлашга зўр бериб ҳаракат қилишди, бўлиб ташланган гуруҳларга алоҳида-алоҳида раислар, улар назорат қиладиган алоҳида-алоҳида минтақалар, алоҳида-алоҳида мақсадлар ва бир-бирларидан айрича манфаатларни пайдо қилишди. Натижада бир-бирларига қарши курашиб, куч-қудратлари кетди… Аллоҳ Азза ва Жалла огоҳлантирган аҳволга тушишди:

وَلَا تَنَازَعُوا فَتَفْشَلُوا وَتَذْهَبَ رِيحُكُمْ ۖ وَاصْبِرُوا ۚ إِنَّ اللَّـهَ مَعَ الصَّابِرِينَ

«(Ўзаро) талашиб-тортишмангизки, у ҳолда сустлашиб, куч-қувватингиз кетур, сабр-тоқат қилингиз, албатта, Аллоҳ сабр қилгувчилар билан биргадир»                                                                                       [Анфол 46]

Гуруҳлар қўмондонларида сиёсий онгнинг йўқлиги уларнинг душман қопқонига тушишларига асосий омил бўлди. Бу нарса уларни душман ўз манфаатини рўёбга чиқариш йўлида минадиган тайёр улов қилиб қўйди. Маълумки, Америка айни курашга парда ортида туриб етакчилик қилмоқда, малай ва иттифоқчиларига қўзғолонни жиловлаш ролини тақсимлаб бергандан сўнг, уларни курашга киритмоқда. Масалан, малайи Шом тоғутини қўллаб-қувватлаш учун Эрон ва унинг Ливандаги Ҳизбини… сўнг эса Россияни жангга киритди. Шунингдек, Туркия, Саудия ва бошқа давлатларни ҳам гуруҳ қўмондонларини тумшуғидан ип ўтказиб олиш учун жангга киритди. Булар гуруҳ қўмондонлари англаб етмаган ишлардир. Оқибатда, улар дўст эканини иддио қилган душман қўйнига ўзларини отдилар, душман қарорига бирор исён қилгудек бўлса сўйиб ташлашлари учун бўйинларини душман кундасига қўйиб бердилар… Булардан ташқари, гуруҳ қўмондонларида нима ютуқ эканини ажрата билиш ҳам йўқ эди… оқибатда сақлаб қололмайдиган арзимас хаёлий ютуқлар қурбони бўлишди, бинобарин, сулҳ ва ярашув йўлига қадам ташлаб, бирин-кетин ўша ютуқларни ҳам қўлдан бой бера бошлашди, сулҳ ва ярашув эса минтақаларни ўз аҳлидан бўшатиб, қайта қонхўр режим назоратига ўтказиб берди… Охир бориб, қўзғолон қалъаларининг энг охири бўлган Сурия шимолига чекланиб қолишди. Устига устак, қўмондонларнинг хато хатти-ҳаракатлари сабабли гуруҳлар ўз халқчилликларини йўқотди ёки йўқотишларига бир баҳя қолди. Мана шуларнинг бари Шом аҳлини ва уларнинг номусларини мудофаа қилишни ўз зиммасига олган кишиларда сиёсий онгнинг йўқлиги оқибатидир.

Бу ҳақиқатларнинг барчаси бизни қўзғолон оқимига умумий тарзда назар ташлаб, бу оқимни тузатиб олишга ҳаракат қилишга ундайди. Акс ҳолда қўзғолон бутунлай издан чиқиб кетиши ва талотум денгизи тўлқинларида ғарқ бўлиши мумкин. Бу эса ҳар бир холис инсонга ўз жавобгарлигига амал қилишни талаб қилади. Чунки анави қўллаб-қувватловчи давлатлар қўлларини чопиб ташламаса бўлмайди, бу жуда-жуда зарурдир. Чунки қўзғолон тақдирини кўзларимиз билан кўриб турганимиздек хавф остига олиб келган мана шу қўллар бўлади. Тўғри йўналишдаги биринчи қадам мана шу. Негаки шу қадам қайтадан гуруҳ қўмондонларини ўз қарорларига ўзлари эга, мустаҳкам йўлдан одимлашга қодир мустақил қўмондонларга айлантиради, кейин ҳаммалари онгли ва холис тарзда битта сиёсий лойиҳа, битта сиёсий етакчилик атрофига бирлаша оладилар. Ана шунда қўзғолон душманлари чизиб қўйган ва қўмондонларни унга яқинлаштирмаётган, бутун доиралар учун стратегик минтақа ҳисобланган қизил чизиқни вайрон қилишга қодир бўладилар. Бас, вақт бой берилгани йўқ ҳали, душман ўйини мувозанатини бузиш учун қулай фурсат ҳамон мавжуддир.

Ҳамма шуни билмоғи лозимки, Аллоҳнинг ўзи сақласин, Ҳалаб мағлуб бўлса, бу қўзғолон интиҳо топганини англатмайди, гарчи бу қаттиқ зарба бўлса-да, бироқ Аллоҳ Субҳанаҳу ва Таоло

وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّـهُ يَعْلَمُ وَأَنتُمْ لَا تَعْلَمُونَ

«Сизлар ўзингиз учун яхши бўлган нарсани ёқтирмаслигингиз ва сиз учун ёмон бўлган нарсани яхши кўришингиз мумкин. (Буни) Аллоҳ билур, сизлар билмассиз»                                                                                   [Бақара 216]

демоқда, шу боис, шояд айни зарба уларни ғафлат уйқусидан уйғонишларига қаттиқ туртки бўлса, ажаб эмас. Биз бунинг аломатларини Ҳалаб ичкарисидаги гуруҳларнинг битта армия бўлиб бирлашаётганида ва айни қўмондонларга қарши норозилик намойишлари ва ҳали у, ҳали бу ерларда жамоий тадбирлар бўлаётганида кўриб турибмиз, ахир, бу қўмондонлар минглаб шаҳидларимиз қонини, миллионлаб Шом аҳли берган фидоийликларни сотишдику… Мана шуларнниг барчаси Уммат ҳали тирик эканига, Аллоҳнинг изни ила, у албатта қайта саломатлигини тиклаб олишига далилдир. Бу асло Роббимизга мушкул эмас.

Роя газетасининг 2016 йил 6 декабр чоршанба кунги 107-сонидан