Ҳизб ут-Таҳрир – муборак Фаластин замини режим томонидан қонун бузилаётгани ва инсон ҳуқуқлари поймол этилаётганини фош қилди
بسم الله الرحمن الرحيم
Роя газетаси:
Ҳизб ут-Таҳрир – муборак Фаластин замини режим томонидан қонун бузилаётгани ва инсон ҳуқуқлари поймол этилаётганини фош қилди
Ҳизб ут-Таҳрир – муборак Фаластин замини матбуот бўлими аъзоси Боҳир Солиҳ 2018 йил 25 апрелда инсон ҳуқуқлари мустақил ҳайъати Рамаллоҳда ўтказган конференцияда қатнашди. Ҳайъатнинг йиллик ҳисоботи эълон қилиниши учун ўтказилган айни конференцияда матбуот ходимлари, ҳуқуқбонлар, сиёсатчилар, юристлар ҳамда хавфсизлик хизмати, вазирликлар, инсон ҳуқуқлари ва фуқаролик жамияти муассасалари вакиллари иштирок этди.
Боҳир Солиҳ ўз маърузасида Фаластин режими 14 апрел шанба куни Ҳизбнинг Жанин ва Халил шаҳарларидаги конференциясини бостиргани, иккала шаҳарни чор атрофдан ўраб олиб, ёшу қарини ажратмай дубинкалар билан калтаклагани, кўздан ёш оқизувчи газ қўллагани тўғрисида гапирди. Шунингдек, у – режим 21 апрел шанба куни Ҳизбнинг Рамаллоҳдаги юришини тақиқлаб, айни шаҳар ва Ғарбий Қирғоқдаги бошқа шаҳарларни ёпиб қўйганини, бундан ташқари куч органларининг ниқобли ходимлари аҳоли орасида хавотирли муҳитни пайдо қилганини, катта Бира масжиди атрофи гўё ҳарбий казармага айлантириб юборилганини… таъкидлади. У Режимнинг бу хатти-ҳаракатлари ўз қонунини оёқ ости қилиш ҳамда юрт аҳли ва фуқароси ҳуқуқларини очиқдан-очиқ топташ ҳисобланишини айтиб ўтди.
Кейин Боҳир Солиҳ Халил, Қилқилия ва Жаниндаги ҳибсга олинганлар масаласини кўтарди. Унинг таъкидлашича, Режим уларни сиёсий фаолиятлари сабабли ҳибсда сақламоқда, улардан иккитаси қонунга хилоф равишда Қилқилия шаҳри ҳокимининг буйруғи асосида ҳибсда қолмоқда. Авс Абу Арқуб исмли йигит эса, суд томонидан озод қилиш ҳақида қарор чиққанига қарамай, ҳамон қўйиб юборилмади. Маълум бўлишича, у ва у билан бирга бошқа бир йигит Арихага олиб кетилган. Бу шуни кўрсатадики, эс ҳушини йўқотиб залолатга тушган адолатсиз режим инсон ҳуқуқларини бузган.
Шуни ҳам айтиб ўтиш лозимки, инсон ҳуқуқлари мустақил ҳайъати бош котиби доктор Аммор Дувайк ҳам Фаластин режимининг Ҳизбга нисбатан бундай ҳаракатини ҳайъат ўз ҳисоботида қайд этганини таъкидлади ҳамда бу каби воқеаларнинг қонунга хилофлигини айтиб, қоралади.
Фаластин профилактик хавфсизлик хизмати «PNA»нинг юрист маслаҳатчиси Ёсир Абу Либда Рамаллоҳдаги юришни ноқонуний, чунки бунинг учун керакли рухсат олинмаган, бундан ташқари Ҳизб ут-Таҳрир Фаластин режимини ва унинг хавфсизлик хизматини тан олмайди, деди. Боҳир Солиҳ эса, ўз нутқида Ёсирга савол тарзида мурожаат қилиб бундай деди: Агар қонунда намойиш ўтказиш ҳақида ҳукуматга хабар қилишдан ташқари яна бирор нарса талаб қилинган бўлса, у ҳолда, нега шу қонуннинг ўзида режимнинг қонунийлигини тан олиш шарт эмаслиги айтилган? Қонунда буни шарт қилувчи ҳеч қандай буйруқ йўқ. Қонун талаб қилган ягона нарса ҳукуматга хабар қилиш, холос, Фаластин аҳли, қандай эътиқодда бўлишларидан қатъий назар, тинч намойиш ўтказиш ҳуқуқига эгадирлар. Ҳайъат бош комиссари ўринбосари Файҳо Абдулҳодий хоним ҳам буни тасдиқлар экан, режимнинг Ҳизб тарафдорларини бостириб, уларни ҳибсга олганини қоралади.
Ўз навбатида, Фаластин ички ишлар вазирлигидаги шикоятлар бўйича масъул ҳам ҳуқуқ ва эркинликлар поймол этилганига иқрор бўлди ҳамда Ҳизбни ва унинг сиёсий фаолиятини ҳурмат қилишини билдириб, уни бу борада шикоят тақдим этишга чақирди.
Шуни таъкидлаш лозимки, конференция залида Ҳизб ут-Таҳрирга нисбатан ҳамда яқин кунлар ичида у йўлиққан бостириш ва қамоққа олиш мавзусига нисбатан катта эътибор берилгани кузатилди. Ўз навбатида, йиғин иштирокчилари томонидан шу хусусда муносабатлар билдирилди.
Роя газетасининг 2018 йил 2 май чоршанба кунги 180-сонидан
